Бурханч лам Пүрэвбатын аав Б.Ганхүү: Хүүгийн минь амьддаа гаргасан шийдвэр зөв гэдэгт итгэж байна

Г.Пүрэвбат агсан жанч халаад жилийн хугацаа одов.Түүний Монголын бурхны шашин, урлахуйн ухаанд оруулсан хувь нэмэр өндөр. Үлдээсэн, бүтээсэн нь яндашгүй энэ хүний ард нийгэмд нэгэн асуудал үүссэн бөгөөд уг асуудлаар түүний охин П.Анхаахана олон нийтэд ярьж, байр сууриа илэрхийлсэн. Үүнд нэр холбогдон цахим шүүмжлэлд өртсөөр буй Бурханч ламын аав Б.Ганхүүтэй бид уулзаж, учир явдлыг хөвөрдөхөөр Төв аймгийн Борнуур сумыг зорьсон билээ.

Борнуур сум руу дөнгөж ороход л сац суваргын орой холоос гялалзан харагдана. Энэ бол нутаг орныхны хүсэл, "зарлигаар" Г.Пүрэвбат агсны бүтээсэн "Өлзийбадруулагч сүм" байлаа. Уулсын энгэрт моддын дунд холоос өнгө бүрэн үзэгдэх Аглаг бүтээлийн хийдийн үүсэл эндээс эхтэй ажээ.

Борнуурын нэг гудманд үүднээсээ юм бүхэн нь эмх цэгцтэй, ахуйч цэмцгэр хашаа угтсан нь Г.Пүрэвбат агсны аав Б.Ганхүүгийнх. Даруухан энэ байшинд Б.Ганхүү гуай амьдралынхаа олон жилийг үджээ. Сэтгүүлч хүн ирлээ гэх сургаар түүний хүүхдүүдэд ч нэг л зовуурьтай, юмс нэг л ээдрээтэй бөгөөд хэцүү байгаа нь төрхөнд нь илт тул хэн хэн маань нэгнээсээ сошиалд хөндөгдөөд байгаа асуудлаар тас хийтэл асуучихаж чадахгүй л байлаа. Монгол хүний ёсоор цай унд болж суух зуураа бид аажмаар яриа дэлгэж, Бурханч лам Г.Пүрэвбат агсны 97 настай аав бидэнд ам нээсэн нь энэ билээ.

-Пүрэвбат агсан таны хэд дэхь хүүхэд вэ?

-Ханьтайгаа би 71 жил хамт амьдрахдаа 15 хүүхдийн аав ээж болжээ. Зээ хүү Эрдэнэбатыгаа хамт өсгөсөн болохоор 8 хүү, 8 охиныг гарыг нь ганзаганд, хөлийг нь дөрөөнд хүргэсэн байна. Пүрэвбат минь 1965 оны 9 сарын 6-нд аав ээж бидэндээ 7 дахь хүүхэд минь болж ирсэн юм. Ханьтайгаа хүүхдүүдийгээ боловсрол, мэргэжилтэй хүн болгохын тулд хичээсний дүнд 8 хүүхэд минь их дээд сургууль төгсөж, бусад нь ч мөн тусгай мэргэжлийн сургууль төгсөөд бүгд л өөрсдийн мэргэжлээр ажиллаж байна. Манайх уг нь Батсүмбэр сумын уугуул айл юм. 1966 онд Пүрэвбатыгаа ой хүрээгүй байхад Борнуур сумын намын хорооны орлогч, зааварлагчаар томилогдоод ирж байлаа. Миний хүүхдүүд бүгд л багаасаа ажилсаг, шударга байж ирсэн.

-Хүү тань хэдэн настайдаа бурхан номын хүн болох шийдвэрийг гаргаж, энэ зам мөрийг сонгосон юм бэ?

