25 дахь удаагийн өвлийн олимпод ойролцоогоор 3,500 тамирчин оролцож, спортын 16 төрөл, 116 тэмцээнд 19 хоногийн турш медалийн төлөө өрсөлдөх юм.
Өвлийн олимпийн нээлт хоёдугаар сарын 6-нд болох бөгөөд нээлтийн ёслол анх удаа олон байршилд зэрэг зохион байгуулагдана. Гол үйл ажиллагаа Милан хотын 80,000 хүний суудалтай Сан-Сиро цэнгэлдэхэд төвлөрнө. Үүний зэрэгцээ Предаццо, Ливиньо, Кортина д’Ампеццо хотуудад тэмцээний бүсүүдээрээ төлөөлөгчид жагсана. Итали болон олон улсын уран бүтээлчид оролцох бөгөөд АНУ-ын поп од Мэрайя Кэри тайзнаа гарах төлөвтэй.
Мөн 60,000 орчим үзэгч оролцоно гэж тооцоолжээ. “Милан–Кортина”- 2026 нь түүхэн дэх хамгийн өргөн хүрээтэй байршилтай өвлийн Олимп болно. Тэмцээн дараах дөрвөн үндсэн бүст хуваагдана
- Милан
- Вальтеллина (Бормио, Валдизотто, Ливиньо)
- Кортина (Антерсельва / Анхольц орно)
- Валь ди Фьемме (Предаццо, Тезеро)
Мөн Верона хот хаалтын ёслолыг хүлээн авч, 3-р сарын 6-нд Паралимпын нээлтийг зохион байгуулна. Итали улс Олимпыг дөрөв дэх удаагаа зохион байгуулж байна.Цанын уулын авиралт (Ski Mountaineering / Skimo) анх удаа Олимпын төрөл болно.
“Милан–Кортина”- 2026 нь хүйсийн хувьд хамгийн тэнцвэртэй өвлийн Олимп болох бөгөөд эмэгтэй тамирчдын эзлэх хувь 47 хувиас давах төлөвтэй байна.
Т.ГЭРЭЛТ-ИРЭЭДҮЙ
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.