Экс найз залуутайгаа хамтран ээжийгээ хөнөөсөн Жипси Рөүз шоронгоос эрт суллагдсан нь олны анхаарлыг татаад байна. 32 настай Жипси ээж Ди Ди Бланкардаа хөнөөсөн гэдгээ 2015 онд шүүхийн өмнө хүлээсэн юм.
Тэрбээр тухайн үед үерхдэг байсан найз залуу болох Николас Годежонтой хамтран тус хэргийг үйлдсэн юм. Ди Ди Жипсийг бага байхаас нь эхлэн олон нийтийн анхаарлыг татах зорилгоор ашиглаж, хүчирхийлсэн. Тухайлбал Ди Ди түүнийг ямар ч өвчин эмгэггүй байхад тэргэнцэр дээр суулган, шаардлагагүй эм тариа хийлгэж, үсийг нь хусаж булчингийн тэжээлийн хямрал, цусны цагаан эсийн хорт хавдар гэх мэт өөр эмгэгээс шаналдаг мэт харагдуулсан байна.
Үүнд нь олон нийт итгэж Жипсид сайн дурын байгууллагууд тусалсан юм. Бага байхдаа амссан хүчирхийлэлдээ өс санасан Жипси найз залуутайгаа хамтран 2015 онд ээжийгээ хутгалж хөнөөгөөд хэргийн газрын орхин зугтсан байна. Цагдаа нар тэднийг Годежоны гэрт нуугдаж байхад нь баривчилсан юм.
2015 онд болсон шүүх хурлаар Жипси гэм буруугаа хүлээн 10 жилийн хорих ял сонссон , харин Годежон давж заалдах боломжгүйгээр бүх насаараа хоригдох болсон байна. Тухайн үед шериф Жим Арнотт тус хэргийг “Бүх зүйл харагдаж байгаа шиг ээ энгийн байдаггүй. Энэ бол нууц болон олон нийтийг хууран мэхэлсэн явдлаар хүрээлэгдсэн хэрэг” гэж хэлж байжээ.
Жипси шоронд байхдаа хэд хэдэн удаа ярилцлага өгч, өөрийнхөө намтрыг бичсэн аж. Түүний намтар ирэх нэгдүгээр сард худалдаанд гарна. Тэр өнгөрсөн пүрэв гарагт /2023.12.28/ эрт суллагдаж, баасан гарагт /2023.12.29/ өөрийн “Facebook” хаяг дээрээ “Эрх чөлөөтэй болсны анхны селфи” тайлбартай зураг нийтэлжээ.
Тэрбээр шоронд байх үедээ Райан Скотт Андерсонтой хуримаа хийсэн юм. Андерсон Луизиана мужид багшаар ажилладаг байна. Жипси хуримынхаа талаар “People” сэтгүүлд ярилцлага өгөхдөө “Суллагдаад гэртээ очихдоо би нөхөртэйгөө хамт очно гэдгээ мэдэж байгаа. Бид бие биеэ маш сайн дэмждэг гэр бүлийн харилцаа үүсгэх болно. Надад дутагдаад байсан зүйл бол тэр” гэж хэлсэн аж.
Эх сурвалж: BBC, People
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.