Н.Энхбаяр: Таван толгойн ордыг би хөөцөлдөж төрд авсан, гэтэл захиран зарцуулах эрхийг нь будилуулсаар ийм болгочихлоо

Монгол улсын ерөнхийлөгч асан  Н.Энхбаяр цаг үеийн асуудлаар мэдээлэл өглөө. Тэрбээр дараах агуулгыг яриандаа хөндсөн юм.

Ерөнхийлөгч УИХ-ыг тараах санал гаргасан гэж би сонсоогүй, тийм санал гараагүй байх. Тогтолцоог бол харин хийгээсэй гэж бодож байна. Ард түмэн төвтэй нийгмийн харилцаа руу шилжиж, эрхзүйн чадамжтай засгийн газар байгуулаасай, парламентийг  хоёр танхимтай болгох нь зүйтэй. Хамгийн хүчтэй төрийн институт  бол парламент. Хянаж чадахааргүй хүчирхэг. Тийм учраас хоёр танхимтай байж хянадаг, хариуцлага хүлээдэг тогтолцоо байдаг. Тэгээд гарсан хууль нь үр дүнд хүрдэг тогтолцоо руу шилжээсэй.

Би ерөнхийлөгч байхдаа Таван толгойн нүүрсний ордыг ард түмний өмч байх ёстой гээд хөөцөлдөж  яваад төрд авсан. Гэвч цааш нь төрийн өмч, нийтийн өмч гэж будилуулаад ойлгомжгүй болгоод захиран зарцуулах асуудал нь эмх замбараагүй болсон. Ерөнхий сайд бууж, өгөхгүй гэсэнд баярлаж байна. Сая хальт  уулзаад, зөв гэдгийг хэллээ.  

Байгалийн баялагийг ард түмний өмч болгох хэрэгтэй. АНУ-ын Аляска муж 2022 онд иргэн бүр байгалийн баялагийн ногдол ашиг гэж 3300 доллар авсан, ийм л тогтолцоо руу орох ёстой.  Ерөнхий сайд их холыг харсан байна. Монголын баялаг  хэний ч оролцоогүй бий болсон. Нар, салхины оролцоотой байгалийн бүтээгдэхүүн,  хувь хүн оролцоогүй ийм баялаг ард түмний өмч гэсэн тогтолцоог үндсэн хуульд оруулж өгөх ёстой.

Б.БАЯРТ

Энэ мэдээнд өгөх таны үнэлгээ

Share Tweet