Энэтхэг: Ариун цэврийн хэрэглэл үнэгүй өгөх талаар асуусан сурагч охин анхаарлын төвд орлоо
Энэтхэгийн Бихар мужид ЮНИСЕФ-ээс зохион байгуулсан семинарт оролцсон нэг охины асуултад төрийн албан хаагчийн өгсөн хариулт Энэтхэгт шуугиан тарьж байна. Охин дунд сургуулийн сурагч охидод төрөөс ариун цэврийн хэрэглэл үнэгүй тараах боломж байгаа эсэхийг асуусан юм байна.
Төрийн албан хаагч асуултад нь “Тэгэлгүй яах вэ, удахгүй төрөөс дотуур хувцас, гутал тэр бүү хэл бэлгэвч хүртэл үнэгүй өгнө гэж найдаж байна” гэж хариулжээ. Өөр эх сурвалжид "Бэлгэвч бас авах уу" гэсэн ч хэмээн бичжээ.
Сарын тэмдэг нь Энэтхэг улсын хувьд төвөгтэй асуудлын нэг байсаар буй бөгөөд ийм үед нь эмэгтэй хүнд тавих хориг ихтэй байдаг аж. Сарын тэмдэг ирсэн үед хэрэглэх ариун цэврийн хэрэглэл дутмаг байснаасаа болж тус улсад жил бүр 23 сая охин сургуулиа хаядаг ажээ.
Энэтхэгийн хамгийн ядуу мужуудын нэг болох Бихарт охид эмэгтэйчүүдийн 59 хувь нь л ариун цэврийн хэрэглэл ашигладаг гэсэн судалгаа байдаг юм байна.
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.