-Пүрэвбат маань Борнуурын Ерөнхий Боловсролын Сургуулийн 8-р ангийг төгссөн. Тэр үедээ л бурхны хөрөг зурдаг, гарын болоод ухааны уртай хүүхэд байсан. Энэ билиг авьяасыг нь дагуулаад Улаанбаатар руу Дүрслэх урлагийн сургуульд явуулахад онцсайн сурч, дипломын ажлаа "Амар сайхан жаргав" нэртэй, тухайн үед Чингис гэдэг үг хориотой байхад Их Богд хааны тухай ихэд дэлгэрэнгүй, онцгой зураг зурж хамгаалж байсныг нь би одоо ч тод санаж байна. Дараа нь Урчуудын эвлэлийн хороонд бие даасан уран бүтээлчээр, Монументал чимэглэлийн үйлдвэрт мөн ажиллаж байгаад 032-р ангид цэргийн алба хаасан.

Шашны их сургуульд сурч төгсөөд, Энэтхэгийн Дарамсалад Далай ламын Бурхан урлалын сургуульд бурханч ламаар 3 жил суралцсан юм. Пүрэвбат гэхдээ өөрөө ярихдаа Монголынхоо номын багш нараас ихийг сурч, үүдийг нээчихээд энэ олсон мэдлэг юугаа бататгахаар Энэтхэгийг зорьсон гэж ярих их дуртай. Өөрөөр хэлбэл, монголоос бурхан номын, урлахуйн буй мэдлэг бүгдээ олж авсан хэмээн бахархан хэлдэг. Ингээд 1993 оноос Монголын бурхан шашны урлагийн дээд сургуулийг үүсгэн байгуулж, нийслэл, орон нутаг болон Буриад улсаас оюутнууд элсүүлж, бурхан шашны гүн ухаанаас авхуулаад зээгт наамал, баримал, цутгамал зэрэг ихэд нарийн төвөгтэй мэргэжлээр 80 гаран шавь бэлтгэж төгсгөсөн юм. Ерөөс эргээд харвал хүү минь өөрийн зам мөрийг аль эртнээс сонгож, түүнээ батлан зүтгэж явсаар ирснийг олон шавь нь ч нотлон хэлэх байх аа.

-Аглаг бүтээлийн хийд бол монголчуудын зорьж, сурж ирдэг цөөхөн хийдийн нэг. Байгалийн үзэсгэлэн цогцолсон эзгүй газрыг хүний хөл тасрахгүй бурхан номын төдийгүй, бүтээл туурвилын газар болгожээ таны хүү. Аглаг бүтээлийг барьж, бүтээх санаагаа танд хуваалцаж байв уу?

-2008 онд Пүрэвбат маань Борнуур сумандаа "Өлзийбадруулагч сүм"-ийг, 2011 оноос Аглаг бүтээлийн хийдийг байгуулсан. Аглаг бүтээлийн хийдэд улсаас тог цахилгааныг нь татаж, замыг нь тавьж өгч, ард түмэн хандивын гараа сунгаж, олон түмний оролцоо буянаар боссон. Монголын бурхан шашны Урлахуйн ухааны томоохон бүтээн байгуулалтыг бий болгоно гэсэн хүсэл зоригоор эхлүүлсэн ажилд нь 15 хүүхэд минь анхны чулууг нь тавилцахаас авхуулаад ширхэг хадаасыг нь ч хадалцаж, хог шороог нь хүртэл цэвэрлэж, томоос нь жижиг хүртэлх бүх зүйлд нь хэний ч гар дуталгүй оролцож ирсээн.

Нутаг орныхон маань ч мэднэ. Шавь нар нь ч багшийгаа аль аль хийдээ барьж, бүтээхэд гар хөдөлгөж болох бүх зүйлд туслаж, хийдийнхээ хурал номд алдалгүй оролцон олон хүний зүтгэл, сэтгэлээр та бидний нүдэнд харагдах энэ их бүтээн байгуулалтыг бий болгосон байна. Пүрэвбат маань Өлзийбадруулагч сүмээ үйл хэрэг нь жигдрээд ирмэгц өөрийн бүтээлийн хийдийг барихсан гэсэн чин хүслээр хүн нэг бүрийн сэтгэлийн үйлээр болоод хөдөлмөрийг оролцуулан бүтээж байжээ. Хэнийг ямар оролцоотой байхыг маш сайн зохион байгуулж чаддаг хүн болохоор бүгд л өөр өөрийн хүсэл зоригоор оролцож, одоо ч гэсэн ах дүү, шавь нь нар нь эвдэрхийг нь янзалж, сэлбэж л явдаг.

