Нийтээс тасарсан Н.Учрал

УИХ-ын гишүүд парламентын танхимд үг хэлснийхээ төлөө ямар нэгэн байдлаар үүрэг хүлээдэггүй. Хариуцлага ч үүрдэггүй. Тиймээс гишүүнийхээ микрофоныг ашиглаж, хувийн байдлаар бусдыг доромжлох, ашиг сонирхол бүхий үгсээ өөхөнд хулдаж ярих, тодорхой эрх ашгийг хамгаалах зэрэг эрхүүд тэдэнд нээлттэй байдаг.

Товчхондоо бол гишүүд яаж ч ярьж болдог гэсэн үг. Ярих агуулгынхаа сайн муугийн хязгаарыг зөвхөн өөрөө л тогтоох юм.

Харин үүнийг парламентад 9 дэх жилдээ сууж буй Н.Учрал таг мартжээ.

МАН-ын жагсаалтад эрэмбэлэгдэж, УИХ-ын гишүүн болсон "шарк" Д.Энхтүвшинг "Та парламентад суучхаад МҮХАҮТ-ыг төлөөлж дуугарлаа" гэхчлэн буруутгасан. Улмаар Д.Энхтүвшин гишүүн "Үгэнд чинь орсонгүй гэж намайг намаас хөөж, намын бүлэг дээр арга хэмжээ авхуулах хүсэлтэй байгаа сурагтай байсан. Би МАН-ын гишүүн биш, намын бүлгээс хөөвөл хөөгдье" гэж бичсэн юм.

МАН эрх барих хугацаандаа МҮХАҮТ-ыг хараандаа авч, ковидын үеэр асар олон ААН-үүд хаалгаа барьж байхад чихгүй толгой оргисоор суудаг байв. Ерөөс Б.Лхагважаваас хойш ААН-үүдээ татварын дарамтаас өмгөөлөх, хэтийдсэн нэг намын нөлөөллөөс хамгаалах, тэдний дуу хоолой болох агуулгаар хүчтэй дүргүй болцгоосон.

Зүй нь, японы парламентад будааны асуудлаа яриад сууж байдаг хэд хэдэн гишүүн байж л байдаг шиг Үйлдвэрчний эвлэл, ААН-үүдийн эрх ашгийг хамгаалан дуугардаг дүр зайлшгүй байх ёстой юм, манай төрийн ордонд.

Харин Н.Учрал бол хөдөлмөрийн зах зээл дээрх ажиллах хүчин хийгээд өнөө маргаашаараа татварын дарамтаас өндийхгүй байгаа ААН-үүдийн зовлонгоос онхи тасарсан хүн. Тийм хүнд Д.Энхтүвшингийн шүүмжлэл тэр чигтээ МХАҮТ-ын ажил шиг л сонсогдож байгаа юм.

Ерөөс өөрийнх нь эсрэг нэг сөрөг юм гарахад л шууд өрвөлздөг. Сонсож хүлээж авахаа бүр байгаад, тасраад одсон хүн өөрөө Н.Учрал болчхоод байна.

Мэтгэлцээний зарчимтай парламентын танхимд УИХ-ын гишүүнийг үг хэлснийх нь төлөө намаараа хариуцлага тооцуулах асуудал хүртэл ярьж, шууд "тэгж ярих ёсгүй" гэхчлэн бадрангуйгаар зааж чадаж байгаа юм, Н.Учрал.

Саяхан Н.Учралын Ерөнхий сайд асан Н.Алтанхуяг, АН-ын дарга Л.Гантөмөр нар луу зодчих шахам зандарсан байдалтай биеийн хэлэмж бүхий зураг сошиалаар хэсэг явсан. Тэрбээр Франц улстай хийх томоохон хэлцлийг ЗГХЭГ-ын даргын хувиар ахалж, Цөмийн энергийн хуульд өөрчлөлт оруулахаар ажиллаж байна.

Сонгуулийн дараа гэнэтхэн л ЗГХЭГ-ын даргаар очсон Н.Учралын ойрын жилүүдэд хамгийн том ажил нь өөрөө Францтай хийх хэлцэл. Уг хэлцэлд гол хөшүүрэг болох хуулийн төслөө парламентаар оруулж ирэх үедээ тэрийг ч, энийг ч "зодчихож" мэдэхээр ааш аягтай яваа нь энэ юм.

Аливаа нийгмийн урсгал өөрөө олон өнгөтэй. Энэ олон өнгийг байх ёсгүй гэх агуулгаар үгүйсгээд ирэхээрээ л тэнд ямар нэгэн буруутгал үүсэж байдаг. Тийм орчинд ортлоо, ингэж дүрдээ хэт биежилтээ МАН-ын залуухан сайд нар сүргээсээ тасарч эхэлсэн нь Н.Учралын үйлдлүүдээс харагдана.

Энэ мэдээнд өгөх таны үнэлгээ

Хуваалцаарай Жиргээрэй