“Монголын олимп”-ийг БЗД, Чингэлтэй, Хэнтий аймаг тэргүүллээ
“Монголын олимп” гэгддэг Бүх ард түмний спортын XV наадмын шигшээ тэмцээн спортын 26 төрлөөр явагдаж, өчигдөр (9.18) өндөрлөлөө.
Дөрвөн жилд нэг удаа болдог МБАТС-ад 21 аймаг, есөн дүүргээс шалгарсан 4570 орчим тамирчин 561 багц медалийн төлөө өрсөлдөхөд багийн нэгдсэн дүнгээр Баянзүрх дүүрэг 101 медаль (49 алт, 31 мөнгө, 21 хүрэл) хүртсэн амжилтаар тэргүүллээ.
Чингэлтэй дүүрэг 57 медаль (25 алт, 13 мөнгө, 19 хүрэл), гуравдугаар байрт Хэнтий аймаг 49 медаль (23 алт, 18 мөнгө, 8 хүрэл) авсанаар эхний гурван байрт оржээ.
Аймаг, дүүргээр нь дүгнэвэл, аймгуудаас Хэнтий аймаг түүхэндээ анх удаа тэргүүлсэн бол дүүргүүдээс Баянзүрх дүүрэг 49 алтан медальтайгаар хол тасархай түрүүллээ.
Энэ удаагийн наадмын анхан шатны тэмцээн гуравдугаар сараас гурван үе шаттайгаар орон даяар өрнөсөн бол шигшээ тэмцээн есдүгээр сарын 9-нөөс эхлэн спортын 26 төрөл (олимпын 18, оюун ухааны хоёр, хөгжлийн бэрхшээлтэй иргэдийн зургаа)-д болсон юм. Тус наадмын хаалтын ёслол өнөөдөр Спортын төв ордонд 16:00 цагт болно.
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.