"Хуулиас давсан албан тушаалтнуудын шийддэг 1000 журмыг 180 хоногт хүчингүй болгоно"

Өнөөдөр /2025-12-17/ Засгийн газрын хуралдаанаас гарсан шийдвэрийг танилцуулж байна.

Энэ үеэр ХЗДХ-ийн сайд Б.Энхбаяр дараах мэдээллийг өглөө.

"Журмуудтай холбоотой асуудлын тогтоол гарлаа. Миний бие урьд сайдаар ажиллаж байхдаа буюу 2024 оны хавар журмын асуудлыг хөндөж байсан. Энэ журмуудын ард авлига, хүнд суртал, хүний эрхийн зөрчлүүд байна. Олон журмын цаана дур зорго байна гэдэг асуудлыг ярьж байсан. Ингээд журмуудыг цэгцлэх талаар Засгийн газрын хуралдаанаар ярьж байсан. Сая дахин бодлогын журмаар дэвшүүлж, тогтоол гаргахаар боллоо.

Нэг. УИХ хууль тогтооно, хууль тогтоох эрх мэдэл гагцхүү УИХ-д хадгалагдана. Үүнийг хэнтэй ч хуваалцахгүй гэх үндсэн зарчим байна.

Хоёр. Хүний үндсэн эрх хуульд заасан үндэслэлээр хязгаарлана гэж мөн л Үндсэн хуульд заасан.

Журамд заасан үндэслэлээр хязгаарлана гэж Үндсэн хуульд байхгүй. Тэгэхээр УИХ-аас баталсан хуульд заасан үндэслэлээр хүний Үндсэн эрхийг хязгаарлах Үндсэн хуультай бид.

Манай Улсад 437 хууль байна. Энэ хуульд 2403 журам батлах тухай заалт байна. Албан тушаалтнуудад ийм журам батлах эрхийг олгосон 2403 заалт байна гэсэн үг. ХЗДХЯ-д бүртгэлтэй 2357 журам бүртгэлтэй байна. Бүртгэлгүй 850 журам байна. Үүнээс 350 орчим нь Засгийн газрын баталсан журам байна. ХЗДХЯ өөрийн харьяалж буй дээд байгууллага Засгийн газрын баталсан журмыг хянах, бүртгэх эрх хэмжээ байдаггүй. Тийм учраас энэ журмууд бүртгэлгүй яваад буй юм. Сүүлийн таван жилд ихээр өссөн үзүүлэлттэй харагдаж байна. Урьд 1000 хүрэхгүй л журамтай байсан.

Ямар асуудлуудыг энэ журмуудаар зохицуулаад байгааг агуулгаар нь харвал,

• Хэм хэмжээ
• Төлбөр хураамж
• Тариф
• Норм дүрэм гэх мэт.

Эндээс хэд хэдэн дүгнэлт хийж болохоор байна. Бидний Үндсэн хуульчилсан зарчим нэгэнт гажуудаад эхэлчихсэн байна. Асуудлуудыг хуулиар бус хуулиас давсан Засгийн газар, сайд, агентлаг гэсэн гүйцэтгэх эрх мэдэл бүхий албан тушаалтнуудын шийдвэрээр манай Улс нийгмийн харилцаагаа зохицуулж байна. Аюул болж байна. Дур зоргоор авирлаж байна.

УИХ дээр батлагдаж байгаа хуулиуд ард түмний төлөөлөгчдийн шүүлтүүрээр орж, хууль тогтоомжийн хуулийн шаардлагыг тавьж, хэлэлцүүлэгт орж, олонх, сөрөг хүчнүүд мэтгэлцээд, завсарлага авах шаардлагатай гэвэл авч, зодолдвол зодолдоод тэр хэрээрээ иргэдэд мэдээлэл өгч, шүүлтүүрээр ордог. Гэтэл энэ журмууд тэгэхгүй байна. Албан тушаалтнуудын гарын үсгээр хэм хэмжээ тогтоогдож байна.

Монгол Улсын Ерөнхий сайдаас 1000 журмыг хүчингүй болгох ажлыг 180 хоногт зохион байгуулахыг даалгасан. Үүнийг ХЗДХ-ийн сайд миний бие ахална.

Мөн "Террил Атиензагийн хэргийг сэргээн шалгах эсэх дээр прокурорын байгууллага хариултаа өгөх ёстой. 14 жилийн өмнө мөрдөх байгууллага "Бусдыг амиа хорлоход хүргэх" зүйл ангиар хэрэг үүсгэснийг прокурор ХЭРЭГСЭХГҮЙ БОЛГОЖ шийдвэрлэсэн гэх мэдээлэлтэй байна" гэв.

Өөрийн сэтгэгдлээ илэрхийл

Share Tweet