Япон улсад энэ сарын нэгэнд болсон газар хөдлөлтийн улмаас амиа алдсан хүний тоо өнөөдрийн байдлаар /2024.01.08/ 276-д хүрч, 240 гаруй хүн сураггүй болж, 565 хүн гэмтэж бэртээд байгаа аж.
Баруун бүсийн хотуудад 100 гаруй хөрсний гулгалт болж, хэд хэдэн гол замыг хаажээ. Эрэг орчмын эрчим хүч аажмаар сэргээгдэж байгаа хэдий ч ундны усны нөөц хомсдолтой хэвээр байна.
Ишикава мужид өнгөрөгч ням гарагт их хэмжээний цас орж, цаг агаарын таагүй нөхцөл байдал үүссэн нь газар хөдлөлтөд нэрвэгдсэн иргэдэд хоол, хүнс болон тусламжийн бараа хүргэх ажилд хүндрэл учруулж, хугацаа их алдаж байгааг аврах багийнхан мэдээлжээ.
Мөн Бямба гарагийн орой Ишикава мужийн Сузу хотод нурсан байшингаас 90 гаруй насны эмэгтэйг 124 цаг ажиллаж, эсэн мэнд аварсан байна. Ишикава мужийн албаныхны мэдээлж байгаагаар нийт 1390 барилга, байгууламж эвдэрч сүйрчээ.
Гал сөнөөгчид болон эрэн хайх, аврах багийнхан Анамизү хотод нурсан байшингийн дор дарагдсан байж болзошгүй есөн хүнийг аврахаар ажиллаж байгаа бөгөөд одоогоор хохирлын хэмжээг тодорхойлох боломжгүй байгаа аж.
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.