Тэрбумтны хүргэн, "Урвагч", “Могой" хочит Риши Сунак гэж хэн бэ

Британийн эрх баригч Консерватив нам өчигдөр /2022.10.24/ намын даргын сонгуулиа хийж, Пенни Мордонт өрсөлдөөнөөс татгалзсанаар Риши Сунак намын дарга, Ерөнхий сайд боллоо. Сүүлийн хагас жилд болсон Ерөнхий сайдын гурван сэлгээ тус улсын түүхэнд олон содон онцлогуудыг бий болгосон.

Eguur.mn та бүхэндээ энэ удаад Британийн шинэ Ерөнхий сайдын талаарх онцлох мэдээллийг хүргэж байна.

ХАМГИЙН ЗАЛУУ, АНХНЫ ӨНГӨТ АРЬСТ ЕРӨНХИЙ САЙД

Огцорсон Ерөнхий сайд Лиз Трасс 44 хоног засгийн эрх барьснаараа хамгийн богино хугацаанд эрх барьсан гэдгээрээ түүхэнд бичигдэж буй. Тэгвэл шинэ Ерөнхий сайд Риши Сунак юугаараа онцгойрох вэ. Тэрбээр Ерөнхий сайд болсноор анхдагчийн болзлыг хэд, хэдэн төрөл зүйлээр нэгэн зэрэг хангасан.

• Нэгдүгээрт, тэр сүүлийн 200 жилийн түүхэн дэх хамгийн залуу Ерөнхий сайд болсон. Тэрбээр энэ жил 42 настай. 1912 онд 42 настайдаа Ерөнхий сайд болж байсан Ливерпүүлийн лорд Риши Сунактай зэрэгцэнэ. 1783 онд 24 насандаа Засаг тэргүүлсэн “Бага” Питт харин давах аж.
• Хоёрдугаарт, тэрбээр энэ албан тушаалд очсон анхны энэтхэг гаралтай улстөрч. Эцэг, эхийн талын өвөг эцгүүд нь хоёул Британийн Энэтхэгийн хамгийн ядуу муж байсан Пенжабаас Британид ирсэн цагаачид. Тэд өнгөрсөн зууны эхээр эхлээд Зүүн Африкт очсон байдаг. Ришигийн эцэг Яшвир Кенид төрсөн бол эх Уша нь Танганьикт /тухайн үеийн нэрээр/ төрсөн бөгөөд, тэд Англид танилцжээ.

Риши 1980 онд төрсөн, 1998 онд Оксфордын их сургуулийг гүн ухаан, улс төр, эдийн засгийн чиглэлээр төгссөн байна. Төгсөөд “Голдман Сакс” банкинд ажиллаж байгаад Стэнфордод магистрын зэрэг хамгаалсан аж.

Улс төрийн замналаа 2015 онд Ричмонд тойргийн Парламентын сонгуульд ялж эхлүүлжээ. Өөрөөр хэлбэл, долоохон жилийн дотор Ерөнхий сайд болсон байна. Улмаар 2019 он сонгуульд Борис Жонсоныг дэмжиж, улмаар Ерөнхий сайд болсных нь дараа Сангийн дэд сайд болсон түүхтэй.

Тэрбээр өнгөрсөн долоодугаар сарын 5-нд албан тушаалаа өгч, улмаар улс төрийн хямралыг эхлүүлсэн тул Борис Жонсоны дэмжигчид Риши Сунакийг “Урвагч”, ”Могой” гэхчлэн нэрлэдэг байна.

ТЭРБУМТНЫ ХҮРГЭН

Риши Сунак Энэтхэгийн тэрбумтан, “Infosys” үндэстэн дамнасан корпорацийн эзэн Нараяна Муртигийн охин Акшате Муртитай гэрлэсэн. “The Sunday Times”-ын мэдээлснээр, 730 сая ам.долларын хөрөнгөтэй, Британийн баячуудын жагсаалтын 222 дугаарт бичигддэг байна. Үүнээс нь болоод түүнийг “Баян Риши” /1994 онд гарсан “Баян Ричи” киноны гол баатрын нэрээр/ гэж дууддаг ажээ.

Эхнэр нь татварын ноцгой нөхцөл эдэлж, олсон хөрөнгийн татварынхаа ихэнхийг хилийн чанад төлдөг болох нь илэрч шуугиан тарьж байсан.

НЭГД, ЭСВЭЛ ҮХ

Риши Сунак Лиз Трассын 44 хоног тэссэнээс ч хэцүү, хугацаа давчуу үед Ерөнхий сайдын албыг авч байгаа. Тиймээс олон юм бодолгүй татварын хатуу бодлого хэрэгжүүлэх замыг сонгоно гэдгээ анхны илтгэлээрээ хэлсэн. “Нэгд, эсвэл үх” гэсэн зарчим үйлчилнэ гэсэн. Тэрбээр цагтаа Лиз Трасс, Борис Жонсон нартай нэгдэж чадаагүй бол одоо нөгөө хоёр нь түүнийг бүрэн дэмжинэ гэдгээ илэрхийлж байна.

Энэ мэдээнд өгөх таны үнэлгээ

Хуваалцаарай Жиргээрэй