Л.Гантөмөр, Т.Доржханд нарт Шадар сайдын суудал өгч, Г.Лувсанжамцыг сайдаар томилон, яамдын нэр өөрчилнө

Хөшигний ард яригдаж буй АН-ын дарга Л.Гантөмөр, ХҮН намын дарга Т.Доржханд нарт Шадар сайдын суудал өгч, яамдын тоог хэвээр барих ч албан нэршил, чиг үүргийг нь өөрчлөх Засгийн газрын шинэ бүтцийн талаарх мэдээллийг хүргэж байна.

-Эдийн засгийн хөгжлийн яамыг Т.Доржхандад, одоогийн С.Амарсайханы суудлыг Л.Гантөмөрт өгнө-

Засгийн газрын тухай одоогийн хуулиараа хоёр Шадар сайдын статустай юм.

Сануулбал, Ч.Хүрэлбаатарыг Эдийн засгийн хөгжлийн сайд болох үед Засгийн газрын тухай хуульд өөрчлөлт оруулж, "Шадар сайд бөгөөд эдийн засгийн хөгжлийн сайд" гэсэн нэршил нэмж байв. Уг суудлыг парламентад найман суудал авсан ХҮН намын дарга Т.Доржхандад өгөх нь үндсэндээ тодорхой байна.

Харин одоогийн С.Амарсайханы суудлыг АН-ын дарга Л.Гантөмөрт өгөх хувилбартай байна.

Сануулбал, Д.Амарбаясгалангийн дэмжлэг, лоббигоор С.Амарсайханыг Шадар сайдаар "хүчээр" томилсон ч чиг үүрэгт нь хамаарч байсан агентлагуудыг салгаж авсаар, үндсэндээ "Зуд турхан хариуцдаг сайд"-ын хэмжээнд жижигрүүлж, шүдгүй арслан болгосон албан тушаал юм. Уг суудлыг Л.Гантөмөрт өгснөөр зуд турхны сайдын сэлгээ хийгдэхээр байна.

Харагдах байдлаараа МАН-ын дарга Л.Оюун-Эрдэнэ АН, ХҮН намын даргыг Засгийн газартаа урьж, өөрийнхөө яг доор Шадар сайд гэх албан тушаалд залчхаж байгаа хэлбэр.

Гэвч Т.Доржханд Шадар сайд хийхгүй, ерөнхий чиг үүргийн Эдийн засгийн хөгжлийн салбараа л тэргүүлэх юм. АН-ын дарга Л.Гантөмөр ч тэр одоогийн Ерөнхийлөгч У.Хүрэлсүхийг улс төрийн тавцанд мандуулж байсан Шадар сайдын чиг үүргээс мөлжигдсөөр өмх төдий үлдсэн эрхийг л бэлгэдэл байдлаар хэрэгжүүлэх нюанстай.

-ХҮН нам БШУЯ, АН эрчим хүч, ХНХ, Барилга хот байгуулалт зэрэг яамдуудыг авахаар нэхжээ-

Нийт 126 гишүүндээ үндсэн чиг үүргийн 4, чиглэлийн 12 яам, Шадар сайд, Түгжрэл хариуцсан дарга гэсэн нийт 18 сайдын суудлыг намуудын гишүүдийн тоонд ногдуулан хуваах байдлаар Засгийн газрын гишүүнийг томилох зарчим баримтлахаар буй. Энэ тооцооллоор бол,

• Парламентад 64 суудалтай МАН 10 сайд,
• Парламентад 42 суудалтай АН 6-7 сайд,
• Парламентад 8 суудалтай ХҮН нам 1 сайдын албан тушаал ногдож байгаа.

ХҮН намд эрх баригчид нэг сайдын суудал өгч, ам хаах гаргалгааг чухалчилна. Харин ХҮН намаас "боловсролтой" гэх имиджээрээ БШУЯ-ыг П.Наранбаярт өгөх саналыг МАН-д тавьсан аж.

Харин АН-аас Эрчим хүч, БШУ, Барилга хот байгуулалт зэрэг чухал яамдуудыг авах яриа үүсгээд байна. Мэдээж эрх баригчид ХҮН намын ч, АН-ын ч "тэнгэрийн" хүслийг тааллаар нь болгохгүй. Тэд том санал хэлээд, доош унахдаа эвтэйхэн шиг яам өгөх, тийм тооцооллыг л хийсэн гэсэн үг.

Одоогоор АН-д Хөдөлмөр нийгмийн хамгааллын яамыг өгөх нь тодорхой байна. Уг салбарыг ахалж байсан Х.Булгантуяаг Л.Оюун-Эрдэнэ танхимдаа ажиллуулахгүйн тулд УИХ-ын дэд даргаар томилж, "явуулсан" юм.

