ФИБА 3х3 төрлийн энэ улирлын хамгийн сүүлийн дэлхийн гран при БНСУ-ын Жэжү хотод өнөөдөр боллоо. Тус тэмцээнд манай улсаас “Улаанбаатар ММС Энержи” багийнхан Монгол улсаа төлөөлөн оролцсон юм.
Манай баг хэсгийн шатанд АНУ-н “Нью-Иорк Харлем” багт хожигдсон ч дараагийн тоглолтдоо эзэн орны “Инжэ”-г хожиж хэсгээс хоёрдугаар байраар хасагдах шатанд шалгарсан. Улмаар шөвгийн наймд Европын хүчирхэг төлөөлөл, Сербийн “Земун”, хагас шигшээд ОХУ-н “Нева”-г хожиж аваргын төлөө шалгарсан.
Аваргын төлөөх тоглолтод Словений “Пиран” багийг 13:10 харьцаатай хожиж, түрүүллээ. Ингэснээр тэд дэлхийн гран прид Монголоос төдийгүй Ази тивээс анх удаа алтан медаль хүртсэн юм.
Тэмцээний хамгийн үнэ цэнэтэй тоглогч буюу MVP-гээр “Улаанбаатар ММС Энержи” багийн тоглогч, ОУХМ Даваасамбуугийн Дэлгэрням шалгарлаа.
Монголын баг тус тэмцээнд түрүүлснээр 15000 доллар буюу монгол мөнгөөр 40 орчим сая төгрөгөөр шагнуллаа. Мөн Саудын Арабын “их дуулга”-д оролцох эрхээ авав. Манай тамирчид энэ сарын 9-нд буюу ирэх лхагва гарагт эх орондоо ирнэ.
Б.БУЯНДАЛАЙ
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.