Бразилийн домогт хөлбөмбөгч, "Хөлбөмбөгийн хаан" гэж алдаршсан Эдсон Арантис ду Насименту буюу Пеле Сан Паулу хотын эмнэлэгт хэвтэн эмчлүүлж байна. Тэрбээр өнгөрсөн жил бүдүүн гэдэсний хорт хавдраа авахуулснаас хойш байнгын эмчилгээ хийлгэж байгаа бөгөөд химийн эмчилгээний үр дүнгээ үзүүлэхээр эмнэлэгт очсон юм байна.
Түүнийг эмнэлэгт хүргэгдэх үед зарим эх сурвалж биеийн байдал нь маш муу байгаа гэсэн мэдээллийг анх тарааж, түүнээс хойш хөлбөмбөгчийн эрүүл мэндэд санаа зовсон мэдээлэл орон нутгийн хэвлэлд гарсан аж.
Харин хөлбөмбөгчийн охин, АНУ-д амьдардаг Кели Насименту аавыгаа эмнэлэгт хэвтсэнийг баталсан ч амь нас нь аюулд орсныг үгүйсгэжээ. Сүүлд Альберт Эйнштейний нэрэмжит Сан Паулугийн нэрэмжит эмнэлгээс мөн мэдэгдэл хийж, хөлбөмбөгчийн биеийн байдал тогтвортой, амин чухал үзүүлэлтүүд бүгд хэвийн байгаа гэж мэдэгдсэн байна.
Пеле өөрөө ч олон нийтийн сүлжээгээрээ биеийн байдал нь сайн байгаа гэж мэдэгджээ.
Тэрбээр өнөөдрийг хүртэл олон нийтийн сүлжээг идэвхтэй ашигладаг хэвээр байгаа юм.
Хамгийн сүүлд аравдугаар сарын 23-нд, төрсөн өдрөөрөө олон нийтийн сүлжээнд орсон тэрбээр өнөөдөр "Санаа зовинол, хайр мэдрэгдэж байна. Би зүгээр талархал илэрхийлэх гэсэн юм. Амьдрал сайхан. 82 насандаа гэр бүлтэйгээ, эрүүл саруул байна гэдэг бурхны бэлэг. Хүртсэн бүхнийхээ төлөө талархая" гэж тэрбээр видео мэдэгдэлдээ өгүүлжээ.
Эдсон Арантис ду Насименту шигшээ багийнхаа хамт 1958, 1962, 1970 оны ДАШТ-д түрүүлсэн, дэлхийн аварга цолыг тоглогчийн хувиар хүртсэн цорын ганц хөлбөмбөгч бөгөөд улсынхаа шигшээд 92 тоглож 77 гоол оруулсан бүх цаг үеийн мэргэн бууч юм.
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.