БНХАУ-тай боловсролын салбарт хамтран ажиллах гэрээний хүрээнд байгуулсан Күнзийн институтүүдийг хаах асуудал сүүлийн үед Британийн эрх баригчдын дунд идэвхтэй яригдаж байна. Тодруулбал, Британи даяар 30 салбартай, хятад хэлний сургалт, судалгаа, сурталчилгааны институтийг хааж, оронд нь Тайваниас ижил төрлийн үйл ажиллагаа явуулдаг байгууллага оруулж ирэх хувилбарыг авч үзэж байгаа аж. Энэ нь тус улс цаашид их дээд сургуулийн хятад хэлний боловсролоо БНХАУ-аас бус, Тайваниас авна гэсэн үг юм.
Британи улс Күнзийн институтуудыг хааж, оронд нь Тайваниас багш нар урих сонирхолтой байгаа гэх энэ мэдээллийг “Тайпей таймс” сонин нийтэлжээ. Үүнийг Британи-БНХАУ-ын харилцааны зөрчил ийм байдлаар илэрч байна гэж дүгнэж болох юм байна.
Британи улс Күнзийн академиудыг нээх төслийг БНХАУ-тай боловсролын салбарын хамтын ажиллагааны хүрээнд, иргэдийнхээ хятад хэлний боловсролыг дээшлүүлэх зорилгоор 2014 онд эхлүүлж байсан юм. Одоогийн Ерөнхий сайд Лиз Трасс тухайн үед Боловсролын сайдаар ажиллаж байсан бөгөөд төслийн ач холбогдлыг ихэд үнэлж, “Мандарын хэлний хүчирхэг бүтцийг бий болгоно” хэмээн амалж байжээ.
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.