63 жилийн турш "шулам” хэмээн нүд үзүүрлэгдэж буй 31 хуруутай эмэгтэй
Өдгөө 63 настай Энэтхэг эмэгтэй Кумари Наяак хөршүүддээ “Шулам” гэж хочлуулдаг. Учир нь түүний гар, хөлийн хуруунууд нийлээд 31. Үүгээрээ хамгийн олон хуруутай хүн гэх өргөмжлөлөөр Гиннесийн номонд бүртгэгдсэн.
Кумарын Наяакын гарын хуруу 12 бол, хөлийнх нь 19 юм байна. Тэрбээр эхээс мэндлэхдээ ийм согогтой төрсөн бөгөөд, өнөөдрийг хүртэл мэс ажилбарт орох нэг ч удаагийн оролдлого хийж байгаагүй тухайгаа хэвлэлд өгсөн ярилцлагадаа дурджээ.
Энэтхэгийн Ганжам дүүрэгт амьдардаг тэрбээр, “Би ядуу тарчиг гэр бүлд өссөн. 63 жилийн турш ийм байдлаар амьдарсан тул одоо эвлэрсэн. Нутгийн хүмүүс миний хурууг харах гэж зорьж ирэх нь бий. Ихэнх нь шулам гэж хочлон, айж зугтах нь элбэг” хэмээн ярьсан байна.
Мэс ажилбар хийлгэх санхүүгийн бололцоо байхгүйн улмаас тэр энэ олон жилийн турш ялгаварлан гадуурхалтад өртөж иржээ. Хүмүүс түүнийг хараал жатга хийж хүний амь хөнөөсөн хэрэгт хүртэл буруутгаж, амьдардаг газраас нь хөөж явуулахаар оролдож байсан гэнэ.
“Би өөрийгөө шулам биш, энгийн хүн гэж бодохыг хүсдэг. Гэвч өнөөдөр өөрийн эрхгүй эгэл биш, муу төрлийн хүн гэж мэдэрдэг болж” хэмээн өгүүлжээ.
Энэтхэг улсад түүний адил бие эрхтний согогтой хүмүүс цөөнгүй төрдөг. Заримыг нь бурхан хэмээн шүтэж байхад, Кумарын адил шулам, чөтгөр гэж нүд үзүүрлэгдэх нь ч бий. Ийм учир иргэдийн боловсролыг дээшлүүлэх, мухар сүсгээр алив хүний төрөлхийн шинж чанарыг ойлгодог байдлыг болиулахад чиглэсэн хуулийн төслийг Энэтхэгийн эрх баригчид хийж байгаа талаар DW News сайт мэдээлжээ.
А.ЭРХЭС
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.