-Яамдын тоо нэмэхгүй, нэр өөрчлөх хувилбар дэмжигдэх магадлал өндөр байна-

Яамдын тоог 21-25 болгох хувилбар яригдаад нэлээд удав. Гэвч яамдын тоог нэмэхгүй гэдэг дээр Ерөнхий сайд Л.Оюун-Эрдэнэ АН, ХҮН намтай тохирсон гэх мэдээлэл байна. Гэхдээ чиг үүргүүдийг нь нэлээд өөрчилж, нэршил мөн өөрчлөх хувилбар яригдаж байна. Тухайлбал,

• ХНХЯ-ыг: Гэр бүл, нийгмийн хөгжил,
• УУХҮЯ-ыг: Аж үйлдвэр, эрдэс баялгийн,
• БХБЯ-ыг: Хот байгуулалт, орон сууцжуулалтын,
• Соёлын яамыг: Аялал жуулчлал, соёл, спорт, залуучуудын гэхчлэн өөрчлөхөөр тооцжээ.

Нэршлээ ингэж өөрчлөх үү. Чиг үүргийг нь ингэж детальчлах уу гэдэг хувилбар дээр одоо ярилцаж байгаа аж. Ийм өөрчлөлтөөр дамжуулан, төрийн албаны бүтцийг 20-30 хувиар багасгаж, яамдын төвлөрөх асуудлыг бүтцээр дамжуулан өөрчилнө гэх ерөнхий зураглалтай байна.

-Дэд сайдын суудлыг алга болгож, жагсаалтаас Г.Лувсанжамцыг сайдаар томилно-

Төрийн албыг багасгах, нүсэр бүтцийг нь хумих замаар яамдын дэд сайдын суудлыг байхгүй болгох хувилбар нэлээд түлхүү яригдаж байна. МАН өнгөрсөн хугацаанд дэд сайдын суудалд УИХ-д өрсөлдөх боломжтой дүрүүдээ томилж, танигдах боломж олгож байсан.

Энэ удаа олон нийтийн шүүмжлэлд явдаг уг албан тушаалыг авч хаях шийдвэрт ойрхон байгаа аж.

Мөн өмнө нь Л.Оюун-Эрдэнэ Засгийн газраа бүрдүүлэхдээ хоёроос дээш удаа УИХ-д сонгогдсон, байнгын хороо ахалж байсан зэрэг зарчимд үндэслэж, танхимд ажиллах гишүүнээ нэрлэж байв.

Харин энэ удаа шинээр УИХ-ын гишүүн болсон нөхдөөс цөөн хэдийг нь танхимдаа оруулах чигтэй байна.

МАН ч, АН ч дотооддоо жагсаалтаар УИХ-ын гишүүн бологсдоос сайд томилохгүй гэдэг зарчим барихаа илэрхийлсэн байдаг. Гэвч МАН-ын жагсаалтыг тэргүүлсэн хот төлөвлөлтөөр мэргэшсэн Г.Лувсанжамцыг Түгжрэл хариуцсан сайдаар томилох чигтэй байна.

Ингэхдээ 2024 оны УИХ-ын оснгуульд хотод дэвшүүлсэн мөрийн хөтөлбөрийнхөө "20 минутын хот" нэршилд ойртуулж, Түгжрэл хариуцсан сайдын чиг үүрэг, нэршлийг өөрчлөхөөр тооцсон гэх мэдээлэл байна.

-Сайдын суудлаа Ерөнхийлөгчийн хүмүүс түлхүү хадгална-

Одоогоор Сангийн сайд Б.Жавхлан хэвээр үлдэж, Н.Учралыг ЗГХЭГ руу татах чигтэй байна. Эдгээр суудлуудад Ерөнхийлөгч У.Хүрэлсүхийн нөлөө өндөр байгаа юм.

Улмаар Ерөнхийлөгчийн дэмжлэгээр Гадаад харилцааны сайд Б.Батцэцэг, БОАЖ-ын сайд Б.Бат-Эрдэнэ, БШУ-ы сайд Л.Энх-Амгалан нар суудлаа авч үлдэх өндөр амбиц, магадлалын эздээр нэрлэгдсэн.

Ийм байдлаар Засгийн газрын шинэ бүтцийг харвал, гаднаас АН болоод ХҮН намын төлөөлөлтэй, дотоодоосоо Ерөнхийлөгчийн хүмүүсийн суудлыг хадгалсан бүрдүүлбэр үүсэхээр байна.

МАН-ын дарга Л.Оюун-Эрдэнийн хувьд эрчим хүч, боловсрол, хот байгуулалт, баялгийн сан зэрэг томоохон агуулгад голчлон анхаарч, Засгийн газрыг тогтвортой бодлого хэрэгжүүлэх ёстой гэсэн агуулгаар байр сууриа илэрхийлээд байгаа юм.

Энэ мэдээнд өгөх таны үнэлгээ

Хуваалцаарай Жиргээрэй