Ж.Бямбадорж: УИХ-ын дарга намайг “өргөдлөө өг” гэж шахаж шаардаагүй

ХЭҮК-ын дарга Ж.Бямбадорж өнөөдөр /2020.04.14/ ажлаасаа чөлөөлөгдөх өргөдлөө УИХ-ын дарга Г.Занданшатарт өгсөн. Энэ дагуу Хууль зүйн байнгын хорооны хуралдаанаар Хүний эрхийн Үндэсний Комиссын даргыг үүрэгт ажлаас нь чөлөөлөх тухай асуудлыг хэлэлцэж дэмжлээ. Пүрэв гарагт УИХ-ын чуулганаар хэлэлцэх юм.

Түүнийг өргөдлөө өгөхөөс өмнө “Г.Загдаагийн асран хамгаалдаг иргэдийг гөлөг хэмээн хэлснээс үүдэж, УИХ-ын дарга Г.Занданшатар түүнийг ажлаа өгөхийг шаардсан” гэх мэдээлэл цацагдаж эхлээд байсан юм.

Иймээс бид Ж.Бямбадоржтой утсаар холбогдож цөөн асуултад хариулт авлаа.

-Үүрэгт ажлаасаа чөлөөлөгдөх өргөдлийг тань ХЗБХ хүлээж авсан уу?

-Тэглээ. Одоо пүрэв гарагт УИХ-ын чуулганаар хэлэлцэж чөлөөлөгдөнө.

-УИХ-ын дарга Г.Занданшатар таныг өргөдлөө өгөхийг шахаж шаардсан гэх мэдээлэл хэвлэлүүдээр нийтлэгдсэн. Үнэн үү?

-Үгүй, худлаа. Өргөдлөө өг гэж шахаж шаардсан зүйл байхгүй шүү.  

-Та өөрийн хүсэлтээр өргөдлөө өгсөн үү. Өргөдлөө өгөх болсон шалтгаан тань юу вэ?

-Тиймээ. Хуулиараа бол миний нас ажлаа хүлээлгэж өгөх нас болж байна. Энэ дагуу ажлаа өгч байна. Өөрөөр хэлбэл, Төрийн албаны тухай хуулийн 41 дүгээр зүйлийн 41.2 дахь хэсэг, Монгол Улсын Хүний эрхийн Үндэсний Комиссын тухай хуулийн 15 дугаар зүйлийн 15.1.3, 15.1.4-т заасныг үндэслэн Хүний эрхийн Үндэсний Комиссын шинэ гишүүнийг томилох боломж олгож байна. Хуулиа дээдлэхгүй бол болохгүй шүү дээ. Мөн эрүүл мэндийн шалтгаантай.

-Түүнчлэн Г.Загдаатай ярьсан утасны бичлэг задарснаас болсон гэх ойлголт ч үүсчих шиг боллоо?

-Тийм биш ээ. Үүргээ биелүүлээд л хугацаандаа ажлаа хүлээлгэн өгч байна. Ийм зүйлээс болж өргөдлөө өгч байна гэвэл төрийн албанд яаж тэсэх юм бэ.

Өөрийн сэтгэгдлээ илэрхийл

Share Tweet