ТАНИЛЦ: Тойрогтоо өндөр зардал суулгасан сайд, гишүүд ТӨСӨВ ТОДОТГОХ ДУРГҮЙ БАЙНА

Коронавирусийн халдвар дэлхий дахинаа цар тахал болоод байгаа энэ үед эдийн засаг элгээрээ мөлхөхөөс наагуурхан ирээд байна. Олон хоногийн  хөл хорионоос үүдэж гэртээ ажилгүй суусан иргэд, хаалгаа түр барьсан албан байгууллагын нөхцөл байдал улам хүндрэх нь. Иймд төсвөө нэн даруй тодотгох шаардлагатай гэдгийг эдийн засагчид хэлсээр, сануулсаар. Эдийн засагчид 2020 оны улсын төсвийг үлэмж хэмжээний алдагдалтай, сонгуулийн солонгорсон төсөв болсон хэмээн дүгнэсэн. Гэтэл төсөв тодотгохгүйгээр энэ бүхнийг даван туулна гэж хэдэн хүн том дуугарсаар, өөдрөгөөр төсөөлсөөр.Тэдний халаас зузаан байж болох. Өөрсдөө хямрал мэдрэхгүй байгаа болохоороо тойргоо усалсан мөнгөө тас дарж хэвтэх гэж хичээх нь ойлгомжтой.

Төсөв тодотгох ажлаа хоорондоо шидэлцсээр, хамгийн сүүлд УИХ-ын дарга Г.Занданшатар “Төсөв тодотгох эрхийг Засгийн газарт олгохоор болсон” гэж мэдэгдсэн билээ. Тэгвэл Засгийн газарт төсөв тодотгох дуртай хэр олон хүн байгаа бол. Ямар ч л байсан Сангийн сайд Ч.Хүрэлбаатар, Ерөнхий сайд У.Хүрэлсүх нар төсөв тодотгох шаардлагагүй гэж “загнасан”.

Тэгвэл төсөв тодотгох ДУРГҮЙ хүмүүс хэн, хэн бэ.  Үүнд мэдээж тойрогтоо өндөр төсөв батлуулсан хүмүүс багтана. Хэнтийн хоёр буюу У.Хүрэлсүх, Л.Оюун-Эрдэнэ, Увсын хоёр буюу Ч.Хүрэлбаатар, Б.Чойжилсүрэн, Архангайн Ё.Баатарбилэг, Ховдын С.Бямбацогт гэсэн хүмүүсийн нэрс тэргүүлж буй юм.

НЭГДҮГЭЭРТ: Хэнтийн хоёр буюу У.Хүрэлсүх, Л.Оюун-Эрдэнэ нар аймагтаа хамгийн ӨНДӨР төсөв тусгасан

Аймгуудад тавьсан хөрөнгө оруулалтаар Ерөнхий сайд У.Хүрэлсүх болон Засгийн газрын хэрэг, эрхлэх газрын дарга Л.Оюун-Эрдэнэ нарын нутаг Хэнтий аймагт хамгийн өндөр буюу нийт хэрэгжүүлэх 94 төсөлд 131 тэрбум төгрөгийг төсөвлөжээ. Энэ нь төсвийн мөнгөөр хийх нийт хөрөнгө оруулалтын 17.6 хувь буюу асар өндөр хөрөнгө оруулалт.

Тэгэхээр Хэнтий аймаг бусад аймгаас нэг дахин заримаас нь 10 дахин их төсвийг суулгуулсан. Тэд төсөв дээр үнэн том байж чадсан. Харамсалтай нь хуваарилсан их мөнгө эхнээсээ хэнд ч хэрэггүй шавран барилга болон царцаж эхлээд байгаа билээ. Иргэдийн татварын мөнгөний 16 гаруй хувь нь цементээр цутгасан Чингис, Боорчийн хөшөө болов.

Ерөнхий сайд, ЗГХЭГ-ын дарга нар Хэнтийд нэр дэвшихтэй холбогдуулан “замаа зассаны” илрэл доорх жишээнээс тодорхой харагдана. Тухайлбал, Хэнтий аймгийн Бэрх тосгонд суулгасан 27.8 тэрбум Дорнод аймгаас давж байх жишээтэй байна. Түүнчлэн Дундговь аймагт ердөө 1,9 тэрбум төгрөг ногдуулсан гэхээр томчууд тойргоо хэтэрхий ихээр усалсны илрэл харагдана.

