Ц.Нямдорж: Г.Занданшатар аа, УИХ-ыг тараавал би та нарын эсрэг ажиллана шүү

Ц.НЯМДОРЖ: АРД ТҮМЭН МИНИЙ ҮГИЙГ СОНСДОГ ЮМ ШҮҮ

Ард нийтийн санал асуулгатай зэрэгцүүлэн, УИХ-ын ээлжит бус сонгуулийг зохион байгуулах асуудлаар эрх баригч намынхан гарын үсэг цуглуулсан. Гэвч Ард нийтийн санал асуулгад Ерөнхийлөгч хориг тавьж, УИХ хугацаанаасаа өмнө тарах нь хэт эрсдэлтэй талаарх шүүмжлэл хөвөрч эхэлсэн билээ. Үүнээс үүдэн, гарын үсэг зурсан гишүүд “буцаж”, албан бус байдлаар цагаан цаасан дээр зурж үзсэн гэж “гөвцгөөж” буй.

Эрх баригч намынхан энэ эргэж буцсан байдалдаа шийдэл олохоор өчигдөр бүлгийн хурал зарлав. Өмнөх өдөр нь 40 орчим гишүүн бүлгийн хуралдаа ирэх боломжтой гэж мэдэгдсэн ч 2-3 цаг хүлээлгэж байж, 20 гишүүн л цуглаж чадсан юм.

Бүлгийн хуралд МАН-ын ЕНБД Д.Амарбаясгалан оролцож, “Намын удирдлага болоод генсекийн зүгээс ээлжит бус сонгууль зохион байгуулахыг дэмжиж байгаа” гэж мэдэгджээ.

Гэвч түүний улс төрийн асуудлаарх ерөнхий танилцуулгыг гишүүд төдийлөн хүлээж аваагүй байна. Улмаар Ц.Нямдорж гишүүн “Г.Занданшатар аа, энэ УИХ-ыг тараавал би та нарын эсрэг ажиллана шүү. Ард түмэн миний үгийг сонсоно. Чи хэт хүний үгээр явж, энэ парламентыг самарч гүйцлээ”  гэхчлэн тачигнасан байна.

Тэрбээр “ Чи 20 гишүүн суулгачихаад ямар бүлгийн хурал хийлгэдэг юм. Энэ хүмүүсээ тараа. УИХ тараана гэдэг байж болохгүй асуудал. Би их тэвчиж байгаа шүү” гэж бухимдлаа илэрхийлсэн аж.  Мөн Л.Элдэв-Очир гишүүн “Манай удирдлагууд хэт бусдын үгэнд автаж байна. Ийм олуулаа парламентад суучихаад ганц хүний улс төрд ороод сөхрөөд байж болохгүй” гэх санааг ч илэрхийлээд амжжээ.

ГАРЫН ҮСЭГ ЗУРСАН ГИШҮҮД БУЦАЖ, АСУУДЛААС АЙЖ ЭХЭЛЖЭЭ

Харин УИХ-ын ээлжит бус сонгууль явуулах асуудлаар цуглуулсан гарын үсгийн тухайд “51 хүрэх боломжгүй юм байна. Албан бус байдлаар зуруулж үзэхэд 30 гаруй гишүүн нэгдсэн” гэх мэдээллийг хэргийн эзэд нь өгчээ. Олон нийтийн сүлжээгээр гарын үсэг зурсан гишүүд рүү нэлээд довтолгоо ирсэн. Энэ үйл явцаас жийрхсэн  гишүүд “Бид зүгээр л цагаан цаасан дээр зурж үзэцгээсэн юм” гэхчлэн бултсан хариулт өгч байна.

Тэр ч байтугай гарын үсэг зурсан гишүүд  яг хэний бланкин дээр зурснаа ч мэдэхгүй байна гэхчлэн бөөрөнхийлж буй юм.  “Бид бараг л тоглоод зурж үзсэн юм” гэж хэлэх нь холгүй байгаа учраас ээлжит бус сонгууль явуулах тэдний төлөвлөгөө худлаа болж байгаа бололтой. Гарын үсэг зуруулах асуудлаар идэвхтэй ажилласан МАН-ын генсекД.Амарбаясгалан өчигдөр Ерөнхий сайд У.Хүрэлсүхийн өрөөнд нэлээд удаан саатсан гэх.

Уг нь тэд “Ирэх хавар болтол МАН-ын нэр хүнд улам унана. Эдийн засгийн байдал ч хүндрэх эрсдэлтэй. Тиймээс ээлжит бус сонгууль зохион байгуулвалМАН-аас арай олон суудал авах боломж нэмэгдэнэ” гэж анхлан дотооддоо ярилцсан гэх. Гэвч гишүүд нь олон нийтийн уур амьсгалаас айж, нөгөө талаар У.Хүрэлсүхийн танхимаас Ц.Нямдорж нам зөрсөн тул буулт хийх нөхцөл байдал үүсэв.

Үнэхээр ч Ц.Нямдорж УИХ-ыг тараахын эсрэг  эл дуугарч эхэлвэл МАН-ын нэр хүндэд халгаатай. Томоохон лидерүүдээ ч давхар ниргэчих үндэслэлтэй  тул тэд буулт хийхээр нөхцөл байдал үүсэв.

Ж.МЯДАГБАДАМ

Энэ мэдээнд өгөх таны үнэлгээ

Хуваалцаарай Жиргээрэй