Манай төрийн авлигатай тэмцэж буй царайг хар

Авлигад авсан 1.3 тэрбум төгрөгөө улсад буцааж төлөөд, 27 сая төгрөгөөр торгуулаад л болоо. Монголд ийм хууль үйлчилж буй ч Засгийн газар нь сүр бараатайгаар "Авлигачидтайгаа тэмцэнэ" гэж өөд уруугүй зарлах авай.

"Эрдэнэс силвер ресурс" ХХК-ийн захирал асан, Хөдөлмөрийн баатар Т.Мөнхбаяр уг нь Эрүүгийн хууль дахь хялбаршуулсан журам авлига, албан тушаалын хэрэгт үйлчлэхээ байснаас хойш шүүгдсэн. Ямар ч ялгүй, 27 саяар торгуулаад өнгөрч буй Т.Мөнхбаяр нь хялбаршуулсан журмаар шүүгдсэн "Эрдэнэс Монгол" ТӨХК-ийн захирал асан Д.Хаянхярваатай шийтгэлийн хэмжээгээр ижил байна.

Д.Хаянхярваа авлигад авсан 315 мянган ам.доллар, 210 сая төгрөгөө улсын орлого болгож, 40 сая төгрөгөөр торгуулан, хэргээ хүлээснээр шийтгэл нь хөнгөрч байв. ТӨХК болоод төрд шилжүүлэн авсан Салхитын мөнгөний орд зэрэг дээр ажилласан захирлууд хялбаршуулсан журам байсан ч байгаагүй ч ингэж өршөөгдөж болдгийг Монголын шүүх бидэнд харууллаа.

Д.Хаянхярваа, Т.Мөнхбаяр нарын захирлуудын хүрээнээс хальсан, бүр нэг ичгэвтэр кэйс бол Нийслэлийн прокурорын газрын дэд дарга асан Ш.Нямдорж авлигаар 200 сая төгрөг бусдаас авсан гэдгээ хүлээсэн явдал. Хэргээ хүлээсэн тул 14 сая төгрөгөөр торгуулаад гарсан.

Ёс суртахууны хувьд, прокурор хүн ийм зам туулна гэдэг нь манайд л байж болдог хэм хэмжээ байх.

Энэ мэтээр хуулийн янз бүрийн зохицуулалтаар манай авлигачид ер нь өршөөгдсөөр ирсэн. Ерөнхий сайд асан С.Баяр шоронгоос суллагдахдаа шүүхийн шийдвэрийн эд хөрөнгө хураах албадлагын арга хэмжээний хүрээн дэх 5.5 тэрбумаа улсад төлсөн байдаг. Үндсэндээ тэр Оюутолгой төслийн явцад авлига авснаа хүлээн зөвшөөрч, уг төлөлтийг хийсэн логик харагддаг ч үгүйсгэдэг л юм.

Нэгэн үес баахан томчуудаа авлигын хэргээр шүүж, ял өгч жүжиглэсэн ч тэгсхийгээд С.Баяр мэтээр ихдээ 1 жил суугаад тэд наранд гарцгаасан. Авлигын шинжтэй үйлдлээрээ аавын хаалга түр татахдаа тэнд номын санч, худгийн манаач зэрэг статусаар тусдаа байшинд сууж байгаад гарч ирэгсэд манайд өчнөөн байна. Тухайлахад, М.Энхсайхан, С.Баярцогт, Ж.Эрдэнэбат, Д.Эрдэнэбат, Б.Болор, Н.Номтойбаяр, Г.Солтан гэхчлэн төрийн түшээд нарыг захаас нь нэрлэж болно.

Одоо сайд асан Т.Бадамжунайг авлигын хэргээр шүүхээр зэхэж байна. Түүнд 50 мянган ам.доллар өгөөд, ЗТХЯ-ны ТНБД асан Ж.Бат-Эрдэнэд хүргүүлэхийг завдсан Ц.Анандбазарыг хэргээс тусгаарласан байв. Ийм шог. Авлига өгүүлэхийг завдсан этгээдээ ч шүүж чаддаггүй шүүхийн засаглалтай улс юм, манайх. Авлигын хэргээр алдарт оймсны хэргээс сугарч, "Ааяад тэдийг" гэсэн бичигт үлдсэн байдаг Ш.Раднаасэд гишүүн өнөөг хүртэл шүүгдсэнгүй.

Энэ мэтээр У.Хүрэлсүхийг МАН-ын дарга ба Засгийн газрын тэргүүнээр ажиллаж байхад ч , эдүгээ үе солигдож, Л.Оюун-Эрдэнэ энэ эрх мэдлийг авсан ч яг том дүнгээрээ авлигын хэрэг бид огт урагшлаагүй л байна. Эсрэгээрээ хуулиудаа ухаж байгаад, авлигачдаа өршөөлийн хонгилоор яаж явуулах уу гэдэг арга ухаанд маш сайн суралцаж байна, эдүгээ цагт бол.

Нүүрсний акц одоогоос жилийн өмнө эхэлсэн ч урагшилсан зүйлгүй. Ногоон автобусны хэргээр гол зохион байгуулсан байж болох Д.Сумъяабазар, Ж.Сүхбаатар нартаа мөрдөн шалгагчид нь хүрч очиж чадаагүй. Хөгжлийн банкны хэргээр шийтгэгдэх ёстой улсууд нь сайд болчихсон явж байх жишээтэй.

Авлигын хэргийг ер нь цаашид яаж шүүх юм. Шүүгчид нь үүнд яаж бэлтгэгдэх юм. Авлигын индексээ буулгаж, олон улсад хүн шиг төрхтэй харагдах чин хүсэл ер нь манай томчуудад байгаа юм уу гэдэг асуулт гарч ирж байгаа.

Л.Оюун-Эрдэнэ, Х.Нямбаатар нар өнгөрсөн жилүүдэд баахан л шударга ёс ярилаа. Одоо өөрсдөө үүнийгээ биелүүлж, үр дүнгийн салхи сэвэлзүүлэхгүй бол сонгогчид тэдэнд ямархан халуун жин тавихыг тэд эрх биш төсөөлж байгаа биз ээ.

Ер нь сайн дурандаа ийм том сэдэв шүүрч авсан улсууд өнцгөө үүрч даахгүй бол тэдэнд жаахан итгэж буй ард түмэн шуудхан алганы амт үзүүлчих юм. Үүнийг тэдэнд байн байн сануулж, намчдаа өмөөрөх боломжийг үл олгомоор байгаа билээ. Ер нь манай төрийн авлигатай тэмцэж ирсэн он цагуудыг, одоо буйг нь, ирээдүйд хаашаа чиглэж байгааг ажаад л байгаарай. Бид урагшлахаас илүү тэднийг өршөөхөд л илүү мэргэшиж байгаа.

Энэ мэдээнд өгөх таны үнэлгээ

Хуваалцаарай Жиргээрэй