Д.Амарбаясгалан, С.Амарсайхан нарын хотын сонгуулийн хамтрагч Х.Баттулга уу

МАН дотроос НИТХ-ын сонгуулийн өмнө УИХ-ын дарга Д.Амарбаясгалан, Шадар сайд С.Амарсайхан нар эрх ашгаа АН руу хөрвүүлж, “Женко” Х.Баттулгын багийг санхүүжүүлж байгаа гэх яриа хөвөрлөө. Үүнийг нотлох гэсэн мэт өнөөх Х.Баттулга нь хотын АН-аас нэр дэвших 45 кандидатын 30 гаруйг аваатхав.

Яагаад хотын сонгууль ийм үнэ цэнтэй болж, нам дамнаж тохиролцож болох эрх ашгийн сүлжээ үүсгэв гэдэг асуулт эндээс гарна. Хариулт нь ерөөсөө л ирэх дөрвөн жил Улаанбаатар хотод хэрэгжих томоохон төслүүд юм. Нийт 40 их наядын төслийн ихэнх хотод түшиглэж, тэнд асар их мөнгө, эрх мэдэл эргэлдэхээр болоод буй.

Тэгэхээр НИТХ-ын сонгуульд системийн хоёр намын өрсөлдөөн Х.Нямбаатар, Х.Баттулга нарын хооронд өрнөж, аль ялсан тал нь дээрх эрх мэдэл, мөнгөний урсгалыг базна л гэсэн үг.

Дахин хэлэхэд, АН-аас нэр дэвшсэн 43 кандидатын 35 нь Х.Баттулгын хүн гэдгийг өөрсдөө ил зарлачихсан. Нийслэлийн АН-ын хороог “женкоист” Т.Батцогт ахалж орж байна. Үүний ард УИХ-ын гишүүн болсон экс Ерөнхийлөгч НИТХ-д өөрийн нөлөөлөл л буй юм.

Харин Х.Баттулгын хүмүүс гэдэгт “Мах импекс”-ийн захирлыг эс тооцвол мөнгөтэй, нөлөөтэй хүн бага байгаа нь анхаарал татсан. Сонгуульд мөнгө хэрэгтэй. Өөрөөр хэлбэл тэд хэрхэн сонгуулийн зардлаа, санхүүжилтээ босгож буй нь жигтэй.

УИХ-ын сонгуульд бус НИТХ-д гол анхаарлаа төвлөрүүлсэн Х.Баттулга

Төрийн тэргүүнээс бууснаасаа хойш Х.Баттулга олон нийтэд төдийлөн ил гараагүй. Хөшигний түүний хамгийн их төвлөрсөн агуулга бол аймаг, дүүргийн намын хорооны дарга нарыг өөрийн хүнээр томилох, мөлхөө ажил байв. УИХ-ын сонгууль гэхэд тэр бараг АН-ын аймаг, дүүргийн намын хороодын талаас ихийг нь халааслаад байв.

Гэвчиг УИХ дахь намын бүлэгтээ хэдэн дүр сойгоод л, бусад фракциудад суудал тавьж өгсөн харагддаг. Тэр ингэж УИХ-ын сонгуулиар жаахан хойш суусан дүр үзүүлээд, барьцаа хотын НИТХ дээр ахиулж, 45 мандатын 70 хувь орчмыг авсан нь энэ юм.

Улаанбаатар хотын хувьд эгзэгтэй, эргэлтийн цэг ирснийг тэр улс төрчийнхөө хувьд анзааралгүй л яахав. Олон жил ужгирсан түгжрэл, нийтийн тээвэр, төлөвлөлтийн чиглэлд реформын шинжтэй алхмууд хийгдэхээр хүлээгдэж, эхнээсээ “Сэлбэ дэд төв” тэргүүтэй гэр хорооллыг орон сууцжуулах төслийн хүрээнд газраа чөлөөлчихлөө. Метроны зураг төслийг боловсруулж эхэлсэн бөгөөд геотехникийн судалгаа хийгдэж байна.

МАН дотор хуучин хотын фракц хүч нь суларч, сөрөг хүчний шинэ амбиц, шинэ хүч үүсэх цаг үе өөрөө л ирж байна. Ийм үед Х.Баттулга хүчээ авч чадвал ирэх дөрвөн жил Нийслэл бол том төслүүд хэрэгжих бүтцүүдийг ч атгах боломжтой.

Энэ удаагийн НИТХ-ын сонгууль ихээхэн анхаарал татаж байгаа нь ерөөсөө л эл эрх ашгийн төлөөх өрсөлдөөн юм.

