Наймаалцах санал ба намраас "сонгуульдаж" мэдэх мессеж

"ҮХНӨ хийгээд, УИХ-ын гишүүдийн тоог нэмчимхвэл холимог тогтолцоогоор ирэх намар сонгууль зохион байгуулж болно" гэх агуулгыг өчигдөр /2023.03.01/ Ерөнхий сайд бөгөөд МАН-ын дарга Л.Оюун-Эрдэнэ бусад намуудад хандан онцлов.

Энэ үгээрээ тэр "Ард нийтээр УИХ-ын гишүүдийн тоог нэмүүлэхийг дэмжүүлэхэд та нар гол ачааг үүр. Тэгвэл парламентад орж ирэх боломжийг чинь холимог тогтолцоогоор үүсгэж өгье. Хүсээд байгаа бол ирэх намар ч сонгуулиа явуулж болно" гэх наймаалцах логик санал илэрхийлсэн нь энэ.

Тийм саналыг хүлээн авч буй улс төрийн намууд нь ч харахад хөөрхий л дүр зураг харагдана. Шилэн байдлаа ярих гээд Төрийн ордонд цугларсан "улс төрийн нам" гэх тодотголтой нөхдийг харахад, Л.Оюун-Эрдэнийн хоёр талд АН-аас Л.Гантөмөр, ХҮН-аас Т.Доржханд сууж, эрх баригч намын генсек өнгө ижилссэн байв. Хажуугаар нь, "Буян"-гийн Б.Жаргалсайхан, хуульч Х.Бат-Ялалт нарын намын дарга нэртэй хүмүүс эмжээд, нэг тийм өнгө гундуухан дүр зураг үүсгэцгээх.

Улсын дээд шүүхэд бүртгэлтэй 30 гаруй нам байх ч бодит байдал дээр системийн намын шинжээ АН эдүгээ бараг л алдчихаад байна. АН ийм дор ортлоо жижгэрч бутарсан байхад бусад улс төрийн намууд эзгүй ТББ-ын хэлбэрээр хувь хүмүүсийн халаас хотонд явах нь ч аргагүй юм.

Өнөөдрийн түвшинд ийм багсаархан, намгүй мөртөө намтай юм шиг загнадаг цөөн хэдхэн хүний түвшинд эрх баригч намын дарга наймаа үсэргэж яваа нь нэг талаар харамсал гэлтэй. Нөгөө талаар тэдний үгэнд итгэж ордог ард нийт гэж бас хаана байх вэ. Үүнийг МАН-ын залуу удирдлагын баг мэдэхээрээ нэг мэдэж байгаа. Гол нь, тэр энэ үгээрээ ард нийтээс асуугаад ямар дүн гарлаа ч ҮХНӨ явуулах алхмаасаа ухрахгүй гэсэн мессижээ л өгөхийг зорио болов уу.

Л.Оюун-Эрдэнийн хувьд энэ нь ч аргагүй. Эдүгээ түүний удирдсан танхим 16 ерөнхий чиг үүргийн ба чиглэлийн яам, хоёр шадар сайд, ЗГХЭГ-ын дарга, боомт, хот хариуцсан сайд гээд нийтдээ 22 сайд сэтэртэнтэй болчхоод буй. Үүнээс ердөө Соёлын яам л парламентын гаднаас гэхээр Л.Оюун-Эрдэнийг өөрийг нь оруулан тооцоход УИХ-ын гурван гишүүн тутмын нэг нь сайд болчхоод байгаа билээ.

Тэд ийм байранд ирэхийн тулд Үндсэн хуулийн 39.1 дэх давхар дээлний 2019 онд оруулсан өөрчлөлтийг унагаж, парламентаас танхимаа бүрдүүлсэн. Ингэхдээ ҮХНӨ хийж, УИХ-ын гишүүдийн тоог нэмж байж гишүүд, сайд нарын тоог харьцангуй зэрэгт аваачих учиртай.

Харин ард иргэд бол "76 гишүүн нь улс орныг ийм дор оруулчхаад байхад гишүүдийн тоог нэмэх ямар ч шаардлагагүй" гэж эсрэргүүцэж буй. Тэд энэ эсэргүүцлийг бусад намаар аргадуулах, тэднийг дэмжсэн байдлаар яриулж байгаад нэмэх тактик бодохдоо намын дарга нь шуудхан наймаалцах агуулгыг нийтийн өмнө ил тод ярив.

Тэмдэглэл: Нэг нам олонх болж, найман жил дараалан Засгийн эрх барьж буй энэ цаг үед төрдөө итгэх ард түмний итгэл хамгийн их суларч, улс төрийн намуудын чадамж үлэмж доошилсон нь үнэн. Гэхдээ бас нэг намын толгой дахь хэдхэн хүний сэтгэснээр нийгмээрээ нэг хөлбөрөөд байж болохгүй билээ. Ээлжит бус сонгууль нь парламентын ардчиллаа эвдэж буй дүрмийн бус тоглолт болж, цаашид хэлбэршин тогтвол улс оронд аюултай.

Нөгөөтэйгүүр ҮХНӨ явуулж, сонгуулийн тогтолцоог дахин хөндөхөөргүй хадааж өгөх, гишүүдийн тоог нэмэх агуулгууд нэн чухал буй ч бас дураар зоргоор наймаалцах утга руу чирч, үнэ хүндийг нь буулгаж болохгүй билээ.

Г.ИТГЭЛ

Бидний өмнө нь бэлтгэн хүргэсэн Л.Оюун-Эрдэнийн мухардал ба Л.Гантөмөрийн “өр”-өө төлөх цаг ЭНД дарж уншина уу.

Энэ мэдээнд өгөх таны үнэлгээ

Хуваалцаарай Жиргээрэй