Х.Болорчулуун: Ирэх жилээс хүнсний ногооны үнэ өсөхгүй

Хүнс, хөдөө аж ахуй, хөнгөн үйлдвэрийн сайд Х.Болорчулуун ургац хураалт, өвөлжилтийн бэлтгэлийн талаар мэдээлэл өглөө.

Тэрбээр "Монгол улс түүхэндээ хамгийн их хүнсний ногоо хураан авсан жил боллоо. Таван жилийн өмнө хүнсний ногооныхоо 45 хувийг дотоодоосоо хангаж байсан бол энэ жил хүнсний ногооны 85 хувийг дотоодоосоо хангаж байна. Дотоодоос хангах буудайг хангалттай буюу 14.2 центр га ургац хураасан. Ойрын 7, 8 жилд ийм их хэмжээний ургац аваагүй. Ирэх жилээс 100 хувь бүрэн хангагдах тул хүнсний ногооны үнэ өсөхгүй гэсэн ерөнхий төлөвтэй байна" гэв. 

Энэ жил 456,000 тн үр тариа хураан авсны 435,000 тн нь улаан буудай бөгөөд өнгөрсөн жилээс найман хувиар өссөн байна. Харин хүнсний ногооны хувьд өнгөрсөн оноос 23 хувиар их буюу нийт 183,000 тн-ыг хураасны 175,000 тн төмс аж.

Харин өвөлжилтийн бэлтгэл байдлын хувьд "Нийт газар нутгийн 60 хувьд нь хүндэвтэр зудын байдалтай, зарим газраар 30-40 см зузаан хунгарласан цастай байгаа. Улсын хэмжээнд малчдын түвшинд 1.2 сая тн хадлан, 21.6 сая тн сүрэл, 118,000 тн ногоон тэжээл, 61,000 тн үйлдвэрийн тэжээл, 48,000 тн гар тэжээл, 18,000 тн дарш, 81,000 тн давс хужир бэлтгэж, шаардагдах өвс тэжээлийн 92.3 хувийг бэлтгээд байгаа" гэлээ.

Энэ мэдээнд өгөх таны үнэлгээ

Хуваалцаарай Жиргээрэй