49 ХУВЬ: Ч.Сайханбилэг, Н.Золжаргал, Д.Ганбат, Д.Эрдэнэбилэг, О.Орхон,Ц.Пүрэвтүвшин нарыг 1-8 жилээр ЯЛЛАХААР ЗҮЙЛЧИЛЖЭЭ

“Эрдэнэт” үйлдвэрийн 49 хувийг ОХУ-ын талаас шилжүүлэн авахдаа төрийн өмчийг луйвардсан гэх үндэслэлээр “Монголын зэс корпорац”-ийн удирдлагын түвшний хүмүүсийг АТГ болон ЭЦГ-ын хамтарсан ажлын хэсэг шалгасан. Энэ хүрээнд тухайн үед төрийн өндөр албан тушаал хашиж байсан нэр бүхий эрхмүүдийг татан шалгасан юм.

Нийт 160 гаруй хавтаст хэрэг бүхий уг асуудал Нийслэлийн прокурорын газраас яллах дүгнэлт үйлдэн өчигдөр /2020.04.07/Сүхбаатар дүүргийн Эрүүгийн хэргийн анхан шатны шүүхэд шилжүүлжээ. 

СЭРГЭЭН НИЙТЛЭВ: НИЙТЛЭГДЭЖ БАЙСАН ОГНОО 2019-09-10

Бид АТГ болон ЭЦГ-ын хамтарсан ажлын хэсгээс уг хэргийг хянан үзээд, Эрүүгийн хуулийн ерөнхий ба тусгай ангиар хэн хэнд хэдэн жилийн яллах дүгнэлт үйлдэхээр зүйлчилсэн талаарх өмнөх мэдээллээ сэргээн нийтэлж байна.

НЭГ: Ч.САЙХАНБИЛЭГ, Б.БОЛОР, Н.ЗОЛЖАРГАЛ, Д.ГАНБАТ НАРЫГ 2-8 ЖИЛЭЭР ЯЛЛАХААР ЗҮЙЛЧИЛЖЭЭ

Уг хэрэгт тухайн үеийн Ерөнхий сайд Ч.Сайханбилэг, Сангийн сайд Б.Болор, Монголбанкны Ерөнхийлөгч Н.Золжаргал, “Монголын төмөр зам” ТӨХК-ийн Гүйцэтгэх захирал Д.Ганбат, Аж үйлдвэрийн сайд Д.Эрдэнэбат нарыг туст тус татан шалгасан. Эдгээр хүмүүст 2019 оны дөрвөдүгээр сараас эхлэн Эрүүгийн хуулийн Ерөнхий ангийн 1.9-р зүйлийн 1 дэх хэсэг, Эрүүгийн хуулийн тусгай ангийн 22.1-р зүйлийн 2 дахь хэсэгт зааснаар яллах дүгнэлт үйлдсэн байна.

ХУУЛИЙН ЗҮЙЛЧЛЭЛИЙГ ЗАДАЛВАЛ:   

1.Үйлдэл, эс үйлдэхүйг гэмт хэрэгт тооцохгүй болсон, оногдуулах ялыг хөнгөрүүлсэн, гэмт хэрэг үйлдсэн этгээдийн эрх зүйн байдлыг дээрдүүлсэн хуулийг буцаан хэрэглэнэ.

Эрүүгийн хуулийн 22.1 дүгээр зүйл.Эрх мэдэл, албан тушаалын байдлаа урвуулан ашиглах

2.Нийтийн албан тушаалтан албан үүрэг, бүрэн эрх, албан тушаалын байдлаа урвуулан ашиглаж их хэмжээний хохирол учруулсан бол нийтийн албанд томилогдох эрхийг хоёр жилээс таван жил хүртэл хугацаагаар хасаж таван мянга дөрвөн зуун нэгжээс хорин долоон мянган нэгжтэй тэнцэх хэмжээний төгрөгөөр торгох, эсхүл нэг жилээс таван жил хүртэл хугацаагаар зорчих эрхийг хязгаарлах, эсхүл нэг жилээс таван жил хүртэл хугацаагаар хорих ял шийтгэнэ.

3.Энэ зүйлийн 1, 2 дахь хэсэгт заасан гэмт хэргийг улс төрд нөлөө бүхий этгээд үйлдсэн бол нийтийн албанд томилогдох эрхийг таван жилээс найман жил хүртэл хугацаагаар хасаж арван мянган нэгжээс дөчин мянган нэгжтэй тэнцэх хэмжээний төгрөгөөр торгох, эсхүл хоёр жилээс найман жил хүртэл хугацаагаар хорих ял шийтгэнэ.

УИХ-ЫН ГИШҮҮН Д.ЭРДЭНЭБАТЫН ЯЛЛАХ ДҮГНЭЛТИЙГ ХҮЧИНГҮЙ БОЛГОЖЭЭ

УИХ-ын гишүүн Д.Эрдэнэбатыг  уг хэрэгт холбогдуулан шалгаж, яллагдагчаар татагдан шалгагдаж байгаа талаар бид өмнө нь мэдээлж байв. Тэрбээр мэдээллийн дараа албан ёсоор хэвлэлд хандаж, яллагдагчаар татагдан шалгагдаж байгаа гэдгээ мэдэгдсэн байдаг.

