Өмгөөлөгч: Сэтгүүлч Т.Шинэбаяр хуурай өлсгөлөн зарлаад хоёр хонолоо

Сэтгүүлч Т.Шинэбаярын өмгөөлөгч н.Өнөржаргал мэдээлэл өглөө.

Ингэхдээ "Сэтгүүлч Т.Шинэбаяр хуурай өлсгөлөн зарлаад хоёр хонолоо. Даралт нь унасан нөхцөл байдалтайгаар 461-р ангид хоригдож байна. Шинжилгээ хийхэд нойр булчирхай, уушги үрэвсэлтэй гэж оношлогдсон. Цагдан хорих таслан сэргийлэх арга хэмжээг өөрчлүүлэх хүсэлтийг шүүхэд гаргасан байна.

Т.Шинэбаяр 75 настай ээжтэйгээ амьдардаг байсан. Түүний орон байранд нэгжлэг хийсэнтэй холбоотойгоор даралт нь ихсэх, сэтгэл санаа нь тавгүйтэх нөхцөл байдалтай байгаа.

Өнөөдрийн байдлаар миний бие өмгөөлөгчийнх нь хувиар хорих 461 дүгээр ангийн эрүүл мэндийн албанд Т.Шинэбаярын биеийн байдлын талаарх дүгнэлт гаргаж өгөх хүсэлт хүргүүлээд байна. Энэ дүгнэлт шүүхэд гаргасан гомдлыг шүүх хуралд хэрэг болно байх.

Түүнийг хойшлуулшгүй баривчлах ажиллагаа 2026 оны аравдугаар сарын 10-ны өглөөний 05:00 цагаас эхэлсэн. Ингээд аравдугаар сарын 11-ний өдөр нийслэлийн Прокурорын газраас сэтгүүлч Т.Шинэбаярыг Эрүүгийн хуулийн 23.7 дугаар зүйлд заасны дагуу "нийтийн албан тушаалтныг заналхийлэх" гэдэг зүйл ангиар эрүүгийн хэрэг үүсгэж яллагдагчаар татсан. Хохирогчоор Ц.Ганзориг, гэрчээр А.Үйлстөгөлдөр мэдүүлэг өгсөн. Т.Шинэбаярыг нийтийн албан тушаалтныг заналхийлсэн хэрэгт холбон шалгаж байгаа " гэлээ.

Г.МИШЭЭЛ

Өөрийн сэтгэгдлээ илэрхийл

Share Tweet