Сонгуулийн өмнө "жирийн"-д хувирч зүдэгсэд

П.Цэрэнпунцаг гишүүн онгоц хөлөглөж, С.Бямбацогт сайд мотоцикл унаж, Х.Булгантуяа сайд скүүтер жийв. Сонгуулийн өмнө ёстой л жирийн иргэдийнхээ дунд бууж, "жирийн"-д хувирч үзүүлэх гэж үйлээ үзэж байна.

П.Цэрэнпунцаг гишүүн "Өөрийн хөрөнгө мөнгөөрөө явж байна" гэх агуулгаар аархсан. Харин С.Бямбацогт сайд "Зургаадугаар ангид байхдаа мотоцикл хулгайлж унадаг байснаа дурсан энгийшив. Х.Булгантуяа сайд "УИХ-ын гишүүн ч скүүтер унах эрхгүй юм уу" хэмээн гоморхлоо.

Дөрвөн жил чимээ имээгүй сууж, бараагаа ч харуулдаггүй. Өрхийн төсөв нь хаанаа ч хүрэхгүй, таллаж авсан талх, граммлаж авсан ногоогоо өрийн дэвтэрт тэмдэглүүлж байхад тоодоггүй. Харин сонгуулийн жилийн сүүлийн хоёр сар дүрээ хувиргаж, царайгаараа мишээх аядаж, амьдрал дунд ороод ирдэг. Зав л гарвал “гурил, будаа” бариад тойрог руугаа гүйлдэцгээдэг. 

Энэ жил "Намайг сонгоорой" гэхээсээ илүү эгэл хүний дүрд хувирцгаах тактикийг ашиглах болжээ, тэд. Нэмээд малчдад хайртай, амьдралыг нь хамгийн сайн ойлгоцгоодог хүмүүс болж хувирцгаана. Сонгуульд бэлдээд завгүй байхад ард түмний амьдрал улам уруудсаар байна. 

У.УЯН

Энэ мэдээнд өгөх таны үнэлгээ

Хуваалцаарай Жиргээрэй