З.Батжаргалыг сурроноор мөргөсөн 17 настай эрэгтэй цагдан хоригдоогүй, мөрдөн шалгагдаж байна
Тав хоногийн өмнө Байгаль орчны сайд асан З.Батжаргал сурронтой этгээдэд мөргүүлэн амь насаа алдсан хэрэг гарсан.
Тодруулбал, тус хэрэг энэ оны наймдугаар сарын 6-ны өдөр Баянзүрх дүүргийн 36-р хорооны нутагт болсон. Хэрэг гарахын өмнө Байгаль орчны сайд асан З.Батжаргал COP17-ын ажлын хэсгийн хуралд оролцсон байдаг. Улмаар харих замдаа тус осолд өртсөн байж болзошгүй нөхцөл байдал тогтоогдоод байгаа билээ.
Тэгвэл Байгаль орчны сайд асан З.Батжаргал мөргөж, амь хохироход хүргэсэн этгээд 17 настай, эрэгтэй. Жолоодох эрхийн гэрчилгээгүй, урьд нь гэмт хэрэг, зөрчилд холбогдож байгаагүй этгээд байжээ. Түүнийг одоогийн байдлаар цагдан хориогүй. Тус хэрэгт холбогдох мөрдөн шалгах ажиллагааг үргэлжлүүлж байгаа аж.
Ташрамд дурдахад цахилгаан моторт бичил тээврийн хэрэгслээс үүдэлтэй нас баралт 2024 онд гурав, 2025 онд тав бүртгэгдсэн байна. Тухайлбал,
2024 онд,
- 17 настай эмэгтэй Гачууртын замд цахилгаан дугуйтай онхолдож амиа алдсан
- 34 настай эрэгтэй Дүнжингаравын дугуйн зам дээр сурроноос унаж нас барсан
- 50 настай эмэгтэй явган явж байгаад скүүтерт мөргүүлсэн, эмнэлэгт хэвтэн эмчлүүлээд 12 хоноод нас барсан
2025 онд,
- 24 настай эрэгтэй мопед унаж яваад суудлын автомашины араас мөргөж газар дээрээ нас барсан
- 25 настай эрэгтэй мопед унаж яваад автобустай мөргөлдөж нас барсан
- 17 настай эмэгтэй мопедтой явж байгаад том оврын машинд мөргүүлсэн, эмнэлэгт хэвтэн эмчлүүлээд 11 хоноод нас барсан
- 38 настай эрэгтэй цахилгаан дугуйтай явж байгаад суудлын машинтай мөргөлдсөн, эмнэлэгт хэвтэн эмчлүүлээд 23 хоноод нас барсан
- 60 настай эрэгтэй мопедтой явж байгаад суудлын машинтай мөргөлдсөн, эмнэлэгт ирээд хоёр цаг болоод нас барсан байна.
Г.МИШЭЭЛ
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.