-Нэгэнт бидний яриа энэ хүрсэн болохоор би таниас өнөөдрийн нийгэмд үүсээд байгаа асуудлыг асуухаас аргагүй. Таныг хүүгийнхээ хийдийн өмчлөл, гэрээслэлээс болж бэр Ким болон ач охидтойгоо түнжин хагарч, хууль шүүхдээ туллаа гэх болсон?

-Яг үнэндээ өвөө нь чиний хэлээд байгаа сошиал гэж орж мэдэхгүй. Харин хүүхдүүд минь нэг өдөр надад биднийг ингэж ярьж, чичлэх болсныг хэлсэн. Би нэг л зүйлийг яг үнэн хэлье. Надад ач охидтойгоо аль эсвэл бэртэйгээ, ер нь хэнтэй ч хөрөнгө булаалдсан зүйл байхгүй.

Хүү минь бурхан номын үйлд шамдаж, сүм хийд байгуулан зүтгэж ирсэн нь олны өмнө туйлын их хариуцлагатай явдал л даа. Хүүгийнхээ үйл хэргийг бодсон ч ах дүү нар нь байтугай ээж бид хоёр нь ч хүртэл нэрийг нь хичээж ирсэн. Би өдгөө 97 нас сүүдрийг зооглож байна. Надад хүүгийнхээ бүтээснийг өмчилж, эзэгнэх хүсэл ерөөс төрж байсангүй. Хүүгээ алдсаны дараа би дахиад хоёр ч хүүхдээ, ханийгаа бас алдсан. Энэ бүх хугацаанд их олон сонин зүйлс болоод л байлаа. Би ер ажралгүй, юмс цагаараа, жамаараа болно биз дээ гэж бодсоор ирсэн. Хүүхдүүд маань ч тийм бодолтой байж ирлээ.

Гэтэл сүүлийн үед Пүрэвбатын маань хийдээ босгохдоо баримталж ирсэн үзэл санаа, үнэт зүйл нь хөндөгдөөд, өөрчлөгдөөд ирэхээр олон түмний итгэл, хүндэтгэлээр боссон энэ хийд ирээдүйд хаалгаа барих вий гэсэн эмзэглэл надад төрсөн. Ач охид минь ч надад олон авир үзүүллээ. Нэгэнтээ хүүгийн минь өнгөрөхөөсөө өмнө ярьсан хэлсэн захиасаар шавь нар нь Аглаг бүтээлийн хийдийнхээ үйл ажиллагааг хэвийн аваад явж байтал гэнэтхэн бэр, ач охид маань ирээд маш их зүйлийг өөрсдийн дураар өөрчилсөн. Удирдах зөвлөл гэж зүйлтэй, түүгээрээ ном журмаараа яваад ирсэн байтал гэнэтхэн ингээд түрэмгийлээд ирэхээр нутаг орон, ах дүүс, аав надад ч эмзэглэм санагдаж байгаа. Өдий наслахдаа гомдлын үг хэлмээргүй л байх юм.

-Өөрчлөгдсөн гэдэг нь?

-Багшийгаа дагаж олон жил ном хурж, яг дэргэдээс нь үйл хэргийг нь хамт хийлцэж ирсэн шавь нарыг нь хөөхийг нь хөөж, шахахыг нь шахаж, зарим нэгийг нь элдвээр гүтгэсэн байна. Нэг өдөр л Аглаг дахь байшингуудын цоожны голыг солиод өдөр тутам номоо хураад явж байсан нь доголдох болов. Ач охин маань ч аавыгаа бурхан болсны дараа ярьж хэлж байснаасаа өөрчлөгдөөд эхэлсэн. Үүнээс ч нарийн, их сэтгэл шаналгам үйл явдлууд болсон ч би энд хэлэлгүй орхиё гэж санаж байна...

