Wi-Fi сүлжээ хүмүүсийг тагнаж, хянах шинэ хэрэгсэл болох аюултайг эрдэмтэд анхааруулж байна

Германы судлаачид ердийн Wi-Fi сүлжээ нь мэдэгдэхгүйгээр хүмүүсийг тагнаж, хянах шинэ хэрэгсэл болох аюултайг анхааруулж байна. Тэд энгийн Wi-Fi дохио болон хиймэл оюун ухааныг ашиглан, тухайн хүн биедээ ямар нэгэн асаалттай цахилгаан төхөөрөмж авч яваагүй байсан ч маш өндөр нарийвчлалтайгаар таних чадвартай системийг туршжээ.

Карлсруэгийн технологийн хүрээлэнгийн (KIT) Мэдээллийн аюулгүй байдал, найдвартай байдлын профессор Торстен Струфэ "Радио долгионы тархалтыг ажигласнаар бид орчин тойрны болон тэнд байгаа хүмүүсийн дүрсийг бүтээх боломжтой" гэж хэлсэн байна.

Тэрбээр нэмж хэлэхдээ "Энэ нь энгийн камертай ижил зарчмаар ажилладаг. Манай туршилтын ганц ялгаа нь хүнийг танихын тулд гэрлийн долгионы оронд радио долгионыг ашиглаж буйд байгаа юм. Тиймээс та биедээ WiFi төхөөрөмж авч явж байгаа эсэх нь огт хамаагүй" гэжээ.

Үүнээс зайлсхийхийн тулд ухаалаг утсаа унтраах нь хангалтгүй юм. Судлаачдын үзэж байгаагаар тухайн сүлжээнд холбогдсон ойр орчмын бусад утасгүй төхөөрөмжүүд нь энэ аргыг ажиллахад шаардлагатай дохионы идэвхжилийг хангалттай хэмжээгээр үүсгэсээр байдаг.

Судлаачид анхааруулахдаа энэхүү технологи нь өдөр тутмын хэрэглээний рүүтэрүүдийг хэнд ч анзаарагдалгүйгээр, чимээгүйхэн хяналтын систем болгон хувиргах аюултай гэжээ.

Карлсруэгийн технологийн хүрээлэнгийн Жулиан Тодт "Энэ технологи нь рүүтер болгоныг мөрдөлт, тандалт хийх боломжит хэрэгсэл болгон хувиргаж байна" гэсэн юм. "Хэрэв та WiFi сүлжээтэй кафены хажуугаар тогтмол өнгөрдөг бол өөрийн мэдэгдэлгүйгээр тандалтад өртөж, дараа нь төрийн байгууллагууд эсвэл компаниуд тэр мэдээллийг ашиглаж таныг таньж болно" гэсэн байна.

Судлаач Феликс Морсбахын хэлэхдээ одоогийн байдлаар тагнуулын агентлагууд болон цахим гэмт хэрэгтнүүдэд хяналтын камер, интернэтэд холбогдсон хаалганы хонх зэрэг хүмүүсийг хянах илүү хялбар арга ашигладаг хэмээжээ. Гэхдээ WiFi сүлжээнүүд нь бараг хаа сайгүй байдаг, үл үзэгдэх тул онцгой аюул дагуулж байна гэж дүгнэсэн юм.

Тэр "Гэвч хаа сайгүй байдаг сүлжээнүүд сэтгэл зовоом шинж чанартай. Энэ сүлжээнүүд бүхнийг хамарсан тандалтын дэд бүтэц болон хувирч магадгүй юм. Энэ сүлжээнүүд үл үзэгддэг учир ямар ч сэжиг төрүүлэхгүй" гэж хэлжээ.

Wi-Fi сүлжээ нь дэлхий даяар гэр, оффис, ресторан, нисэх онгоцны буудал, олон нийтийн газар нийтлэг болсон. Ийм учир тус сүлжээг ашиглах тандах ажиллагаа асар том хүрээг хамарч болзошгүй юм.

Сүлжээ ашиглах тандах гэсэн өмнөх технологиуд үнэтэй мэдрэгч эсвэл тусгай тоног төхөөрөмжид тулгуурладаг байсан. Харин энэ арга нь хаа сайгүй байдаг ердийн Wi-Fi сүлжээг ашигладаг. Өмнөх аргууд радио дохио хана, тавилга, хүмүүсээс ойхдоо хэрхэн өөрчлөгдөж байгааг хэмждэг байв. Харин энэ арга нь Wi-Fi рүүтер болон түүнд холбогдсон төхөөрөмжүүдийн хоорондын холбоог ашигладаг аж.

Wi-Fi-д холбогдсон төхөөрөмжүүд нь рүүтер рүү "beamforming feedback information" (BFI) буюу туяа хэлбэржүүлэлтийн буцах холбооны мэдээлэл гэж нэрлэгддэг өгөгдлийг тогтмол илгээдэг. Энэ мэдээлэл нь нууцлалгүйгээр дамждаг тул тухайн дохионы хүрээн дотор байгаа хэн ч тэр өгөгдлийг унших боломжтой аж. Судлаачдын хэлснээр эдгээр дохионы ойлтуудыг ашиглан  тухайн хүний гурван хэмжээст дүрсийг үр дүнтэйгээр үүсгэж болдог байна. Ийм учир хиймэл оюун ухааны системүүд тухайн хүнийг судлах боломжтой болно.

Эх сурвалж: Science Daily

Өөрийн сэтгэгдлээ илэрхийл

Share Tweet