“Торгоны зам” раллигийн үеэр Канадын “ALDO” багийн машин шатжээ

“Торгоны зам” ралли сүүлийн өдрөө БНХАУ-ын нутаг дэвсгэр дээр үргэлжилж буй. Энэ сарын 14-нд наймдугаар гарааны үеэр Канадын “ALDO” багийн машин уралдааны зам дээр шатжээ.

Энэ талаар тус багийн жолооч Давид өөрийн хуудсандаа мэдээлсэн байна. Тэрбээр “Патрик бид хоёр аюулгүй байгаа. Гэвч машингүй болсон. Барианаас 50 км-ийн зайд машин шатаж эхэлсэн ч бид аюулгүй гарч чадсан. Машин маань шатсанд маш гунигтай байгаа ч бид аюулгүй байгаа нь юу юунаас илүү чухал юм. Дунд талын толинд шатаж буй гал харагдаж эхэлсэн учраас би машинаа гэнэт зогсоосон. Тэгээд бид үсрэн гарч, гал унтраагчаар галыг унтраах гэж оролдсон. Гэвч гал аль хэдийнээ хүчтэй болжээ. Дугуйнууд нь шатаж, хар утаа тэнгэрт тулав. Энэ бүхний төгсгөлд зөвхөн нүцгэн металл л үлдлээ. Бид үүнийг Хятадаас авч явах болно. Энэ бүхэн хөгжилтэй мэт сонсогдож байгааг бид мэднэ. Гэвч энэ бүхний эцэст дахиад авто спортод цаг зав, хүч хөдөлмөрөө зориулна гэж бодоход хэцүү байлаа. Бид баазруу хэрхэн буцахаа бодож чадсангүй. Азаар эмнэлгийн нисдэг тэрэг ирж биднийг бааз руу авч явлаа. Бид газардах үед л тайвширлыг мэдэрсэн. Энэ үед маш их сэтгэл хөдөлж, тэврэлдэн уйлж эхэллээ. Уралдааны машин хэдий үнэ цэнэтэй ч бидний амь настай харьцуулшгүй гэдгийг бодон алхлаа” гэсэн байлаа.

Б.АМАР

Өөрийн сэтгэгдлээ илэрхийл

Share Tweet