Хэргийн мөрөөр: Удаан хугацаанд гэр бүлийн хүчирхийлэлд байсан эмэгтэй нөхрийнхөө гарт амиа алдлаа

Нөхөртөө зодуулсны улмаас 38 настай эмэгтэй амиа алдсан хэрэг таван хоногийн өмнө буюу 10 дугаар сарын 03-ны өдөр гарсан билээ. Тодруулбал, хохирогч эмэгтэй өнгөрөгч есдүгээр сарын 27-ны өдөр нөхөртөө зодуулж ГССҮТ-д хүргэгдэж ирээд зургаа хоног хэвтэн эмчлүүлсэн ч дотор цус алдалтын улмаас нас барсан байна.

Талийгаач гурван хүүхдийн ээж, эхээс тавуулаа байжээ

Талийгаачийн найз “Амиа алдсан Н 1986 онд Увс аймгийн Тэс суманд төрсөн. Аав ээжийнх нь хувьд нутагтаа нэртэй, ажилсаг, сайхан буурлууд байдаг. Талийгаач минь хүн бүхэнтэй найрсаг сайхан харилцаатай эмэгтэй байлаа. Нөхөр Э-тэй суугаад 10 гаруй жил болохдоо гурван сайхан үрийг нь ээж гэх алдраар овоглож амьдарсан багш бүсгүй байсан.

Эхээс тавуулаа хэдий ч нэг ах нь хорвоогийн мөнх бусыг үзүүлсэн. Одоо тэр минь ч гэсэн ахтайгаа уулзахаар явчихлаа. Бидэнд хүнд л байна. Хорвоогийн жамаар бус зуурдаар, тэр дундаа хамгийн ойр дотно хүн болох нөхрийнхөө гарт амиа алдчихлаа. Ард нь бүлтийгээд үлдэх үрс нь яаж бэтгэрэх бол гэхээс л. Нэг нь шороонд нөгөө нь шоронд орох болчихлоо.

Уг нь тэр нөхөр нь цагдаа байсан. Увс аймгийн Баруунтуруун, Малчин, Тэс гэх мэт сумдын хэсгийн төлөөлөгчөөр ажиллаж л явсан. Эхнэрээ зодсон энэ үйлдэл нь анхных биш. Өмнө нь бас л хэвтэрт ортол нь зодож, зовоож байсан ч хүүхдүүдээ бодоод л уучлаад амьдраад байгаа тухайгаа ярьж байлаа.

Нутаг усны хүмүүс нь хэдийн зоддог, зодуулдаг тухайг нь мэдэж анзаарсан тул хэдэн жилийн өмнө цагдаагийн ажлаа өгөөд хотод том машины жолооч хийж хувиараа аж амьдралаа залгуулж амьдарч эхэлсэн. Гэсэн ч хүний дотоод мөн чанар, хүчирхийлэгч шинж нь бүдгэрэхгүй юм. Олон удаагийн архи уулт, гэр бүлийн хүчирхийллийг нь тэвчсэнийх нь хариуд нэг л өдөр амийг нь хөнөөхдөө тулжээ.
ГССҮТ-д 10 орчим хоносон бөгөөд гэдсэндээ хүчтэй цохиулсны улмаас дотор цус алдалтаас үүдэж нас барсан тухай эмчийн амнаас л бид сонслоо. Дөнгөж 38 настай залуухан тэр минь харгис нөхрийн гарт л явчихлаа, бидэнд маш хүнд байна” гэж хэлээд яриагаа зогсоов.

Ойрын эх сурвалж “Тэр хоёртой ойр байсан хүний хувьд хэлэхэд их маргаантай л харагддаг байсан. Нэгэндээ хүндлэлгүй хандана, хажууд нь хүн байгааг мэдэх ч үгүй цохиод л авна. Нөхөр нь угтаа бол даруу төлөв зантай гэхдээ түргэн ууртай. Амиа алдсан Н ч ялгаагүй л шартай, түргэн зантай. Гэсэн ч тэднийг биеийнхээ аминд хүрчихсэн гэхээр санаанд яавч багтаагүй. Энэ тухай сонсоод хэдэн өдрүүдэд унтаж ч чадахгүй, үнэн гэж итгэж чадахгүй л өнгөрч байна. Бидэнд ингэж санагдаж байхад үр хүүхдүүдэд нь яасан хүнд байгаа бол. Хатуу ч юм даа” гэв.