Хүү минь амьддаа надад болоод ах дүү, шавь нартаа ч хэлж байсан. Бүр телевизээр гарахдаа хэлж байсан үг нь бий. Аглаг бүтээлийн хийд бол бүх ард түмний хандиваар боссон, ард түмний өмч юм шүү гээд. Энэ хэлсэн үгийг нь аав ээж, ах дүү нар нь бүгд хүндэтгэж хэн нь ч Аглаг бүтээлийн хийдийг хувийн өмч мэтээр харж байсангүй. Удирдах зөвлөл үүрэг чиглэлийг нь хариуцаад, лам хүнээр удирдуулаад явах нь зөв гэдэг утга санааг ч өөрөө хэлж байсан учраас үүнийг нь эвдэж, гажуудуулахгүй юмсан л гэсэн бодол бий болохоос гадуур хүмүүсийн яриад байгаа шиг надад өмчлөх гэсэндээ гэрээслэлийг нь харъя гэсэн зүйл үгүй ээ. Бурхны шашны үйл хэрэг шүү дээ. Жир юм биш.

-Та гэрээслэлийг нотариатын гадна уулзаад нүдээрээ харсан гэж ойлгоод байгаа?

-Хань минь бурхан болохынхоо өмнө хүүгээ Аглаг бүтээлийн хийдийнхээ үйл хэргийг хэрхэн цааш үргэлжлүүлэх талаар аль хэдийнэ тооцон бодож өмчлөх тухай бус үүрэг оролцоог нь оноосон тийм тэмдэглэл ч болтугай бичсэн байж таараа гэж хэлж байлаа. Үнэхээр ч Пүрэвбат нямбай, юм бүхнийг бичиж тэмдэглэдэг учраас хийдийнхээ номын үйлийг хэрхэхээ бичсэн л байх. Ингээд энэ талаараа бичиж үлдээсэн гэрээслэл бий эсэхийг нь асуухад нотариатын гадаа үзүүлдэг учиртай юм болохоор бид уулзсан.

Гэтэл аль хэдийнэ задлаад үзчихсэн нэг цаас харуулсан. Охиддоо оюуны өмчийнхөө эрхийг өгсөн тухай нэг бичиг байсан. Хүү минь сэрүүндээ охиддоо, эхнэртээ өгч болох бүх хөрөнгөө өмчлүүлсэн, өгсөн. Үүнийг бүгд мэдэж байгаа. Тийм учраас тэр өмч, хөрөнгө дээр бидэнд ярих зүйл ер байхгүй. Гэтэл нотариатч гурван тал байж задлах ёстой зүйлийг аль хэдийнэ задлачихсан учраас албан ёсны гэрээсэл гэж үзэхгүй, уншихгүй гээд тэр цаасыг нь хараагүй.Түүн дээр нь оюуны өмчийн эрхээ охидынхоо нэр дээр үлдээлээ гэсэн тийм л зүйл байсан. Ийм л юм болсон. Харин өөр хоёр гэрээслэл тухайн нотариатч дээр бий тул та шүүхэд хүсэлт өгөөд харах бүрэн боломжтой гэж хэлсэн юм. Ач охин маань уг нь энэ бүгдийг мэдэж л байгаа.

-Тухайн гэрээслэлд охиддоо оюуны өмчийн эрхээ л өгснөөс өөр зүйл дурдагдаагүй байжээ дээ?

-Өөр зүйл байгаагүй. Миний бодлоор бол хүү минь Удирдах зөвлөл гэж байгуулахдаа л цаашид Аглаг бүтээлийн хийд өөрийнх нь шийдвэрлэсэн энэ үйл нөхцлөөр яваасай л гэж бодож өөрийн итгэлт шавь нартайгаа олон жилийг туулж, дэргэдээ байлган хурал ахлуулж, оролцуулж бурхан болох хүртлээ хамт байсан байх.

