Ё.Баатарбилэг: Их дээд сургуулиудыг нэгтгэх бодлого хэрэгжүүлнэ

Өнөөдөр /2019.08.20/ БСШУСЯ-ны байранд хичээлийн шинэ жилийг ултан тус яамнаас сургууль, цэцэрлэгийн бүртгэл, элсэлт, зөвөлгөө өгөх хэвлэлийн бага хурлын зохион байгууллаа.

НИЙСЛЭЛД ӨВЛИЙН УТААНЫ ҮЕЭР, ОРОН НУТАГТ МАЛ ТӨЛЛӨХ ҮЕЭР СУРГУУЛИЙН ХҮҮХДҮҮДИЙН УРТ ХУГАЦААНЫ АМРАЛТЫГ ТОГТООЖЭЭ

2019-2020 онд улсын хэмжээнд ерөнхий боловсролын 850 гаруй сургууль, нийт 644 мянган хүүхэд ЕБС-д элсэн суралцана. Энэ нь өмнөх жилийнхээс 8.6 орчим хувиар хүүхдийн тоо нэмэгдсэн үзүүлэлттэй байна. Цэцэрлэгийн хүүхдийн тоо 275800 буюу өмнөх жилээс 15 мянгаар нэмэгдэж байна. Үндсэндээ цэцэрлэг болон сургуулийн насны хүүхдийн тоо 65 мянгаар нэмэгдсэн байна.

Түүнчлэн ЕБС-д 44 мянга орчим багш, цэцэрлэгт 10 мянга орчим багш, Их дээд сургуульд 7 мянга орчим багш, 140 мянга орчим оюутан суралцана. Энэ жилийн их дээд сургуулийн оюутнуудын элсэлт маш бага буюу 10 мянга орчим хүүхэд элссэн. Жилд дунджаар 30-40 мянган оюутан элсдэг байсан ажээ.

Энэ хичээлийн жилд боловсролын яам хөтөлбөрийн шинэчлэл хийсэн бөгөөд багш нарт цагаа зохицуулах, суралцагчдын чанарыг ахиулах, агуулгийн хоцрогдолгүй ажиллах, багш нарт нэмэлт ачаалал өгөхгүй байх зэрэг 11 зорилго зорилтыг тавьж ажилласан байна.

Хичээлийн жилийн бүтэц энэ жил эрт батлагдсан. Бага анги 32 долоо хоног, дунд анги 33 долоо хоногоор нийслэл, орон нутаг ялгаатай байхаар баталсан. Нийслэлд өвлийн утааны үеэр, орон нутагт мал төллөх үеэр тус тус урт  амраахаар болсон.

Иймд эцэг эхчүүд батлагдсан хөтөлбөрөөс хүүхдийнхээ амралтыг мэдэх боломжтойг онцоллоо.

ЭНЭ ХИЧЭЭЛИЙН ЖИЛД 48 СУРГУУЛЬ, 93 ЦЭЦЭРЛЭГ АШИГЛАЛТАНД ОРОХООР ТООЦООЛСОН

БСШУС-ын сайд Ё.Баатарбилэг:

“Боловсролын яам 2019 онд гурван том зорилт тавьсан. Нэгдүгээрт, хууль эрх зүйн шинэчлэлтэй холбоотойгоор салбарын эрх зүйн орчныг боловсронгуй болгоно. Хоёрт, салбарын хөрөнгө оруулалтын үр нөлөөг сайжруулна. Гуравт, салбарын дотоод үйл ажиллагааг сайжруулна гэсэн зорилтуудыг тавьж ажилласан. Энэ хүрээнд олон ажлуудыг хийж гүйцэтгэлээ.

Монгол улсын засгийн газрын зүгээс энэ жил хүүхэд бүрийг цэцэрлэгт хамруулья, гурван ээлжээр хичээллэдэг сургуулийг хоёр ээлжийн болгоё гэсэн зорилт тавьсан. Энэ хүрээнд 21420 хүүхдийн суудал бүхий 48 сургууль ашиглалтанд оруулж, 13 мянган хүүхдийн суудалтай 93 цэцэрлэг ашиглалтанд орохоор тооцоолсон.

ЭНЭ ЖИЛ БҮХ ХҮҮХЭД БҮР СУРАХ БИЧГЭЭ СУРГУУЛИАСАА ТҮРЭЭСЛЭХ БОЛОМЖТОЙ

2019-2020 оны хичээлийн шинэ жилд сурах бичгийн хүрэлцээ, хангамжийг нэмэгдүүлэхээр Азийн хөгжлийн банктай урт хугацаанд харилцан зөвшилцсөний эцэст санхүүжилт авсан байна.

Үүний үр дүнд энэ жил бүх хүүхэд сурах бичгээ сургуулиасаа түрээслэн хэрэглэх боломжтой болж байна. Иймд гадуур худалдаанаас авах хэрэггүй болсон.

ИРГЭНИЙ БОЛОВСРОЛ ХИЧЭЭЛИЙН АГУУЛГЫГ БҮРЭН ШИНЭЧИЛСЭН

Мөн иргэний боловсролын хичээлийг 1-5-р ангийн хүүхдүүдэд Монгол ёс, хүмүүжлийн хичээл болгон шинэчилсэн. Харин 6-12-р ангийн хүүхдүүдэд Иргэний ёс зүйн хичээл орох юм.

Энэхүү хичээл шинээр боловсруулагдсан учир нэмж сайжруулах зүйл бий. Иймд боловсролын яамнаас шинэчлэл хийх шаардлагатай сурах бичгүүдийг сайжруулж шинэчилж байхаар болсон.

Түүнчлэн бага ангийн багшийн хичээлийн цаг багассан. Хөтөлбөрүүдийн агуулгыг давхцсан асуудлыг арилган шинэчилсэн.

ИХ ДЭЭД СУРГУУЛИУДЫН ТӨЛБӨР 1.6 САЯАС 3.6 САЯ ТӨГРӨГИЙН ХООРОНД БАЙНА

Их дээд сургуулиудыг хооронд нь нэгтгэх, чанарыг сайжруулах бодлого баримталж байна.

Зарим их дээд сургуулиудын бидэнд өгсөн мэдээллээр энэ жилийн сургалтын төлбөр 1.6-3.6 сая төгрөгийн хооронд хэлбэлзэж байна.

Төлбөрөө нэмсэн сургуулиуд удирдах албан тушаалтнууд хоорондоо ярьж шийдэн 10 хүртэлх хувиар нэмсэн байна. Удахгүй бидэнд нэгдсэн мэдээлэл нь ирнэ” хэмээсэн юм.

Түүнчлэн боловсролын чанарын асуудлын тухайд их дээд сургуулиудыг нэгтгэх бодлогыг хэрэгжүүлэхгүй бол манай улс боловсролын чанараараа дэлхийн байр эзэлж чадахгүй байна. Иймд энэ төрлийн бодлого, үйл ажиллагаануудыг хэрэгжүүлж эхэлнэ хэмээлээ.

С.ХОНГОРЗУЛ

Энэ мэдээнд өгөх таны үнэлгээ

Хуваалцаарай Жиргээрэй