Мөрдөн шалгалтын хүрээнд тухайн үед Аж үйлдвэрийн сайдаар ажиллаж байсан Д.Эрдэнэбатыг Эрүүгийн хуулийн Ерөнхий ангийн 1.9-р зүйлийн 1 дэх хэсэг, Эрүүгийн хуулийн тусгай ангийн 22.1-р зүйлийн 2 дахь хэсэгт зааснаар яллах дүгнэлт үйлдээд байсан аж.

Гэвч Нийслэлийн прокурорын газрын Ерөнхий прокурорын  үүрэг гүйцэтгэгч Ж.Ариунаа 2019.07.03-ны өдөр яллагдагчаар татсан шийдвэрийг хүчингүй болгосон байна. Ингэснээр Д.Эрдэнэбат гишүүн дээрх албан тушаалтнуудаас ганцаар яллах дүгнэлт үйлдүүлээгүй хоцорч байгаа аж.

ХОЁР: Д.ЭРДЭНЭБИЛЭГ, О.ОРХОН, М.МӨНХБААТАР, Ц.ПҮРЭВТҮВШИН, Э.ШИЖИР НАРЫГ 1-8 ЖИЛЭЭР ЯЛЛАХААР ЗҮЙЛЧИЛЖЭЭ

Бид  эхний хэсэгт “Эрдэнэт” үйлдвэрийн 49 хувийг ОХУ-ын талаас шилжүүлэн авахад төрийн өндөр албан тушаал хашиж байсан эрхмүүдэд ногдуулахаар зүйлчилсэн Эрүүгийн хэргийн ерөнхий болон тусгай ангиудыг мэдээлсэн. Энэ хэсэг “Монголын зэс корпорац”-д хамаарах  эрхмүүдийг яллагдагчаар татсан зүйл ангиудыг задлан хүргэж байна.

ХХБ-ны ТУЗ-ийн дарга Д.Эрдэнэбилэг, ХХБ-ны Гүйцэтгэх захирал О.Орхон, “Монголын зэс корпорац”-ийн ТУЗ-ийн дарга М.Мөнхбаатар, “Монголын зэс корпорац”-ийн Гүйцэтгэх захирал Ц.Түрэвтүвшин, “Кью Эс Си” ХХК-ийн захирал Э.Шижир нарыг Эрүүгийн хуулийн Ерөнхий анги дахь доорх заалтуудаар журамлан, тусгай зүйл ангиар яллагдагчаар татжээ.

ЯЛЛАГДАГЧААР ТАТСАН ЗҮЙЛЧЛЭЛҮҮД:

Ингэснээр, ХХБ-ны ТУЗ-ийн дарга Д.Эрдэнэбилэг, ХХБ-ны Гүйцэтгэх захирал О.Орхон, “Монголын зэс корпорац”-ийн Гүйцэтгэх захирал Ц.Түрэвтүвшин нарыг:

Эрүүгийн хуулийн 20.3 дугаар зүйл. Зохион байгуулалттай гэмт бүлэг байгуулах, түүнд элсэх

1.Гэмт хэрэг байнга үйлдэж ашиг олох зорилгоор урьдчилан нэгдсэн гурав, түүнээс олон хүнтэй тогтвортой бүлэг байгуулсан, бусдыг элсүүлсэн, татан оролцуулсан, галт зэвсэг, зэвсэг, тусгайлан бэлтгэсэн зэвсгийн чанартай зүйлээр хангасан, гэмт хэрэг үйлдэхээр төлөвлөсөн, бэлтгэсэн бол хоёр жилээс найман жил хүртэл хугацаагаар хорих ял шийтгэнэ.

Эрүүгийн хуулийн 22.1 дүгээр зүйл.Эрх мэдэл, албан тушаалын байдлаа урвуулан ашиглах

2.Нийтийн албан тушаалтан албан үүрэг, бүрэн эрх, албан тушаалын байдлаа урвуулан ашиглаж их хэмжээний хохирол учруулсан бол нийтийн албанд томилогдох эрхийг хоёр жилээс таван жил хүртэл хугацаагаар хасаж таван мянга дөрвөн зуун нэгжээс хорин долоон мянган нэгжтэй тэнцэх хэмжээний төгрөгөөр торгох, эсхүл нэг жилээс таван жил хүртэл хугацаагаар зорчих эрхийг хязгаарлах, эсхүл нэг жилээс таван жил хүртэл хугацаагаар хорих ял шийтгэнэ.

“Монголын зэс корпорац”-ийн ТУЗ-ийн дарга М.Мөнхбаатар, “Кью Эс Си” ХХК-ийн захирал Э.Шижир нарыг

Эрүүгийн хуулийн 18.6 дугаар зүйл. Мөнгө угаах

2.3.албан тушаалтан албаны чиг үүрэг, бүрэн эрх, нөлөөг урвуулан ашиглаж үйлдсэн бол нэг жилээс таван жил хүртэл хугацаагаар зорчих эрхийг хязгаарлах, эсхүл нэг жилээс таван жил хүртэл хугацаагаар хорих ял шийтгэнэ гэх зүйл ангиудаар тус тус яллагдагчаар татжээ.

Ж.МЯДАГБАДАМ

Энэ мэдээнд өгөх таны үнэлгээ

Хуваалцаарай Жиргээрэй