УИХ-ын гишүүний сэнтийд горилогч “НЯЛХ СЭНГҮМ”-ҮҮД

УИХ-ын сонгууль хаяанд ирчихсэн энэ өдрүүдэд зарим нь унтахаа умартан уяа сойлгоо тааруулан суугаа. Улстөр гэдэг нь өдгөө хэн хүний орохыг хүсдэг, хэн хүний хийж чадах мэт зүйлийн нэг болтлоо уруудан доройтжээ. Өнөөдрийн нийгэмд тэмцэгчийн дүрээр улстөрд орох гэсэн БАЛАЙРАГЧДЫН бүхэл бүтэн АРМИ бий болчихож. Тиймээс бид энэ удаад эл армийн төлөөллүүдийг танилцуулж байна. Тэд нас зүсээрээ олон нийтэд амжилттай танигдсан ч, төр жолоодох бодлого, боловсрол, хувь төлөвшлөөрөө харин НЯЛХ СЭНГҮМ-ийн хэмжээнд байдаг нь гарцаагүй үнэн. Тэмцэгч, өглөгч, шударга журам яригчаар тодрон гарч ирэгсдийн эцсийн зорилго УИХ-д суух билээ.

-МАН-ЫН БЯЛУУНААС ТОМХОН ХҮРТЭГЧ, СЭЛЭНГИЙН ТОЙРГОО СЭМХЭН УСЛАГЧ-

“УБТЗ” ХХН-ийн Ерөнхий хорооны орлогч дарга Б.Цогтгэрэл:  

Эл армийг Б.Цогтгэрэл буюу “Шилэн” Цогоо тэргүүлж байна. Ардчилсан намыг засаг барьж байх үед төрийн дансыг шилэн болгох санал гаргаснаараа олон нийтэд танигдаад буй. 2016 оны сонгуулиар МАН-ын  албан тушаалын бялуунаас томхон хүртсэн “Шилэн” Цогоо дэд сайдын суудлаасаа буусны дараа “УБТЗ” ХХН-ийн Монголын талын төлөөллөөр очсон. Энэ удаагийн сонгуульд ч томхон үзэхээр зэхэж сууна. Тэрээр 2020 оны УИХ-ын сонгуульд Сэлэнгэ аймгийн 13 дугаар тойрогт гурван мандатын төлөө ширүүхэн тулаанд орох хүний нэг. МАН-аас УИХ-ын гишүүн Н.Оюундарь, Ж.Эрдэнэбат, “Сөүл” группийн эзэн Д.Өнөрболор нартай үзэх таамаг хэвлэлүүдээр хөвөрсөн. ЗТХЯ-ны дэд сайд асан Б.Цогтгэрэлийн хувьд сэм сэмхэн Сэлэнгийн тойргоо эргэж, үсчний үнэгүй үйлчилгээг хүртэл үзүүлээд амжсан нэгэн. 30-хан насандаа “820 сая төгрөгийн хоёр байртай, 2015 онд Лексус-470, Леуксус RX-400 автомашинтай” гэж ХОМ-тээ мэдүүлж явсан. Саяхан гэхэд л алтан рамтай нүдний шил, алтан товчтой дээл бүхий селфи зураг нь дуулиан дагуулсан билээ.

-БУРУУ ЦАГТ БУРУУ ТАКТИКААР УЛСТӨР ХИЙЖ АРДЧИЛАГЧ-

“Ардчилсан нам”-ын Нарийн бичгийн дарга О.Магнай:

Айсуй сонгуулийн чимээнээр О.Магнай Сонгинохайрханчуудад хайр зарлаад эхэлчихсэн явна. Тэрээр энэ удаад тус дүүргээс нэр дэвших санаархал өвөртөлж яваа. АН-ын нарийн бичгийн дарга О.Магнайгийн хувьд олон жил жагсаал, цуглаан хийж, тэмцсээр улс төрд орж ирсэн. “ШӨХТГ”-ын даргаар  ажиллаж байхдаа бизнес эрхлэгчид болон хэрэглэгчдийн эрх ашгийг хамгаалах үүрэгтэй байгууллагыг жинхэнэ утгаар ажиллуулж байсан нь яах аргагүй үнэн. Харин тус байгууллагаас явснаас хойш олны нүднээс далдуур, АН-ын хөшигний ардуур явах болсон юм. Одоо сонгууль дөхөөд хөшгөө яран гарч ирж, хэвлэлүүдэд идэвхтэй ярилцлага өгч эхлэв. Энэ удаад тэр харин улстөрд “буруу” хашгичсаар орж ирэх нь. Эдийн засаг элгээрээ хэвтэж, үндэсний үйлдвэрүүд, ААН-үүд хаалгаа барьж байгаа энэ үед иргэн бүрт 1.2 сая төгрөгийг тараахыг шаардав. Төрд мөнгө байхгүй, тийм боломжгүйг тэр сайн мэдэж байгаа. Гэвч сонгуулийн өмнө олон нийтэд таалагдах л юм байвал юу ч ярьсан яахав гэдэг үзлээр хандаж буй. Ийн худлаа ярьж буй хандлага нь түүнийг улс төрд орж ирэх болоогүй гэдгийг нь харуулах шиг болов.

