АНУ-Уэльс 1-1: Агуу Жорж Веагийн хүүгийн гоол, Уэльсийн 64 жилийн дараах оноо
ДАШТ-ий "В" хэсгийн хоёр дахь тоглолт АНУ-Уэльсийн багийн хооронд болж 1:1 тэнцлээ. Тоглолтын эхний гоолыг АНУ-ын түүхэн дэх хамгийн үнэтэй тоглогч /64 сая евро/ Пулишичийн дамжуулалтаар Веа оруулж, Уэльсийн домог Гарет Бэйл 11 м-ийн торгуулийн цохилтоор тэнцүүлэв. Энэ хоёр гоол хоёулаа онцлогтой байсныг өгүүлбэл, АНУ-ын шигшээ багийн довтлогч Веа нь 1995 оны Дэлхийн шилдэг хөлбөмбөгч, өдгөө Либери улсын Ерөнхийлөгчөөр ажиллаж буй Жорж Веагийн хүү юм. Агуу Жорж Веа ДАШТ-ий шигшээ тэмцээнд нэг ч оролцож үзээгүй бол хүү нь АНУ-ын шигшээд багтаж, улмаар гоол оруулан аавынхаа мөрөөдлийг биелүүлжээ.
Уэльсийн хувьд ч бүр ч их ач холбогдолтой түүхэн тоглолтууд ийнхүү эхэлж буй. ДАШТ-д оролцон шөвгийн наймд шалгарч, заналт өрсөлдөгч Английн шигшээд 42 жил хожигдож үзэлгүй "дарамталж" явсан гайхам түүх Уэльсийн хөлбөмбөгт бий. “Швед 1958” ДАШТ-д валличууд Швед, Унгар, Мексиктэй нэг хэсэгт орж гурвуулантай нь тэнцсэн. Улмаар нэмэлт тоглолтод Унгарыг буулган авч хасагдах шатанд үлдээд шөвгийн наймд Бразилтай ширүүн өрсөлдсөний эцэст 0:1-ээр дийлдсэн юм. Харамсалтай нь түүнээс хойш уналтад орж, дундчуудын эгнээнд таваргасаар 64 жилийн дараа ийнхүү ДАШТ-д орж, анхны оноогоо авч байгаа юм. Өөрөөр хэлбэл, Гарет Бэйлийн гоол Уэльсийн хувьд ДАШТ-д 64 жилийн дараа оруулж байгаа гоол аж.
АНУ – Уэльс 1:1 (1:0, 0:1)
"Ахмед бин Али" цэнгэлдэх
Гоол:
1:0 – 36 Веа, 1:1 – 82, пенальти Бэйл.
АНУ – Тернер, Дест (Йедлин, 74), Рим, Циммерман, Робинсон, Адамс, Маккенни (Ааронсон, 66), Муса (Акоста, 75), Пулишич, Веа (Моррис, 88), Сарджент (Райт, 74).
Уэльс – Хеннесси, Робертс, Дэвис, Родон, Мифем, Уильямс (Джонсон, 79), Ампаду (Моррелл, 90), Рэмзи, Уилсон (Томас, 90), Бэйл, Джеймс (Мур, 46).
Шар хуудас:
Дест (11), Маккенни (13), Бэйл (40), Мифем (45), Рим (51), Акоста (90).
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.