Авилгач, ажил хийдэггүй, бүлэглэлүүдэд үйлчлэгсдэд албан тушаал өгөгч У.Хүрэлсүх ичиг ичиг

Бид нийтлэлийн бодлогын хүрээнд ердөө хоёр хоногийн өмнө “Амьгүй” ТАЗ-өө чангалж, агентлагийн дарга нараа СОРЧИЛЖ сонгоорой, МАН-ын лидерүүд ээ” нэртэй нийтлэл бичиж, томилгоогоо зөв хийхийг уриалж байв.

Учир нь, МАН-ын дарга тэргүүтнүүд УИХ-д нэр дэвшээгүй, намдаа их мөнгө гаргасан, мөнхүү өөрсдийн үгээр удирдаж болох мөлгөр хүмүүсээ сонгоод сайд, дэд сайдын суудлуудыг хэдийнэ өгчихсөн.

Тиймээс ч агентлагийн дарга нараар жинхэнэ ажил явуулдаг, тархи нь гүйдэг, супер менежмент хийчихдэг хүмүүсээ сонговол Засгийн газар гялгар харагдах боломжтой гэсэн санааг дэвшүүлж байв.

Гэтэл өчигдрийн /2020.07.22/ Засгийн газрын хуралдаанаар хийсэн томилгоонууд олон нийтийг жинхэнэ гонсойлгов.

Ерөөс Засгийн газрын хийсэн томилгоог харахад, шинэ юм байхгүй. Хуучин ажиллаж байсан, бүтээгч бус, ордны өрөө хэсээд явдаг хэдэн бүлэглэлүүдийн төлөөллийнхөө албан тушаалыг хооронд нь сэлгэхчээ аядав.

-ДАРГЫН СЭНТИЙГЭЭС ХОЦОРДОГГҮЙ Д.ЗАГДЖАВ-

Д.Загджавыг ШШГЕГ-ын даргаар томилов. Энэ удаагийн албан тушаалын томилгооны бялуунаас тэр хоцорсонгүй. Д.Загджавт Монголын төр өртэй юу, МАН өртэй юу. Албан тушаалд мөнхийн татаастайгаар шургаж ирлээ. Өмнөх засагт Уул уурхайн хүнд үйлдвэрийн дэд сайд, шинэ засагт ШШЕГ-ын дарга. Тэр хуулийн байгууллагад хоёрхон жил ажилласан намтартай.

МАН ялах бүртээ Д.Загджавт албан тушаал өгч ирсэн. “Нам төрдөө олон жил зүтгэсэн хүн тул албан тушаал өгөхгүй бол  горьгүй нь” гэж үглүүлсээр дэд сайдын сэнтийд заларсан хүн бол Г.Загджав. Уул уурхай, хүнд үйлдвэрийн яаманд дэд сайдаар очсоноосоо хойш түүнд хийж гийгүүлсэн ажил ховор.

Төрийн ордонд сайд, дарга нарын өрөө хэсээд эсвэл “Сод Монгол”-ын оффисоор маш ихээр үзэгддэг. Товчоор бол Ц.Анандбазарын хүн гэгддэг. Нэг том цүнх сугавчилсан сүрхий даргын дүртэй. Гэвч юу ч хийдэггүй хирнээ асар их эрх ашигтай, эрх мэдэлтэй.

-ХАМГИЙН ИХ ОРЛОГО ОЛСОН ДЭД САЙДААР ЦОЛЛУУЛЖ АСАН Т.ГАНТУЛГА МХЕГ-ЫН ДАРГА БОЛОВ-

Эрчим хүчний дэд сайд асан Т.Гантулга Н.Цагаанхүүгийн оронд МХЕГ-ын даргын суудалд очив. Шуудхан хэлэхэд түүнийг Ж.Бадамжунайгийн хүн гэдэг. Ерөнхийлөгч, Ж.Бадамжунай хоёрыг холбогч гол гүүр нь болдог.

Дэд сайдаар ажиллаж байхдаа хамгийн их орлого олсон сайдаар нэрлэгдэж байв.

Түүх нийгмийн багшаас эхлээд Улс төрийн шинжлэх ухааны доктор, профессор, PhD болтлоо сурч амжжээ. Говь-Алтай аймгийн МХЗЭ-ийн хороонд зохион байгуулагчаас ажлын гараагаа эхэлж байсан тэрбээр хувийн компанийн гүйцэтгэх захирлаас улс төрд орж ирсэн. 2000 онд улс төрд орж ирсэн цагаасаа МАН-ын албан тушаалын бялуунаас мөн л хоцроогүй нэгэн.

