ҮХӨ хийчихлээ, одоо гурван хуулиа батлаад хулгайчдаа “мурьчихвал” ч…

УИХ-ын гишүүдийн тоог 152 болгож, 76-г нь мажоритар, 76-г нь хувь тэнцүүлсэн сонгуулийн тогтолцоогоор сонгох ҮХӨ эцэстээ 126 дээр бууж, тогтолцоо 78/48 болж батлагдав. Хүүхдийн баярын өмнөх өдөр машиндаж орхив.

Харин хүүхдийн баярын өдөр цахим орчинд МАН-ынхныг мандуулж, АН-ыг “миалсан” зураглалтай өнгөрлөө. Тодруулбал, “АН 50/50 зарчмаас ухарч, УИХ-ын гишүүдийн тоог цөөлсөн гол буруутан. Харин МАН ҮХӨ дээр санаачлагч, түүчээлэгч байж баталлаа” гэгдсэн юм. Ямартай ч баталчихсан. Цаашид ямар хүлээлтүүд үүсэх вэ гэдэг нь асуудал.

Эрх баригчдаас,

Нэгдүгээрт: Улс төрийн намын тухай хуулийн шинэчилсэн найруулгын төслийг шилэн хэлбэр лүү явуулах

Эл хуулийн төслийг хэлэлцэх гэсээр байтал хаврын чуулган завсарлачих вий. Түүхэндээ 18 жилийн дараа шинчэлэх гэж байгаа.

Намуудын санхүүжилтийг шилэн байлгахаас эхлээд дэвшилт гарсан. Намын үндсэн зарчим болох хариуцлагатай, ил тод, ардчилсан байх шаардлагыг хангаж чаддаггүй. Удтал засагдахгүй явж ирсэн хариуцлага, ил тод байдлын асуудлыг шийдвэрлэх, намыг төлөвшүүлэх хөшүүргийг бий болгох, нөгөө талаас улс төрийн хүрээний авлигыг шийдвэрлэх нэг зам нь төрөөс тодорхой хэмжээний санхүүжилт өгөх ёстой гэдэг олон улсын туршлага. Тэгвэл энэ хуулийн шинэчилсэн найруулгын төсөлд эдгээр агуулгыг багтааж өгсөн. Үүгээрээ хүлээлт үүсгээд буй.

Хоёрдугаарт: Сонгуулийн тухай хуулийн нэмэлт өөрчлөлтийг батлах

УИХ-ын даргын захирамжаар байгуулагдсан Ажлын хэсэг болон УИХ дахь АН-ын бүлгээс тус тус өргөн бариад байгаа. Эдгээр төсөлд сонгуулийг хосолсон тогтолцоогоор явуулах замаар санал гээгддэг явдлыг арилгах, сонгуулийн зардлыг бууруулах, гадаад улс оронд ажиллаж амьдарч буй иргэдийг сонгуульд оролцуулах зэрэг асуудал тусгасан.

Нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх тухай хуулийн нэмэлт, өөрчлөлтийн төслийг батлах

Энэхүү хуулийн төсөл батлагдсанаар УИХ-ын гишүүд, сайд тэдний хамаарал бүхий этгээдүүд тендер зэрэг төрийн аливаа давуу эрхээс түдгэлзэх юм

Мөн Монгол Улсын Ерөнхийлөгч, Улсын Их Хурлын дарга, Монгол Улсын Ерөнхий сайд, Улсын Их Хурлын гишүүн, Засгийн газрын гишүүн, аймаг, нийслэлийн Засаг дарга болон түүний эхнэр, нөхөр, хамтран амьдрагч, хүүхэд, хамаарал бүхий этгээдүүд нь төрөөс болон төрийн өмчит компани, төртэй хамтран хэрэгжүүлж буй олон улсын байгууллагуудын төсөл хөтөлбөрөөс санхүүжих бүх төрлийн худалдан авалтад оролцох, аливаа хөнгөлөлттэй зээл тусламж, тэтгэлэг, батлан даалтад хамрагдахыг тус албан тушаалыг эрхэлж буй хугацаанд нь хориглохоор тусгасан.

Хамгийн гол нь улс төр, бизнесийн хэт хамаарал зааглагдаж, төр нь төр шиг, бизнес нь бизнес шиг байх ёс зүйн зааг үүсгэх хүлээлт бий.

УИХ эдгээр хуулийн төслийг нэгэн зэрэг хэлэлцэж байсан түүх үгүй. ҮХӨ-өө хийчихсэн. Үүний араас эдгээр хуулиудаа баталчихвал “Улсын Их Хурлын хаврын чуулган авлигын эсрэг чуулган байх болно” хэмээн тодорхойлсон спикерийн үг биелэлээ олно. Эс тэгвээс хоосон тунхаг төдий үлдэнэ.

Харин намуудаас

Жагсаалтдаа тодорхой тооны нам бус сайн дүрүүдийг намын даргын санаачлагаар нэрлэж оруулж ирэх,

Намаас 48 хүн орж ирэхийн төлөөх тэмцэл өнөөдрөөс ч биш өчигдрөөс эхэлсэн гэж хэлж болно. АН-ын гишүүн Д.Ганбат гэхэд л ямар сайндаа ҮХӨ-ийн эцсийн хэлэлцүүлгийн үеэр “Амьдрал мэдэхгүй годгор охид хөвгүүд биш нэг удаа гишүүн болсон хүнийг оруулж ирэх хэрэгтэй” гэж өөрийгөө түлхэж суух вэ дээ. Энэ мэт биеэ тоосон, түлхсэн тулаан нам дотор хэдийнэ эхэлчихсэн.

Жагсаалтад улс төрчийн зан төлөвшил, ёс суртахууны байдлыг чухалчлах. Элдэв сангуудын зээл, тендер хамдаг хүмүүс болон бүлэг фракцын томчуудыг оруулахгүй байхыг,

ЖДҮХС, Хөгжлийн банк, БЗС болон Засгийн газрын бусад сангуудыг тоносон, гар дүрсэн АН, МАН-ынхны нэрс ерөнхийдөө олон нийтэд ил болчихсон. Эрх баригч МАН-ын генсек Д.Амарбаясгалан “сангуудад гар дүрсэн гишүүдийнхээ нэр дэвших эрхтэй ярина” гэж ил цагаанаар хэлсэн. Эрх баригч нам нь үнэхээр тэгж чадвал бусдад асар том улстөрийн соёл, шударга ёсны чиг шугам тогтох учиртай.

Эдгээр хуулиуд, намуудын ёс зүйн үлгэрлэл, өөрчлөлтийн гэрэл наанадаж 2024 оны, цаанадаж 2028 оны сонгуулиас тусч эхэлнэ буй за.

Энэ мэдээнд өгөх таны үнэлгээ

Хуваалцаарай Жиргээрэй