Бага хурлын боломж: Л.Оюун-Эрдэнэ өөрөө огцрохгүй бол ЕС-ын асуудал яригдахгүй, хамтарсан ЗГ-ыг л хөндөнө

Маргааш МАН-ын Бага хурал хуралдах боллоо. Энэ бол 369 гишүүний бүрэлдэхүүнтэй, намын Их хурлын дараа орох том бүтэц.

Ил байгаа мэдээллээр Ерөнхий сайдын холбогдоод байгаа асуудал, хамтарсан Засгийн газрыг задлах эсэхийг Бага хурлаар хэлэлцэнэ гэж байна.

Энэ шийдэлд хэрхэн хүрсэн тэр цэг ихээхэн эргэлзээ дагуулж, анхаарал татаж байгаа. Өчигдөр болсон МАН-ын бүлгийн хуралд гишүүдийн олонх “Хамтарсан ЗГ байгуулж, албан тушаал авчхаад Ерөнхий сайдыг огцруулах акцыг Ардчилсан нам хийгээд байна. Ингэн ингэн хамтарч засаг барих шаардлага байна уу” гэж асуудал дэвшүүлсэн гэгдэв. Нөгөө талаар Ерөнхийлөгч У.Хүрэлсүх ч хамтарсан ЗГ-ыг задал, дангаар засагла гэж шахсан тухай ч мэдээлэл хөвөрлөө.

Ямартай ч Л.Оюун-Эрдэнэ, Д.Амарбаясгалан нар хамтарсан Засгийн газраа хадгална, үргэлжлүүлнэ гэсэн байр суурьтай талаар яригдаж байгаа.

Хэн ч албан ёсоор, өөрийн амаар дуугараагүй тул тааж, таамаглах, сураг чимээ сонсохоос хэтрэхгүй хэмжээнд улс төр өрнөж байна.

Харин намын дүрмийг харвал өрнөл багагүй цэгцтэй болно.

Тухайлбал, намын Бага хурлыг намын дарга өөрийн санаачилгаар, эсвэл УЗ-ийн шийдвэрээр юм уу нийт гишүүдийн гуравны нэг шаардсанаар зарлан хуралдуулна. Одоогийн нөхцөлд Бага хурал хуралдуулах шийдвэр зөвхөн намын дарга Л.Оюун-Эрдэнийн хүсэл зориг гэдэг нь үүнээс харагдаж байна.

Гэтэл Бага хурал юу хэлэлцэх, ямар шийдвэр гаргах эрхтэй ба үүрэгтэй юм бэ.

Намын дүрмээс харвал “Намын бодлогын тодорхой асуудлаар намын хэмжээний хэлэлцүүлэг явуулах”, “Ерөнхий сайдаар томилуулах санал гаргах”, “Сонгуулийн үр дүнд эвслийн Засгийн газар байгуулах шаардлагатай болбол энэ талаар шийдвэр гаргах” зэргээс хэтрэхгүй. Угтаа улс төрийн томоохон шийдвэр Удирдах зөвлөл дээр гардаг.

Харин Л.Оюун-Эрдэнийн огцрох эсэх асуудал намын дүрмээрээ маш нарийн зохицуулалттай. Учир нь МАН-ын дарга өөрөө Ерөнхий сайд байна гэсэн заалт бий.  

Иймд Ерөнхий сайд огцорвол дагаад МАН-ын даргаас буух ёстой болно. Уялдаад, МАН шинэ даргаа сонгож, дараа нь тэр хүн Ерөнхий сайд болох учиртай.

Харин намын дарга суудлаасаа буух гурван боломж бий. Нэгт өөрийн хүсэлтээр. Хоёрт сонгуульд ялагдсан бол. Гуравт Их хурлаар олонх шийдсэн бол.

Ингээд харъя - МАН-ын Их хурал аравдугаар сард болж, бужигнана. Яаралтай хуралдуулъя гэвэл багадаа 45 хоногийн өмнө товлох ёстой. Түүнээс өмнө гэхээр, дээрх хүрээнд Л.Оюун-Эрдэнэ өөрийн хүсэлтээр огцрох боломж л үлдэж байна.  

Тэгэхээр МАН ерөөсөө даргаа ч, Ерөнхий сайдаа ч өөрчлөх процесс цаг хугацааны хувьд бүрэн дүүрэн болж өнгөрөх бололцоо тун хомс. Иймд Ерөнхий сайд огцорлоо гэхэд МАН шинэ даргаа Их хурлаар, албан ёсоор батламжлах хүртэл түр гүйцэтгэгч гарч ирэхээс аргагүй. МАН-ын даргыг түр орлон гүйцэтгэгч нь Я.Содбаатар буюу намын Ерөнхий нарийн бичгийн дарга байх заалт бас бий.

Гэхдээ Их хурал хүртэл Бага хурал шинэ даргаа гуравны хоёроос доошгүй гишүүний саналаар сонгож, түүнийг Ерөнхий сайдаар томилуулах санал гаргах эрхтэй юм байна.

Тэгэхээр Бага хурлаар,

• Аравдугаар сарын Их хурал хүртэлх хугацаанд ажиллах намын дарга болон Ерөнхий сайдын асуудлыг хэлэлцэж чадна
• Мөн хамтарсан Засгийн газрын асуудлаар тодорхой шийдвэр гаргах боломжтой.

Гэхдээ намын дарга, Ерөнхий сайдын асуудлыг хэлэлцэнэ ээ гэвэл ганцхан л шаардлага үүсэж байгаа нь дээрх бүгдээс ойлгогдож байна. Энэ бол Л.Оюун-Эрдэнэ өөрөө, өөрийн саналаар огцорсон нөхцөлд.

Тиймээс маргааш болох Бага хурлын өмнө юм уу хурал явагдаж байх үеэр Л.Оюун-Эрдэнэ огцрох эсэх тал дээр ямар нэг улс төрийн шийдвэр гаргахгүй гэвээс ерөөсөө л хамтарсан Засгийн газрын эрх ашиг энэ хурлаар хөндөгдөнө гэж уншигдаж байна.

Бага хурлыг Л.Оюун-Эрдэнэ өөрөө зарласнаас харахад түүний хүссэн сэдэв - хамтарсан Засгийн газрын асуудлыг хэлэлцэх магадлал илүү ба Д.Амарбаясгалан ч энэ тал дээр байр суурь нэг гэгдэж байгаа билээ.

М.ТЭНГИС

Энэ мэдээнд өгөх таны үнэлгээ

Хуваалцаарай Жиргээрэй