-38 настай эмэгтэй Н өнгөрөгч есдүгээр сарын 27-ны өдөр 40 настай Э-д зодуулж хөхөрсөн шархтай ГССҮТ-д хүргэгдэж ирээд нас баржээ-

Энэ тухай ЦЕГ-аас тодруулахад “Цагдаагийн байгууллагад энэ оны 10 дугаар сарын 03-ны өдрийн 19.50 цагт “Нөхөртөө зодуулж гэмтсэн эмэгтэй ГССҮТ-ийн хүлээн авах тасагт ирээд нас барлаа” гэсэн мэдээлэл ирсэн. Тус мэдээллийн дагуу шалгахад 38 настай эмэгтэй Н өнгөрөгч есдүгээр сарын 27-ны өдөр 40 настай Э-д зодуулж хөхөрсөн шархтай ГССҮТ-д хүргэгдэж ирээд нас барсан нь тогтоогдсон. Одоогоор тус хэргийн талаарх мөрдөн шалгах ажиллагааг үргэлжлүүлж байна” гэсэн мэдээллийг өглөө.

Эрүүгийн тухай хуулийн 10.1-ийн 2.8-д
Хүнийг гэр бүлийн хүчирхийлэл үйлдэж алсан бол 12-20 жил хүртэл хугацаагаар, эсхүл бүх насаар нь хорих ял шийтгэнэ хэмээн заасан байна.

Он гарснаас хойш есөн сарын хугацаанд Монгол Улсын хэмжээнд нийт 32,492 гэмт хэрэг бүртгэгдсэн байна. Үүнээс хамгийн их буюу 22941 хэрэг Улаанбаатар хотод бүртгэгдсэн аж. Улсын хэмжээнд,

• Хүний амийг хөнөөсөн хэрэг 140
• Хүний амийг болгоомжгүйгээр хохироосон хэрэг 66
• Харин гэр бүлийн хүчирхийллийг тухай дуудлага мэдээлэл 104 бүртгэгдсэн байна

Үүнээс Улаанбаатар хотод 

• Хүний амийг хөнөөсөн хэрэг 78
• Хүний амийг болгоомжгүйгээр хохироосон хэрэг 17
• Харин гэр бүлийн хүчирхийллийн тухай 28 дуудлага бүртгэгдсэн байна.

Энэ тоо бол цагдаагийн байгууллагад л бүртгэгдсэн мэдээлэл юм.

Гэр бүлээ бүтэн байлгамаар байна, өнөөдөртөө л эрүүлжүүлэх байранд хонуулчих

Цагдаагийн ажилтан “Гэр бүлийн хүчирхийллийн дуудлага ялангуяа шөнийн цагаар ирэх тохиолдол олон. Гэрт нь явж ороод болсон асуудлыг шалгахад “архи, мансууруулах бодис хэрэглэсний улмаас гэр бүлийн хүчирхийлэл үйлдчихлээ, юу ч санахгүй байна” гэх хариултын хүчирхийлэгч талаас өгдөг. Улмаар хохирлоо барагдуулах уу, та гомдолтой байна уу хэмээн хохирогч талаас асуувал “гэр бүлээ бүтэн байлгамаар байна, өнөөдөртөө л эрүүлжүүлэх байранд хонуулчих” гэхээс өөр зүйлгүй. Маргааш нь хэлтэс дээр ирээд мэдүүлгээ буцаая гэдэг.

Ингэж явсаар тэр хүчирхийлэгч улам хүчирхэг болж өмнөх хэргээсээ давж, эсвэл давтаж шинэ хэрэг үйлдээд хүрээд ирдэг. Уг нь хуультай оронд амьдарч байгаагийнхаа хувьд өөрийнхөө хохирол, өөрт тулгарсан асуудлаа чангаар дуугарч шийдвэрлүүлэх эрх хэн бүхэнд нээлттэй бий. Үнэхээр хэцүү байгаа бол хүчирхийлэгчээс холд, тэр шийдвэр таны гарт л байдаг” хэмээв.

О.УНДРАЛ

Энэ мэдээнд өгөх таны үнэлгээ

Хуваалцаарай Жиргээрэй