-У.ХҮРЭЛСҮХ УЛСТӨРИЙН ЗӨВЛӨХ Б.ЦЭНГЭЛЭЭ ТӨБЗГ-ЫН ДАРГЫН СЭНТИЙД ЗАЛАВ-

У.Хүрэлсүх өөрийн тойрон хүрээлэгчдээ мөнхийн албан тушаалтай байлгадаг. Түүний нэг нь Б.Цэнгэл. Тэрээр У.Хүрэлсүхийн тэргүүлсэн Засгийн газар байгуулагдсаны “Монголын төмөр зам” ТӨХК-ийн захирлаар суусан. Улмаар 2019 онд ажлаа өгч, Ерөнхий сайд У.Хүрэлсүхийн улс төрийн зөвлөхөөр томилогдсон.

Одоо тэр дараагийн албан тушаалын бялуугаа хүртэж ТӨБЗГ-ын даргаар томилогджээ. Б.Цэнгэл нь МАН-ын дарга У.Хүрэлсүхийн дотнын найз.

НИТХ-ын зохион байгуулагчаас УИХ-д нэр дэвших хүртлээ юу эсийг үзсэн гэхэв. Шүүхийн ерөнхий зөвлөлд менежер, Нефть, онцгой албан татварын гаалийн газарт албаны дарга, Гаалийн Ерөнхий газрын дарга зэрэг төрийн албаны сор болсон суудалд заларсаар ирсэн билээ.

-Н.ЦАГААНХҮҮ ЗГХЭГ-ЫН ДЭД ДАРГЫН СУУДАЛД ЗАЛАРНА-

Эрчим хүчний дэд сайд асан Т.Гантулга ийнхүү Н.Цагаанхүүгийн оронд МХЕГ-ын даргын суудал очсон тул Н.Цагаанхүүг У.Хүрэлсүхийн засгийн газар ямар албан тушаал руу “татах вэ” гэдэг асуулт одоо яригдана. Нөгөө талд ЗГХЭГ-ын дэд даргын ажлаа М.Баярмагнай өгч, одоо Т.Гантулгын оронд Эрчим хүчний дэд сайдын суудалд суугаад буй. Тэгэхээр Н.Цагаанхүүг М.Баярмагнайн оронд буюу ЗГХЭГ-ын дэд даргаар томилогдоно гэсэн мэдээлэл байгаа юм.

МХЕГ-ын Хил хорио цээрийн хэлтсийн дарга асан Н.Баярсайхан оймсондоо 10 мянган ам.доллар нууж байгаад АТГ-ынханд “гардуулсан”.

Энэ үед тус газрыг Н.Цагаанхүү удирдаж байсан ч, хариуцлага хүлээж албан тушаалаасаа огцроогүй. Хамар доороос нь авлигачид төрж, үржиж буй асуудлын гална Н.Цагаанхүү “Чимээгүй үлдсэн” билээ.

-У.ХҮРЭЛСҮХ НАСАН БАГЫН НАЙЗ Х.ХЭРЛЭНГЭЭР ЭРДЭНЭТ ҮЙЛДВЭРИЙГ УДИРДУУЛАХ УУ-

У.Хүрэлсүхийн мөнхийн татаасуудын нэг Х.Хэрлэн. Тэд насан багын найзууд. 2017 онд Засгийн газрын шинэ тэргүүнээр сонгогдонгуутаа АМГТГ-ын даргаар Х.Хэрлэнг томилсон. Тухайн үедээ түүний нэр Эрдэнэт үйлдвэрээс эхлээд хэд хэдэн газарт томилогдох сураг гарч байсан ч АМГТГ-т очсон.

Харин эл шуум өнөөгийн томилгооны үеэр дахин гарч ирэв.

Түүний хувьд кадастрын Х.Хэрлэн гэдгээрээ уул уурхайн салбарынхан дундаа танигдсан. Кадастрын алба байгуулагдсан цагаас эхэлж ажиллаж, даргын суудал руу өгссөн гэдэг.

Ерөнхийдөө албан тушаалын бялууг жигдхэн хуваарилж хэн хэнд нь өрөө төлж, гомдоохгүй гэсэн томилгоо явагдав. Үүнд мэргэшсэн мэргэжлийн байх нь огт падлийгүй. Тиймээс хооронд нь сайхан гэгч хольж, сольж ээлж дараалан Монгол төрийг сандайлуулж буй юм. У.Хүрэлсүх ЖДҮ-чдийг, бизнесийн бүлэглэлүүдийн төлөөллийг албан тушаалд томилохгүй гэж хатуу хэлж байсан. Сайд нарын томилгоогоо овоо гайгүй хийчихсэн. Харин агентлагуудын дарга нар дээр тэр жинхэнэ хувийн тоглолт хийж, томоохон бизнесийн бүлэглэлүүдийн төлөөллүүдийг албан тушаалд тахин залав.

У.УЯН

Өөрийн сэтгэгдлээ илэрхийл

Share Tweet