Гэтэл өнөөдөр энэ шавь нар нь хөөгдөж байна шүү дээ. Ингээд зөрчилдөөн үүсээд ирсэнд л эмзэглээд, Аглаг бүтээлийн хийд хүүгийн минь амьд ахуй үе шиг өдөр тутмын хэвийн үйл ажиллагаагаа алдаад эхэлж байгаад маш их сэтгэл зовниж байна. Хэний үүрэг оролцоо ямар байхыг тодорхой бичээд үлдээчихсэн болов уу л гэж бодож байна. Хэрвээ бичээд үлдээсэн байвал хүүгийнхээ хүслээр л болгоно гэж бодсоноос хэнд юуг өмчлөн үлдээх нь бидэнд ерөөс сонин биш юм. Миний хүүхдүүдийн хэн нь ч, шавь нар нь ч өмчлөлийн гэрээслэл нэхээгүй. Дурсаагүй. Миний хүүхдүүд хэзээ ч олон түмэнд хүндлэгдсэн ахынхаа нэр нүүрийг барж, юм булаацалдах ёс суртахуунгүй хүүхдүүд биш ээ. Бүгд өөрсдийн ажил амьдралын зам мөрөөр зөв яваа.

• 

• 

• 

-Шавь нарынх нь талаар ч яригдаад эхэллээ. Мөн та өөрөө ярья, олон нийтэд байр сууриа илэрхийлье гэж зорив уу эсвэл хэн нэгэн таныг ятгав уу?

-Өдий насласан намайг хэн ятгаж, турхирах вэ дээ. Би ерөөсөө л нүдээр харж байгаа зүйлдээ л итгэж байна. Хүү маань амьд сэрүүндээ Аглаг бүтээлийн хийдийнхээ Удирдах зөвлөлийн тэргүүнээр олон жил шавилсан Отгонбаатараа сонгоод, бурхан болох хүртлээ яг дэргэдээ байлгаж ирсэн.

Гэтэл Анхаахана ач маань очоод гэр бүлээс хүн оролцуулаагүй гээд түдгэлзүүлж байсан удаатай. Пүрэвбат маань номын хүн, олон зүйлийг танин анзаарч, мэддэг байсан учраас хүүгийнхээ гаргасан шийдвэр болгоныг хүндэлж, зөв байсаан л гэж харж байгаа. Одоо ч би хүүгийнхээ амьддаа гаргасан шийдвэрүүдийг зөв гэдэгт итгэж байна.

-Удирдах зөвлөлд гэр бүлээсээ оролцуулаагүй нь анхнаасаа Аглаг бүтээлийн хийдийн номын үйл хэрэг хувийн амьдралаас нь тусдаа байх ёстой гэж үзсэн юм болов уу?

-Охидоосоо юмуу, эхнэрээ ч юмуу оруулахыг бодсон бол Удирдах зөвлөлд оруулах л байсан байх. Ер нь аливаа шийдвэр гаргахдаа Пүрэвбат маань хайнга, хэнэггүй хүн биш. Маш нухацтай бодож, гаргадаг хүн шүү дээ.

Өөрийн номын шавь нараасаа сонгож, яг дэргэд нь өөрийг нь түшсэн хэдийгээ л Удирдах зөвлөлдөө оруулсан нь холыг харсных юм болов уу.

-Та ач охидтойгоо уулзсан уу. Их тухгүй, хэцүү нөхцөл үүсчихээд хөндлөнгийн бидэнд ч ээдрээтэй санагдаж байхад та бүгдэд ямар байгаа бол?

