Их хурлын тойм: Л.Гантөмөр утаанаас салгах өчиг өгч, Н.Ганибал жинхлэгдэж, Д.Мөнх-Эрдэнэ агсамнав

Ардчилсан намынхан өчигдөр /2025.04.07/ түүхт 35 жилийн ойн баяраа тэмдэглэлээ. Үндсэний бодлогын хороогоо хуралдуулж, их хурлаа хийв.

АН таван жилийн дараах албан ёсны генсек: ЕНБД-аа жинхэллээ. Тодруулбал, Ардчилсан намын Ерөнхий нарийн бичгийн даргаар Н.Ганибалыг жинхлэхийг олонхын саналаар дэмжсэн байна.Энэ оны хоёрдугаар сарын 03-ны өдөр түүнийг АН-ын Ерөнхий нарийн бичгийн даргын үүрэг гүйцэтгэгчээр томилохыг Улс Төрийн Зөвлөлд танилцуулж байсан билээ. Ингэснээр АН таван жилийн дараа албан ёсны генсектэй болж байна. Хамгийн сүүлд буюу 2017-2020 оны хооронд Ц.Туваан генсекээр ажилласан. Түүнээс хойш дандаа үүрэг гүйцэтгэгч томилж иржээ.

Засгийн тэргүүний амнаас түрүүлсэн намын даргын ам: Их хурлаасаа өмнө "улстөрийн ямар нэгэн шийдвэр гаргахгүй" гэдэг сануулгыг өгсөн гэгддэг. Ямартай ч тайзан дээр гарч үгээ хэлэв. Ингэхдээ "2028 он гэхэд монгол хүний орлого 10 мянган ам.доллар болж, утаа түгжрэл арилна" гэсэн нь анхаарал татав. Гэвч ингэж хэлснээрээ шүүмжлэл хүлээлээ.

Уг нь түүнийг МАН-тай хамтарч ажилладаггүй юмаа гэхэд “төвийг сахина” гэж АН-ын бүлэглэлүүд үзэж даргаар тавьж байлаа. Гэхдээ тэр бүрнээ үүний эсрэг байж Засгийн газартай хамтраад суучихсан. "Намынхнаа хоолтой байлгах гээд" гэсэн мессежийг өгсөөр буй.

Баярын тайзны биш Засгийн газрын сайд нарт зориулсан үг: УИХ дахь АН-ын бүлгийн дарга О.Цогтгэрэл Их хурлынхаа индэр дээрээс "ТӨК-иудыг томруулбал авлигын хэмжээ ихэснэ" гэлээ. Энэ үгээ их хурлын индэр дээрээс биш хамтарсан Засгийн газарт багтсан намынхаа сайд нартаа дайх байв. Хяналтын болоод бүтээмжийн менежер гэгчээр Ардчилсан намаас чамгүй олон хүн томилогдож байгаа билээ.

Дав.Цогтбаатар гишүүний ах Д.Мөнх-Эрдэнийн агсамнал: Тэрбээр, генсезээр жинхлэгдсэн Н.Ганибалтай ам зөрж маргаан өрнүүлсэн. Улмаар маргаан даамжирч, газар хэвтээд хүүхэд шиг тийчигнэж, хөлчүү юм шиг л "агсамнав". Хувцас нь урагдаж, газарт унасан тэрбээр хөөгдөж гарахдаа хүрсэн. Мөн АН-ын баярын хурлын индэрээс “Лу.Гантөмөрөөс салцгаая бид 2027, 2028 оны сонгуульд ялмаар байна” гэж хашхирахаа ч мартсангүй.

О.Баасанхүү ГИХГ-ыг голж, эмэгтэйчүүдийг доромжлов: УИХ-ын гишүүн асан, хуульч О.Бааанхүү Гадаадын иргэн харьяатын газрын даргын албыг хаших хүсэлт авсан ч, тоохгүй гэдгээ ярьж явна. Цалинг нь голж байгаагаа ч хавчуулжээ. Өмнө нь ЦЕГ-ын дарга болох сонирхлоо цахим орчинд илэрхийлж байсан юм. Мөн ярилцлага өгөх үеэрээ намаасаа хүн онцолж цоллохдоо эмэгтэйчүүдийг ч давхар доромжилсон үг амнаасаа унагав. Олон нийтийн хэвлэл мэдээллийн хэрэгслээр ёс зүйгүй үг хэллэг ашиглаж, "гудамжны" авир гаргасан нь ерөөс зохимжтой байсангүй.

Үйл явдлуудыг онцлоход ийм. Дөрвөн жилийн өмнөх хагарал нь намын бүлгээ дөрөв хуваасан билээ. Өдгөө ямартай ч олон жил үргэлжилсэн хэрүүл тэмцэл, талцан хуваагдсан бүлэглэлүүдийн ааш араншин намжжээ. Дөрвөн жилийн өмнөхийгөө бодвол бас ч гэж овоо. Олноороо цуглараад муудалцаж, сайдалцаад ч хамаагүй их хурлаа хийж, системийн нам хэвээр гэдгээ тунхагласаар байх нь чухал байна. АН бол МАН-ын дараах 21 аймаг, 330 сум, 9 дүүрэг, баг, хороодыг хамран, намын үүрээ байгуулсан систем юм. "Ардчилсан" гэдэг тодотголоо, инститүц гэх үнэлэмжээ, олон нийтийн итгэл үнэмшлийг алдахгүй байх нь чухал хэвээр байгаа билээ.

У.УЯН

Энэ мэдээнд өгөх таны үнэлгээ

Хуваалцаарай Жиргээрэй