Маргаашаас эхлээд дэлхий хэсэг хугацаанд хоёр сартай болно

Маргаашаас эхлээд манай дэлхий хэсэгхэн хугацаанд хоёр сартай болох юм.

Тодруулбал, саяхан нийтлэгдсэн судалгааны тайланд өгүүлснээр дэлхийн татах хүчинд орсон автобусны хэмжээтэй астероид хоёр сар орчим хугацаанд манай гарагийг тойрон эргэх “бяцхан сар” болох юм байна.

Уг сансрын биет энэ сарын 29-ний өдрөөс арваннэгдүгээр сарын 25 хүртэл дэлхийн тойрог замд байсны эцэст өөрийн үндсэн байрлал болох нарыг тойрон хүрээлдэг Аржуна нэртэй астероидын бүсэд байх юм.

Энэхүү судалгааг нарийвчлан гаргасан Universidad Complutense de Madrid их сургуулийн профессор Карлос де ла Фуентэ Маркосын тайлбарласнаар уг бүсийн зарим астероид манай дэлхийд харьцангуй ойртдог (4.5 сая км) бөгөөд энэ үед хэрвээ хурд нь бага байвал (3,450 км/цаг орчим) дэлхийн татах хүчний нөлөөнд ордог гэжээ.

Хэрвээ “Ийм нөхцөл бүрдвэл тухайн биет түр хугацаанд дэлхийн дагуул болох боломжтой” гэж профессор тайлбарлажээ.

10 метрийн урттай астероидыг 3,474 км диаметр бүхий сартай харьцуулахад хэцүү юм. Тиймээс энэхүү мини сар нь сонирхогчийн түвшний дуран, телескоп зэрэг багаж төхөөрөмжөөр харагдахгүй юм.

Мөн энэ астероидыг 2055 онд дахин дэлхийн тойрог замд орж ирэх өндөр магадлалтай гэж судлаачид үзэж байна. Өмнө нь манай дэлхий “мини сар”-тай болсон тохиолдлууд 1981, 2022 онуудад бүртгэгдэж байжээ.

Б.НОМТ

Өөрийн сэтгэгдлээ илэрхийл

Share Tweet