Танилц: Даян аварга Б.Орхонбаярын мялаалга наадмын ХӨТӨЛБӨР

Тулгар төрийн 2235, Их Монгол Улсын 820, Үндэсний эрх чөлөө, тусгаар тогтнолоо сэргээн мандуулсны 115, Ардын хувьсгалын 105, Ардчилсан хувьсгалын 36 жилийн ой, Үндэсний их баяр наадамд Сэлэнгэ аймгийн Цагааннуур сумын харьяат "Алдар" спорт хороо, "АПУ" ХК-ийн бөх Б.Орхонбаяр 10 даван түрүүлж Монгол Улсын даян аварга цол хүртсэн. Тэрбээр Сэлэнгэ нутгаас төрсөн анхны даян аварга болж түүх бичсэн юм. Мөн Сэлэнгэ аймгийн Мандал сумын харьяат, “Алдар” спорт хорооны бөх Х.Наранбаяр нутгийн ах Улсын заан Н.Жаргалбаяраар тав давж Монгол Улсын начин цол хүртсэн.

Тэгвэл даян аварга, начин хоёрын цолны мялаалга баяр наадам болох "Талархал хүндэтгэлийн үндэсний спортын арга хэмжээ" өнөөдөр буюу наймдугаар сарын 8-нд Сэлэнгэ аймгийн Сүхбаатар суманд зохион байгуулагдана. Тус арга хэмжээг Сэлэнгэ аймгийн "Таван хан" бөхийн дэвжээ ерөнхий зохион байгуулагчаар ажиллаж буй юм.

Өдгөө 28 настай даян аварга болон "шинэхэн" начны баяр наадмыг олон хүмүүс зорьж буй. Шатахуун хомсдож буй энэ үед "Шунхлай" групп мялаалга зорин явах иргэдэд шатахуун тасалдуулахгүй олгохоор ажиллаж буйгаа мэдэгдлээ. Энэ талаар өөрсдийн цахим хуудаснаа "Сүхбаатар суманд болох Монгол Улсын даян аварга, АПУ компанийн бөх Б.Орхонбаяр, улсын начин Х.Наранбаяр нарын цолны мялаалгыг зорин явах иргэд, тээврийн хэрэгслийн хөдөлгөөн нэмэгдэх төлөвтэй байна. Бид ШТС-уудын шатахууны нөөц, түгээлтийг тасалдуулахгүй байхаар ажиллаж байна. Хэрэглэгч та Сэлэнгэ Шунхлай ШТС-аар тавтай үйлчлүүлээрэй" гэжээ.

Мялаалга наадам наймдугаар сарын 8-ны өглөөний 09 цагаас Үндэсний сурын харваа, шагайн харваагаар эхэлнэ. Түүнчлэн их нас, соёолон, даага уралдана. 128 бөх барилдах бөгөөд түрүү бөх ₮20 сая, үзүүр бөх ₮10 сая, их шөвгийн бөхчүүд тус бүр ₮5 саяын бай гардана. Мөн 2010 оны нэг сараас хойш төрсөн өсвөрийн 32 хүүхдийн барилдаан болно.

• 08:00 цагаас: Их насны морьдын уралдаан
• 10:00 цагаас: Барилдах бөхчүүдийн бүртгэл /өсвөрийн бөх/
• 11:00 цагаас: Нээлтийн үйл ажиллагаа
• 11:00 цагаас Соёолон насны морьдын уралдаан
• 12:00 цагаас: "Таван хан" дэвжээний бөхчүүд төрийн далбаа, туганд хүндэтгэл үзүүлнэ
• 12:20 цагаас: Сэлэнгэ аймгийн нутгийн зөвлөл алдартнуудад хүндэтгэл үзүүлэх
• 13:00 цагаас: Хүчит бөхийн барилдааны 1-2 даваа
• 15:00 цагаас: Дааганы уралдаан
• 16:00 цагаас: Хүчит бөхийн барилдааны 3-7 даваа
• 16:30 цагаас: Сур, шагайн харвааны шагнал гардуулах үйл ажиллагаа
• 17:00 цагаас: Түрүүлж үзүүрлэсэн бөхчүүдэд шагнал гардуулах
• 18:00 цагаас: Түрүүлж айрагдсан морьдыг цоллох
• 19:00 цагаас: Хаалтын арга хэмжээ
• 20:00 цагаас Үдшийн цэнгүүн

Одоогоор Монгол Улсад дөрвөн даян аварга бий. Тухайлбал, Архангай аймгийн харьяат Н.Жамъян 1927 он, Ц.Чимэд-Очир 1950 он, Булган аймгийн харьяат С.Цэрэн 1971 онд даян аварга цол хүртэж байсан бол отгон аварга нь Сэлэнгэ аймгийн харьяат Б.Орхонбаяр болж буй юм.

Дашрамд дурдахад, Сэлэнгэ аймаг хоёр аваргатай бөгөөд анхны аварга нь Мандал сумын харьяат МУГТ, Г.Эрхэмбаяр юм. Удаах нь даян аварга Б.Орхонбаяр болж байна. Дашрамд дурдахад энэ жил Б.Орхонбаярын багш "Алдар" спорт хорооны дасгалжуулагч Т.Өсөх-Ирээдүй МУГД цол хүртсэн. Түүнийг цолыг шавь нь даян аваргаар шагнасан юм.

Б.АЗЖАРГАЛ

Өөрийн сэтгэгдлээ илэрхийл

Share Tweet