ХОЁРДУГААРТ: Ховдоос төсөв концесс хамдаг тодотголтой С.Бямбацогт гишүүн бий

Хэнтий аймгийн дараа Ховд аймгийн 48 төслийг 48 тэрбум төгрөгөөр санхүүжүүлэхээр төсөвлөсөн. Хэнтийгээс бусад аймгуудад хэрэгжих төслийг нийт 48-1 тэрбум төгрөгийн хороонд санхүүжүүлэхээр болсон байна. Улсын төсөв, концесс хамдагаараа алдартай С.Бямбацогт гишүүн энэ удаа тойрог услалтандаа сайн анхаарч чаджээ.

ГУРАВДУГААРТ: Увсын хоёр буюу Ч.Хүрэлбаатар, Б.Чойжилсүрэн нар аймагтаа жил бүр өндөр төсөв суулгадаг

Сангийн сайд ч тойрогтоо ихэд анхаарчээ. Увс аймагт төсвийн нийт хөрөнгө оруулалтын 6.1 хувь ногдож байна. Эл аймагт 65 төсөлд 45 тэрбум төгрөг төсөвлөсөн. Увс аймагт хаягласан тэр их мөнгө батлагдахад мөн л асуудал байгаагүй. Улсын Сангийн сайд нь Ч.Хүрэлбаатар, Төсвийн байнгын хорооны дарга Б.Чойжилсүрэн Увсынх болохоор ногоон гэрлээр батлагдсан.

ДӨРӨВДҮГЭЭРТ: Аймгийнхаа оюутнуудад зориулсан дотуур байрыг нийслэлд анх удаа барих гэж буй Ё.Баатарбилэг сайд

Архангай аймагт төсвийн мөнгөний 6.3 хувь нь хуваарилагдаж Ховдын дараа гуравдугаарт орж байгаа. Нийт 47 төсөл хэрэгжүүлэхээр 46 тэрбум төгрөг төсөвлөгдсөн. Боловсрол, соёл, шинжлэх ухаан, спортын сайд Ё.Баатарбилэгийн төсвийн багцад Архангай аймгийн Батцэнгэл, Өлзийт, Өгийнуур, Хашаат, Хотонт, Хайрхан, Цэцэрлэг, Эрдэнэмандал гэсэн НАЙМАН сумын оюутнуудын дотуур байрыг нийслэлд барихад ЗУРГААН  тэрбум төгрөг төсөвлөсөн. Ерөнхийдөө анх удаа нийслэлд аймгийн оюутнуудад тусгайлан дотуур байр барихаар гайхагдаж байгаа.

Дүгнэхэд Ерөнхий сайд, Сангийн сайд хоёр төсвийн мөнгөөр хийх хөрөнгө оруулалтын бараг дөрөвний нэгийг өөрсдийнхөө тойрогт буюу Увс, Хэнтий аймагт хуваарилчхаж. Тэд аймагт орон нутагтаа хайртайдаа ийм их мөнгө төсөвлөж, бүтээн байгуулалт хийсэн дүр эсгэж байгаа ч юм биш. Сонгуулийн жил тойрогтоо сайхан харагдах гэсэн хэлбэр. Монголын бүх төсвийг Увс, Хэнтийчүүд мэдээд байгаа юм. Энэ бол татварын төлөгчдийн мөнгийг эрх баригчид гарын салаагаараа урсгаж, сонгуулийн жилийн төсөв баталж, тойргоо “усалж”, иргэдийн саналыг ямар ч хамаагүй аргаар худалдаж авах гэсэн үйлдэл гэж дүгнэж болохоор байна.

Өмнөх жилийн төсвийг ч УИХ-ын гишүүн, Сангийн сайд Ч.Хүрэлбаатар /Увс аймаг/, УИХ-ын гишүүн, Төсвийн байнгын хорооны дарга Б.Чойжилсүрэн /Увс аймаг/, УИХ-ын гишүүн Л.Оюун-Эрдэнэ /Хэнтий аймаг/, УИХ-ын дэд дарга Л.Энх-Амгалан /Хөвсгөл аймаг/, УИХ-ын гишүүн С.Бямбацогт /Ховд аймаг/ гэсэн хүмүүс л хуваарилж авч билээ.

Өөрийн сэтгэгдлээ илэрхийл

Share Tweet