Ганц бие залуусын уулзалтаас хосоо олоогүй ч нөхөрлөл бүтээгээд нутаг буцаж буй Н.Гандорж, А.Амгаланбаатар

Ганц бие залуусын чуулга уулзалт хэмээх тодотголтой "Жангар" фестиваль Говь-Алтай аймгийн Хөхморьт сумын  Дөргөн нуурын эрэгт долоодугаар сарын 26-30-ны хооронд болж өнгөрсөн. Н.Гандорж, А.Амгаланбаатар нар бол хосоо олохоор тус фестивалийг холын аймгуудаас зорин ирсэн малчин залуусын төлөөлөл.

Тэд энд санаа сэтгэл нийлсэн бүсгүйтэйгээ учраагүй ч дөрөө нийлсэн үеийн нөхөдтэйгөө танилцжээ. Баруун бүс нутагт ирснийх газар үзэж, Алтай таван богд хүрчихээд нутаг нутгийн зүг хөдлөх гэж буй залуустай фестивалийн сонин сайхан хийгээд хөдөөгийн аж байдлын талаар цөөн хором ярилцлаа.

-Сайн байцгаана уу. "Жангар" фестивальд аль нутгаас зорьж ирж оролцов. Хөдөө амьдрахаар шийдээд хэр удаж байна вэ?

-Н.Гандорж: Дорноговь аймгийн Хөвсгөл сумаас ирж оролцсон. Би Бээжинд сурч төгссөн. Сургуулиа төгсөж ирээд гурван жил орчим ажилласан.Тэгээд ээж аавын маань бие өвдөөд, эрүүл мэндийн хувьд мал маллаж хүчрэхгүй болсон тул хөдөө амьдрахаар шийдсэн. Хөдөө нэг л гарчихвал ийш тийшээ явж амжихгүй, эхнэр авч ч амжихгүй хэдэн малаа гэсээр яваад таардаг юм байна.

А.Амгаланбаатар: Баянхонгор аймгийн Шаргалжуутаас ирсэн. Миний хувьд Дарханд их сургууль төгссөн, инженер мэргэжилтэй. Бас л ялгаагүй дээ. Ах маань гэр бүлтэй болоод төвд суурьшсан. Дүү сургууль соёл гээд мөн л төв рүү орсон. Аав, ээж хоёрыгоо хөдөө орхилтой нь биш нэг нь хажууд нь байя гээд би хөдөө гарсан.

Тэрнээс хойш малаа маллаад, малчнаа хийгээд явж байна. Бараг жилийн өмнөөс энэ уулзалтад ирж оролцъё гэж төлөвлөсөн. Фестиваль сайхан болсон. Сайхан ч найз нөхөдтэй боллоо.

-Монголын хөдөөг эзэнтэй байлгаж буй хүмүүс нь нас насны эрчүүд болсон гэхэд хилсдэхгүй. Энэ фестивалийн зорилго ч уг асуудлыг шийдвэрлэхэд чиглэсэн. Та бүхний ирсэн ч зорилго ч мөн ижил болов уу?

А.Амгаланбаатар: Зорилго ч бараг биелээгүй дээ. Нөхөрлөөд, хамтдаа газар үзээд явж байна.

Н.Гандорж: Бид нэгнээ өмнө нь таньдаг байгаагүй. Жангар дээрээс л нийлсэн дээ. Алтай таванбогд орлоо. Энэ хавиар гоё гоё газрууд үзээд, тайван явцгааж байна.

-Та хэд тэгвэл хосын фестивальд ирээд найзаа олоод буцаж байгаа юм байна шүү дээ?

-Харин тийм ээ |Инээв|. Тэнд чинь яг тохирох хүн олдохгүй байгаа юм чинь. Бид бол хөдөөний хүмүүс. Хөдөө амьдрах, малчин болох хүн хайж байгаа шүү дээ. Жангар фестивалийг ганц бие малчин залуусын уулзалт гэж сонсоод л ирж байгаа. Гэхдээ төв суурин газрын аялал зугаалга, газар орон үзье, юм нь үнэгүй гэсэн хүмүүс ихэвчлэн ирсэн юм шиг санагдлаа.

-Цаашид юун дээр анхаарвал зүгээр бол?

А.Амгаланбаатар: Оролцогчдын зорилгыг тодорхойлох тал дээр анхаармаар ч юм уу. Хөдөө ганц бие залуус зөндөө. 40, 50 хүрсэн хүн ч ганцаараа байна. Уг нь Жангар фестиваль боломжийн л юм билээ, эхний уулзалтаас төрсөн хосуудыг харахад. Ганц бие залуусыг учруулдаг. Гэхдээ олон дотор сайхан аялж зугаалъя, ууж идье гэсэн хүн нь арай их юм уу гэж бодогдсон.

-Н.Гандорж: Зорилго нь уг зөв. Гэхдээ энд хаа холоос ирсэн хүмүүс ч байгаа. Говиос, зүүн бүсээс ирж байна. Тэгэхээр тэгэхээр тухайн бүс нутаг дахь байгалийн цогцолборт зохион байгуулж болох юм. Хэрэв тэгвэл холоос зорьж ирж чадахгүй байгаа жинхэнэ эздэдээ ойртох байх. Хамгийн гол нь зорилго, зохион байгуулалт нь зөв байх хэрэгтэй. Үнэндээ яг танилцъя гэхээр нөхөртэй ч хүн байна, эсвэл сургуулиа төгссөн юм уу гэмээр жаахан хүүхдүүд ч байна.

П.ДАВААЖАРГАЛ

Өөрийн сэтгэгдлээ илэрхийл

Share Tweet