Ливанаас дүрвэж гарсан 100 гаруй иргэдийг ачсан завь Газар дундын тэнгист, Сирийн эргийн ойролцоо живж, 34 хүн амиа алджээ. Энэ нь цогцсыг нь олж баталгаажуулсан тоо бөгөөд цаана нь живж сураггүй болсон хүмүүс байгаа тул 34-өөс нэмэгдэх нь тодорхой аж.
Амь гарсан 20 хүнийг Тартус дахь эмнэлэгт хүргэжээ. “Аль Жазира” агентлаг энэ талаар мэдээллээ. Сирийн Тээврийн яамны цахим хуудаст мэдээлснээр, завь өнгөрсөн мягмар гарагт Ливаны Минье мужаас тэнгист гарсан, 120-150 хүн сууж явсан гэнэ.
Сирийн Баамтын захиргааны захирал Самер Кубруслигийн хэлснээр, салхи шуурга ихтэй, цаг агаарын нөхцөл байдал хүнд байгаа ч эрэн хайх, аврах ажиллагааг үргэлжлүүлж байгаа аж.
Ливанд эдийн засгийн хямрал болсноос хойш иргэд нь Газар дундын тэнгисээр дамжин Европ руу гарахыг оролдох болсон юм. Тус улсад ажлын байр хомсдож, мөнгөн тэмдэгт фунтынх нь ханш 90 хувиар унажээ.
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.