"Sony"-гийн бүтээсэн робот ширээний теннисийн мэргэжлийн тамирчдыг ялж байна

Сүүлийн жилүүдэд робот, хиймэл оюун ухааны салбар хурдацтай хөгжих болсон. Тэгвэл хиймэл оюунтай “Sony” компанийн робот ширээний теннис маш сайн тоглож сурчээ. “Ace” нэртэй тус робот мэргэжлийн тамирчдтай хүртэл хүчтэй өрсөлдөж, заримдаа тэднийг хожиж байгааг шинэ судалгаа харуулав.

Робот бататгах сургалт буюу reinforcement learning гэж нэрлэгддэг аргаар ширээний теннис тоглож сурчээ. “Ace” роботод хүнд байдаггүй давуу талууд бий. Жишээлбэл ширээний эргэн тойронд есөн камер байрлуулсан нь бөмбөгний логог харж, эргэлтийг нь хэмждэг байна.

“Sony” компанийн хиймэл оюун ухааны судлаач Питер Дюрр “Ace”-ийг судалсан эрдэм шинжилгээний ажлаа "Nature" сэтгүүлд нийтлүүлжээ. Туршилт хийхийн тулд тус компани Токио дахь төв байрандаа олимпын тэмцээнд хэрэглэдэг хэмжээ бүхий талбай байгуулсан юм. “Ace”-тэй тоглосон мэргэжлийн тамирчид роботын ур чадварыг хараад гайхширсан гэжээ.

“Sony” мэдэгдсэнээр энэ нь ямар нэгэн спортоор робот хүний хэмжээнд, мэргэжлийн түвшинд тоглосон анхны тохиолдол аж. Энэ нь хиймэл оюун ухаан болон робот судалгааны салбарт томоохон амжилт болж байна гэж тус компани мэдэгдсэн юм.

“Ace” робот үетэй учир аливаа хөдөлгөөнийг далайцтай хийж чаддаг байна. “Sony”-гийн хиймэл оюун ухаан хариуцсан ерөнхийлөгч Майкл Спрангер “Хурд бол робот хөгжүүлэлтийн гол асуудлуудын нэг. Ялангуяа тусгайлан бүрдүүлсэн хяналттай орчноос гадуур байхдаа хурдтай байх нь маш чухал” гэжээ.

Тэр нэмж хэлэхдээ “Үйлдвэрүүдэд хурдан хөдөлгөөнтэй роботууд олон тоогоор ажилладаг. Гэхдээ тэдгээр роботууд зөвхөн нэг хөдөлгөөнийг л давтан хийдэг. Харин манай технологи роботыг байнгын өөрчлөлттэй орчинд уян хатан, хурдан бөгөөд өрсөлдөх чадвартай болгож байна” гэсэн юм. Ийм технологийг үйлдвэр болон бусад салбарт ашиглаж болно гэж Спрангер үзэж байна.

Хиймэл оюун ухаан судлаачид компьютерын чадварыг шатар зэрэг хөлөгт тоглоомоор хэмждэг байсан. Дараа нь видео тоглоом ашиглах болсон. Гэхдээ хиймэл оюун ухааныг бодит ертөнцөд ажиллуулах нь робот бүтээгчдийн хамгийн гол зорилго байсаар ирсэн юм.

Өнгөрсөн ням гарагт /2026.04.19/ Бээжинд болсон хагас марафоны уралдаанд роботын хөгжил хурдацтай явагдаж буйг харуулсан өөр зүйл болсон. Тодруулбал “Honor” компанийн бүтээсэн хүн дүрст робот марафонд түрүүлсэн юм. Өмнө жилийн марафонд оролцсон зарим роботууд гараанаасаа ч гарч чадаагүй үлдсэн. Тэгвэл энэ жилийн уралдаанаар “Honor” компанийн робот Бээжингийн хагас марафоны рекордыг эвдсэн билээ.

Эх сурвалж: Japan Today

Өөрийн сэтгэгдлээ илэрхийл

Share Tweet