Улаанбуудайн үнийн 11 хувийн өсөлтийг дагаж гурилан бүтээгдэхүүний нэмэгдэнэ

Оны эхний улиралд мах болон шатахууны үнийн өсөлтийг дагаж хүнсний өргөн хэрэглээний бараа, бүтээгдэхүүний өсөв. Харин өнөөдрийн байдлаар АИ-92 бензиний литр тутмын үнэ өссөн, хөдөлмөрийн хөлсний доод хэмжээ нэмэгдсэн зэрэг шалтгаануудаас үүдэн инфляц оны эхэн үеэс 13 хувь болтлоо өсөөд байна.

Гэтэл нэмээд, Засгийн газраас стратегийн нөөц улаанбуудай бүрдүүлэх ажлын хүрээнд 2026 оны шинэ ургацын улаанбуудайн худалдан авах үнийг дахин тогтоожээ. Үнийн тооцооллыг ХХААХҮЯ, “Хөдөө аж ахуйн корпораци” ТӨХХК болон мэргэжлийн холбоод хамтран 11 аймгийн 41 сумын 120 гаруй тариаланч, аж ахуйн нэгжийг хамруулсан үйлдвэрлэлийн өртгийн судалгаанд үндэслэн гаргасан байна. Тодруулбал, 2026 оны шинэ ургацын улаанбуудайн худалдан авах үнийг:

• 1-р зэрэг улаанбуудай тонн тутмын 1,450,000₮
• 2-р зэрэг улаанбуудай тонн тутмын 1,350,000₮
• 3-р зэрэг улаанбуудай тонн тутмын 1,250,000₮
• 4-р зэрэг улаанбуудай тонн тутмын 1,150,000 төгрөг байхаар тогтоосон билээ.  

Харин 2025 онд

• 1-р зэрэг улаанбуудай тонн тутмын 1,320,000₮
• 2-р зэрэг улаанбуудай тонн тутмын 1,220,000₮
• 3-р зэрэг улаанбуудай тонн тутмын 1,150,000₮
• 4-р зэрэг улаанбуудай тонн тутмын 1,000,000 төгрөгөөр тус тус худалдан авч байжээ.

Ингэснээр 2026 онд улаанбуудайн худалдан авах үнэ өнгөрсөн оноос дунджаар 11 хувиар өсөөд байна. Өөрөөр хэлбэл, өнгөрсөн онд 1 кг улаан буудай 1,000-1,320 төгрөг байсан бол энэ онд 1,150-1,450 төгрөгөөр өсөхөд нөлөөлсөн гэсэн үг.

Улаанбуудайн үнэ өсөхийн хэрээр талх, нарийн боов зэрэг гурилан бүтээгдэхүүний өсөх нь зах зээлийн дүрэм.

Шинэ ургацын улаанбуудайг есдүгээр сарын 15-20-ны хооронд гурилын үйлдвэрүүдэд нийлүүлж эхлэх талаар албаныхан мэдээлж буй. Энэ үед гурилын үнэ хэр хэмжээгээр өөрчлөгдөхөөс шалтгаалан гурилан бүтээгдэхүүний үнэ цаашид ч мөн нэмэгдэх эсэх нь тодорхой болох юм.

Өртөг дагаж үнэ өсөх хүлээлт

Улаанбуудайн худалдан авах үнэ өссөнтэй холбоотойгоор гурилан бүтээгдэхүүн үйлдвэрлэгчдээс тэдний байр суурийг тодруулахад:

“Атар Өргөө”ХК,

Манайх бүтээгдэхүүнийхээ үнийг тогтвортой барих, аль болох нэмэхгүй байхыг зорьдог. Энэ жилийн Улаанбуудайн үнэ өнгөрсөн жилийнхээс 11 хувиар өссөн. Улмаар шинэ ургацын гурил авч эхлэх, мөн шатахууны үнэ нэмэгдсэнтэй холбоотойгоор үйлдвэрлэлийн  өртгөө тооцож үзнэ. Өртөг алдагдалтай гарах нөхцөл үүсвэл бүтээгдэхүүний үнээ нэмэхээс өөр аргагүй.

“Талх Чихэр”ХК,

 Улаанбуудайн үнэ өнгөрсөн оноос өссөн байна.  Үүнтэй холбоотойгоор гурилын үнэ нэмэгдэх төлөвтэй байна. Талх нарийн боовны гол түүхий эд  гурил. Гурил үйлдвэрлэгч, нийлүүлэгчдээс үнийн өөрчлөлтийн талаарх мэдээлэл ирж эхэлсэн.

“Өв Соёл” ХХК,

Шинэ ургацынулаанбуудайн худалдан авах үнэ өнгөрсөн оноос өссөн талаарх мэдээллийг авсан. Гурилан бүтээгдэхүүний үндсэн түүхий эдийн үнэ нэмэгдсэнм нь үйлдвэрлэлийн өртөгт нөлөөлөх нөхцөл үүсгэж байна.

Харин “Өгөөж Чихэр боов” ХХК есдүгээр сарын 1-ний өдөр нэрийн бүтээгдэхүүнүүдийнхээ үнийг  200-300 төгрөгөөр тус бүр нэмсэн байна.

11 хувийн өсөлт хэрэглэгчдэд хэрхэн нөлөөлөх вэ

Гол түүхий эдийн үнэ 11 хувиар өссөнийг дагаад гурилан бүтээгдэхүүний үнэ багадаа 11 хувь өсөх хүлээлт бий болж байна. Өсөлтийг тооцохдоо  хэрэглэгчдийн сайн мэдэх бүтээгдэхүүний үнээр жишээ авч үзвэл,

“Талх Чихэр” ХК – Атар талх- 2,700 төгрөг,

“Өгөөж Чихэр Боов” ХХК – Жимстэй боов - 7,000 төгрөгөөр худалдан авна.

Ингэхдээ нэг өрх хоёр хоногт нэг талх, гурван хоногт нэг нарийн боов хэрэглэнэ гэж тооцвол сард 15 ширхэг талх, 10 ширхэг нарийн боов худалдан авна. Өөрөөр хэлбэл,  дээрх хоёр төрлийн бүтээгдэхүүнд зарцуулах сарын зардал 110,500 төгрөгөөс 122,655 төгрөг болж, 12,155 төгрөгөөр нэмэгдэх тооцоо гарч байна.  Жилээр тооцвол нэг өрхийн талх, нарийн боовны зардал 147,900 орчим төгрөгөөр нэмэгдэнэ.

Өөрийн сэтгэгдлээ илэрхийл

Share Tweet