-Уг нь над дээр Анхаахана ирсээн. Би ач охиддоо дургүйлхэж ямар нэг байдлаар хөндийрхсөн зүйлгүй. Энэ хашаанд үеэлүүдтэйгээ тоглож, өвөө эмээдээ иүнсүүлээд л гүйж явсан хүүхэд шүү дээ. Харин "Бэр Кимийг 30 жил хүүтэй минь ханилчихаад яагаад Монголын иргэншилтэй болоогүй юм бэ" гэж хэлсэн үгэнд минь эмзэглэн гомдсон гэсэн. Хүүгээ алдсан, ханиа алдсаны дараах сэтгэлээр хатуу үг би хэлчихсэн байх аа.

Цагаан сараар ирж золгоогүйдээ надаас уучлалт гуйсан. Ирээд уйлаад, учраа хэлсэн ач охинтойгоо бид айхтар түнжин хагарч эвдрээд байсан юмгүй. Аавынхаа үйл хэргийг ойлгож, захиж хэлснээр нь явах нь уу гэж би харсан. Танайд өмнө нь өгсөн ярилцлагадаа хүртэл ач охин Анхаахана "Аглаг бүтээлийг гэр бүл өмчлөхгүй" гэж өөрөө хэлчихээд эсрэгээр нь хийж байгаад одоо хэр итгэж өгөхгүй л байна. Яагаад түмний өмнө ярьдаг нь бидний өмнө хийдэгтэйгээ зөрөөд байгаад сэтгэл их эмзэглэж, би маш хүндээр хүлээж авч байгаа.

-Харь хөндлөнгийн Аглаг бүтээлийн хийдэд хамааралгүй лам нар гэдэг нь хэнийг хэлсэн хэрэг вэ?

-Пүрэвбат маань өөрийн шавь нарыг дэргэдээ олон жил шавилуулж, хамтдаа номын, урлахуйн гээд олон үйл хийж ирсэн. Явах нь зам мөр салдаг байхад ийм олон жил дэргэд нь шавилсан шавь нараа Удирдах зөвлөлдөө хүртэл сонгоод хийдийн үйл ажиллагааг даатгаж байж шүү дээ. Гэтэл тэднийг өнөөдөр хамааралгүй гэж хэлж байгаа юм бол Аглаг бүтээлийг босголцох үед хэн хүүгийн минь дэргэд байсныг сүсэгтэн олон ч хэлэх биз ээ.

-Аглаг бүтээлийн хийд одоо Пүрэвбат агсны мэнд сэрүүн үеийнх шиг номоо хурж, хэвийн ажиллаж байгаа юу?

-Юуных нь хэвийн байх вэ. Шавь нар нь тогтмол, хэвийн ном хурдаг байсан ч одоо шавь нар нь тэнд орох гарах нь хэцүү болсон. Бүтээн байгуулалтын ажлууд өдөр шөнөгүй л явж байдаг нь харагдахаа больсон. Аглагийг бүтээлцэж ирсэн залуус нам гүм болчихсонд л сэтгэл эмзэглэж байна.

-Таны бэр Ким хүүгийн тань үйл хэрэгт хамтран зүтгэж ирсэн. Энэ бол үгүйсгэх аргагүй үнэн шүү дээ?

-Үнэн байлгүй яах билээ. Хүүтэй минь нэг ижил мэргэжилтэй учраас урлахуйн ухааны бүх үйл хэрэгт нь зүтгэж, туслаж байсан. Үүнийг бидний хэн нь ч үгүйсгэж байгаагүй. Гэхдээ хүмүүсийн яриад байгаа шиг Аглаг бүтээлийн хийдэд гадны тусламж санхүү татсан гэж ярьдаг бол зөрүүтэй ойлголт. Монгол лам нараараа, монгол ном айлдвар хурж, жинхэнэ монгол урлахуйн бүтээлийн хийдийг босгоё гэсэн нь энэ Аглаг бүтээлийн хийд юм.

Ерөөсөө л сүсэгтэн олны болоод хүүд минь итгэдэг хүн бүхний хандиваар боссон гэдгийг л мэдэж байна. Түүнээс Солонгосоос мөнгө хандив босгож, доллар явуулдаг байсан гэдэг нь эртний явдал юм шүү дээ.Урлахуйн сургуулийг байгуулалцсан үйл хэрэг нь өөр, тусдаа юм. Ялгаатай он цагийн үйл явдлыг хольж ярьсан нь олон нийтэд бас л өөр үнэнийг бий болгочихож байгаа хэрэг.

