Испанид 69 хүн амь үрэгдсэн төмөр замын осол гарсан тул Тээврийн сайд нь огцорлоо
Өнгөрсөн долоо хоногт Испанийн Урда хотын ойролцоо хоёр галт тэрэг мөргөлдсөний улмаас 69 хүн амь үрэгдсэн том осол гарсан. Тус улсын Тээврийн сайд Оскар Пуэнте мягмар гарагт /2026.11.03/ мэдэгдэл хийхдээ ослын улмаас ажлаа хүлээлгэн өгч, огцорно гэжээ.
Испанийн Ерөнхий сайд Педро Санчесийн Социалист намын гишүүн болох Пуэнте хэлэхдээ, албан тушаалаа хүлээлгэн өгөх нь улс орон болон ардчилалд тустай алхам болно гэсэн байна. Тэрбээр “Бүх улстөрч адилхан гэдэг нь худлаа” гэж хэлээд, огцрох шийдвэр нь улс төрийн хариуцлага хүлээж байгаа явдал хэмээсэн юм. Мөн Пуэнте намынхаа итгэлийг алдахгүй байх үүднээс дараагийн сонгуульд нэр дэвшихгүй гэдгээ зарлажээ.
Тэрбээр огцрох шийдвэрээ Испанийн Конгрессын хурлын үеэр мэдэгдсэн юм. Хурлын үеэр Пуэнте осол гарсан Мадрид-Севилья чиглэлийн өндөр хурдны төмөр замын аюулгүй байдлыг өмгөөлж үг хэлжээ. Тэр “Энэ шугамыг орхиж эсвэл мартсан зүйл байхгүй” хэмээж, засгийн газраас 780 сая еврогийн шинэчлэл хийхээр төлөвлөснийг дурдсан байна.
Энэ жилийн нэгдүгээр сард Мадрид-Севильягийн шугам дээр яг адил хоёр компанийн галт тэрэг мөргөлдсөн томоохон осол гарсан. Тус ослын улмаас 46 хүн амь үрэгдсэн юм.
Эх сурвалж: Euro News
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.