-УТААГААР УЛСТӨР ХИЙЖ ЯВААД АЛБАН ТУШААЛЫН ШАГНАЛААР АМАА ҮДҮҮЛЭГЧ-

“Утааны эсрэг ээж, аавууд” ТТБ-ын тэргүүн Ц.Пүрэвхүү:

“Утаа”-ны гэгдэж олноо танигдсан Ц.Пүрэвхүү өдгөө “Тавантолгой”-н Ц.Пүрэвхүү гэгдэх болжээ. Энэ эмэгтэй өнөөдрийн нийгэмд шударга тэмцэгчийн дүр бүтээж яваа нэгэн.  “Утааны эсрэг ээж, аавууд” гэх ТББ нь 2017 оноос гарч ирэн, жагсаал цуглаан зохион байгуулж эхэлсэн. Эл байгууллагыг Ц.Пүрэвхүү гэх сэтгүүлч эмэгтэй санаачлан эцэг, эхчүүдийн дуу хоолойг нийтэд хүргэхээр байгуулсан байдаг. 2017, 2018 онуудад идэвхтэй хашгирав.

Харин өнгөрөгч өвөл “Утаа”-ны талаар байтугай “Угаартаж” нас барсан  иргэдийн талаар ган хийсэнгүй. Учир нь тэрээр “Таван толгой түлш” ХХК-ийн Төлөөлөн удирдах зөвлөлийн гишүүн болчихсон тууж яваа. Утаагаар улстөр хийдэг жишгийг дагаж, тус байгууллагад ороод хэвлэлийн чиглэлийг нь атгаж суугаа. Бас нилээдгүй мөнгөөр амаа үдүүлсэн гэж олон нийт харддаг билээ. Саяхнаас харин талбайн урд талын хонхтой цэцэрлэгт хүрээлэнг нураалгахгүй гэж хашгичсаар дахин гарч ирсэн юм.

-НЭГ ГАРААРАА ХУВИЙН МӨНГӨНИЙ АВДАРАА ТҮШИЖ, НӨГӨӨ ГАРААРАА ТӨР АТГАЛЦАХЫГ ХҮСЭГЧ-

“Нэткапитал” ББСБ-ийн үүсгэн байгуулагч, ТУЗ-ийн дарга Д.Сүндий:

Энэ залуу саяхныг болтол “Фейсбүүк” компанийг мөнгөөр нүдэж, “бүүст” хийсэн мэдээ ярилцлагаараа олон нийтэд ёстой нэг таалагдах шиг болж байв. “Нэткапитал” ББСБ-ын үүсгэн байгуулагч Д.Сүндий энд тэндхийн хэвлэл мэдээллийн хэрэгслүүдэд төлбөртэй ярилцлага өгч, цэцэн мэргэн сургаал айлдаж, анхнаасаа ашигтай ажиллаж баяжсан түүхээ хуваалцаж суув. Удахгүй болох УИХ-ын сонгуульд уяа сойлгоо тааруулж л тэр шүү дээ. аль 2018 оноос сонгуулийн бэлтгэл ажилдаа идэвхийлэн орсон. Сүндий сангаараа дамжуулан уут, цүнх, дэвтэр, ном тарааж ирсэн билээ. Гэвч энэ бүх хичээл зүтгэл сүүлийн гурав хоногийн дотор хумхын тоос болон замхарсан юм. Учир нь түүний эхнэрээ зодсон гэх баримтууд цахим орчинд дэлгэгдэж багагүй дуулиан дэгдээгээд байна. Эл хэргээрээ хуулийн байгууллагад шалгагдаж байгаа нь ч үнэн аж.

ББСБ- аараа дамжуулан иргэдийн мөнгийг хүүлдэг. Хэний мөнгийг хүүлчихээд хэнд цүнх, уут өгч хуурдаг вэ. Нэг гараараа хувийн мөнгөнийхөө авдрыг түшиж, нөгөө гараараа төр атгалцахыг хүсэгч улстөрд хамгийн хэрэггүй нэгэн билээ л.

-ТОМ СЭДЭВ ЯРЬЖ, ТҮМЭНД ТААЛАГДАГЧ-

“Бид уучлахгүй” хөдөлгөөний зохицуулагч Б.Мөнхцэлмэг:

Улстөрд орох хүсэлтэй залуус нийгмийн томхон сэдвийг шүүрч авч хашгичдаг. Ингэх нь олон нийтэд танигдахад хялбар, бас өөрийгөө шударга үнэний дуу хоолой гээд итгэхэд ч ойрхон байдаг. Ийм залуусын нэг бол Бид уучлахгүй хөдөлгөөний зохицуулагч гэгдэх Б.Мөнхцэлмэг юм. Тэр анх УИХ-ын гишүүдийн ЖДҮХС-ийн хулгай дэлгэгдэх үеэр гарч ирж байв. ЖДҮҮЧДИЙГ уучлахгүй гэж орилж тэмцсээр гарч ирсэн. Улмаар цахим орчинд лайв хийж, түүгээрээ УИХ-ын гишүүн Б.Унлармаа, Б.Батзориг нарыг нүдэж олноо таалагдаж танигдах болсон юм. Дараа нь түүний ярих, орох сэдэв улам өргөссөн. Үндэслэлгүй хөрөнгөжсөн гэх гурван гишүүнийг АТГ, УИХ-ын Ёсзүйн дэд хороонд өгсөн ч амжилт олоогүй. Одоо бол ХЗДХ-ийн яамтай дайн зарлаж хууль хяналтын байгууллагад шалгуулж яваа. Хаана том сэдэв байна, тэнд Б.Мөнхцэлмэг байна.

Өөрийн сэтгэгдлээ илэрхийл

Share Tweet