-Та Аглаг бүтээлийг хаалгаа барих вий гэдэгт л сэтгэл зовоод байгаа нь мэдрэгдлээ?

-Өдөр бүр номын дуутай, хүү минь үргэлж л Аглагтаа завгүй байж байдаг тийм амин чанартай газар учраас яг тэр өнгөө бүү алдаасай гэдэг бол өвгөн миний хүсэл. Гэтэл өмч мэтээр үзэж, ийм олон хүний сэтгэлд ан цав суулгаж байгаа энэ явдлуудын цаана үгээр хэлж, тоочишгүй олон зүйл болсон. Би байтугай хүүхдүүд минь хүртэл тэвчиж ирсээн.

Нэг өдөр бага хүү минь "Аав яагаад биднийг ингэж сошиалаар адлаж, 97 настай таныг өмч хөрөнгө булаацалдсан шуналтай өвгөн гэж яриад байгаа юм бэ" гэж ирээд уурласан. Аргагүй л дээ, ах дүү нар нь цөм Пүрэвбатынхаа Аглагийг бүтээлцэхэд бүгд өөрсдийн амьдралынхаа цаг мөчөөс зориулж, тийн хайрлаж ирсэн. Ийм сэтгэлийг нь Пүрэвбат ч сайн мэддэг байсан даа.

-Асуудал нэг талдаа гарах байх аа?

-Аль ч талдаа гарсан бай хүүгийн минь амьддаа хэлж, ярьж байснаас зөрөхгүй, Аглаг бүтээлийн хийдэд цаашид хүүгийн минь хүслээр бүтээсэн бүхэн хэвийн үргэлжилж, ном журмынхаа дагуу л байгаасай гэж хүсэж байна.

Миний хүү бурхан болохынхоо өмнөхөн аавдаа ирж, уулзаад явсан. Маш их зүйлийг бүтээн босгож, асар өндөр ёс суртахуунаар энэ бүхнийг авч явж ирсэн учраас цаашид ч миний хүүгийн бүтээсэн бүхэн яг тэр л хүслээр нь яваасай. Хүслээс нь битгий зөрж, өөрчилж, үгүй хийгээсэй л гэж бодож байна. Надад өөр хүсэх зүйл байхгүй дээ.

-Ярилцсанд баярлалаа

• 

• 

• 

• 

• 

• 

• 

• 

• 

• 

• 

• 

• 

• 

• 

• 

• 

• 

• 

• 

• 

• 

• 

• 

• 

• 

Бид Пүрэвбат агсны аав Ганхүү гуайнхаас хөдлөж, Өлзийбадруулагч сүмээр саатлаа. Энд Бурханч лам Пүрэвбат агсан өөрийн багшдаа зориулан сац суварга босгон бүтээсэн бөгөөд сар шинээр хамгийн түрүүнд энд ирж ном айлдаад дараа нь аав ээждээ очиж золгодог байсан гэв.

Өнөөдөр "Өлзийбадруулагч сүм"-ийг Пүрэвбат агсны шавь, хандмаа Эгиймаа багшийнхаа хүсэл ёсоор хотоос нүүн ирж, сахин сууна. Ямар ч олон тайлбар хэлэлгүй ерөөс багшийнхаа хэлсэн захиасаар төрж өссөн хотоо орхин Борнуурт ирээд 5 жил болсон аж.

Ийн харвал Пүрэвбат агсан хэн ямар үүрэг оролцоотой байхыг урьдаас нарийн сайн боддог байсан болов уу гэж харагдав. Пүрэвбат агсныг бурхан болсноос хойш захиас сургаалийг нь хэн хүнгүй дагаж, хэрэгжүүлэх итгэл л бүгдэд үлдсэн гэлтэй...