Энэтхэг сургуулиас 50 метрийн зайнд өөх тос, сахар ихтэй хүнс худалдаалахыг хориглох талаар авч үзэж байна
Энэтхэг дунд сургуулиудаас 50 метрийн радиус дотор өөх тос, сахар ихтэй хүнсний бүтээгдэхүүн худалдаалахыг хязгаарласан шинэ журам хэрэгжүүлэхэд ойрхон байна. Тус улсад хүүхдүүдийн дунд таргалалт нэмэгдэж байгаа тул эрүүл бус хүнсний хэрэглээг бууруулах арга хэмжээ авч байгаа нь энэ юм.
Шинэ журам хэрэгжвэл сургуулийн ойролцоо үйл ажиллагаа явуулдаг 1.5 сая гаруй жижиг дэлгүүр, рестораны үйл ажиллагаанд нөлөөлнө. Мөн “PepsiCo”, “Coca-Cola”, “Mondelez”, “Nestle” зэрэг олон улсын томоохон компаниудад нөлөөлөх юм. Дээрх журмаас гадна Энэтхэг улс өөх тос, давс, сахар ихтэй буюу HFSS ангиллын бүтээгдэхүүнд улаан өнгийн анхааруулах шошго байрлуулах талаар авч үзэж байна.
Сургуулийн ойролцоо бизнес эрхэлдэг зарим иргэн эрх баригчдын хэлэлцэж буй журамд санаа зовж эхэлжээ. Тухайлбал, Энэтхэгийн зүүн бүсэд оршдог Бхубанешвар хотод дэлгүүр ажиллуулдаг хэд хэдэн хүн хэлэхдээ борлуулалт нь гуравны нэг орчмоор буурч магадгүй гэж “Reuters” агентлагт ярьсан байна.
Тус хотын нэгэн дэлгүүрээр орсон 15 настай Прияншу Палей хичээлдээ явах замдаа “PepsiCo”-ийн “Uncle Chipps чипснээс хоёр уутыг аваад цүнхэндээ хийжээ. Тэр ээжийнхээ бэлдэж өгсөн хоолны оронд энэ чипсийг иддэг аж. Хүүхдүүдийн ийм зуршлыг өөрчлөх нь Энэтхэгийн авч үзэж буй шинэ бодлогын гол зорилгуудын болжээ.
Шинэ зохицуулалтыг батлах ажлыг удирдаж буй Энэтхэгийн Хүнсний аюулгүй байдал, стандартын газрын дарга Ражит Пунхани хэлэхдээ, “Аюулгүй хүнс” хөтөлбөр нь хүүхдүүдийг багаас эрүүл бус хооллолтын зуршлаас хол байлгахад чиглэж байна гэсэн юм.
Тэрбээр “Reuters” агентлагт тус зохицуулалтын талаар ярихдаа “Хүүхдүүдийг ийм бүтээгдэхүүн хэрэглэхээс нь татгалзуулах хэрэгтэй. Бага наснаас нь дадал болгох ёстой” гэж хэлжээ. Шинэ журам бизнесүүдэд томоохон нөлөө үзүүлэхгүй, дэлгүүрүүд HFSS ангилалд багтдаггүй хүнс худалдаалах боломжтой гэж Пунхани нэмж хэлсэн байна.
Одоо яригдаж буй журмыг анх 2020 онд санаачилсан ч хэзээнээс хэрэгжиж эхлэх нь тодорхойгүй байна. Хүнсний аюулгүй байдал, стандартын газар хоол хүнсний стандарт хангасан байдлыг сайжруулахын тулд наймдугаар сард өөх тос, давс, сахрын агууламжийн босго хэмжээг нийтэлжээ. Эдгээр хэмжээнээс давсан бүтээгдэхүүнийг сургуулийн дотор болон ойролцоо худалдаалахыг хязгаарлах юм.
Сүүлийн жилүүдэд “Lay's”-ийн чипс, “Cadbury”-гийн шоколад, “Maggi”-гийн гоймон зэрэг боловсруулсан хүнсний бүтээгдэхүүний хэрэглээ Энэтхэгт нэмэгджээ. Хооллолтын хэв маяг өөрчлөгдөхийн хэрээр Энэтхэгт илүүдэл жинтэй болон таргалалттай 5-19 насны хүүхдийн тоо өссөн байна. Дэлхийн Таргалалтын Холбоо мэдээлснээр 2015 онд Энэтхэгт тухайн насны бүлгийн илүүдэл жинтэй хүүхэд 28 сая байсан бол 2025 онд 50 орчим хувиар өсөж 41 саяд хүрчээ. 2040 онд энэ тоод 56 саяд хүрэх төлөвтэй байна.
Эх сурвалж: Reuters
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.