Д.Амарбаясгалан, С.Амарсайхан нарын Х.Баттулгатай үүсгэсэн шинэ хоршил

Гэтэл нөгөө талд УИХ-ын дарга Д.Амарбаясгалан, Шадар сайд С.Амарсайхан нарын нэгдэл дахин анхаарал татах болов. Д.Амарбаясгалангийн хувьд спикер болсноор давын өмнө “Админерал” ХХК-тай холбогдох нүүрс баяжуулах үйлдвэрийн асуудлаа намжааж авах зорилготой. Түүнээс гадна хүч нөлөөгөөр Ерөнхий сайд Л.Оюун-Эрдэнэтэй зэрэгцэж очих амбицтай нэгэн юм.

С.Амарсайхан Нийслэлийн удирдах байгууллагаас УИХ-ын гишүүн болоод багагүй цочирдсон гэгддэг. Учир нь үргэлж гуйлгын шинжтэй аж ахуйн ажил зохицуулж, шийдэж өгөх замаар мөнгөжиж ирсэн. Атал УИХ-ын гишүүний суудалд очмогц нь түүнийг тоож эргэх хүн олдохоо байв.

Иймд нам дотроо лоббидож, Д.Амарбаясгалангаар дэмжүүлэх замаар арай аж ахуйд ойр Шадар сайдын суудалд очсон. Одоо Засгийн газрын шинэ бүтцээр Шадар сайдын эрх мэдэл олон талд тарчихлаа. Дахиад л тэр “шүдгүй арслан” болов.

Энэ парламентад Улаанбаатар хотоос сонгогдсон гишүүд хүчирхэг байх ч төлөвтэй. Улмаар Д.Амарбаясгалан, С.Амарсайхан хоёр өдгөө НИТХ-ын сонгуульд хүчээ нэгтгэж эхэлсэн гэх мэдээлэл хөшигний ард хөвөрч байна. Ингэхдээ Х.Нямбаатарын талд биш, Х.Баттулгын талд нэгджээ.

Шинэ хоршлын нөгөө талд Х.Нямбаатар

НИТХ-ын бүрэлдэхүүн гурван жилийн дараа шинэ хотын даргыг нэр дэвшүүлэх эрх зүйн зохицуулалттай. Нэг үгээр  Нийслэлийн дараагийн Засаг дарга Х.Нямбаатар уу, өөр нэгэн үү гэдгийг тэд шийднэ. Түүнчлэн Нийслэл өдгөө бие даасан хуультай, санхүүжилт босгох өөрийн гэсэн механизмтай болчихсон.

Иймд НИТХ-ын төлөөлөгчид Нийслэлд урьд өмнөхөөс илүү нөлөөтэй байхаар юм.

Энэ цэгт одооноос төвлөрч буй Д.Амарбаясгалан, С.Амарсайхан, Х.Баттулга нарын нам эс хамаарсан хамтралын нөгөө талд зогсох хүн нь Х.Нямбаатар болон үлдэж байна.

Тэр УИХ-ын гишүүнээсээ бууж, 2024 оны УИХ-ын сонгуулийг өнжиж байж хотыг удирдаж буй. Намд, улс төрд нөлөө бүхий ашигтай суудал биш. Сүүлийн 20 гаруй жилд хуримтлагдсан бүхнийг богино хугацаанд засах нь ХЗДХ-ийн сайдаар ажиллаж байсан улстөрчийн хувьд лай ланчиг л юм.

Нөгөө талаас намын даалгавар байсан. Тийм болохоор Улаанбаатар хотыг шинэчлэлд дөхүүлэхийн тулд жил гаруйн хугацаанд суурь бэлтгэл ажлуудаа хангачихсан, зүтгүүлээд үзэхээр хүрлийж сууна.

Х.Нямбаатар УИХ, Засгийн газарт байхдаа ч Д.Амарбаясгалантай таатай харилцаатай байсангүй. Хотын дарга хийж явсан С.Амарсайханы зарим балгийг ч бас Х.Нямбаатар эвтэйхэн үүрэг шаардлагатай болж байгаа нь нууц биш. Харин Х.Баттулга бол шууд Х.Нямбаатарын өрсөлдөгч мөн. Сүүлийн үед өрнөж байгаа үйл явц, илэрхийлэгдэж байгаа хоёр талын байр сууриуд тэдний харилцаа хөндөгдөн хурцдаж байгааг илтгэж буй.

Нэг ёсондоо Х.Нямбаатарт эсрэгцүүлж НИТХ-ыг бүрдүүлэхийн тулд мөнгөгүй, нөлөөгүй хүмүүсийг Х.Баттулга нь Д.Амарбаясгалан, С.Амарсайхан нарын хамт санхүүжүүлж, бэлтгээд эхэлчихжээ.

Энэ мэдээнд өгөх таны үнэлгээ

Хуваалцаарай Жиргээрэй