ТОДРУУЛГА: Монгол улсын дээгүүр ЦАЦРАГ ИДЭВХТ ҮҮЛ дайрч өнгөрсөн үү

Өчигдөр буюу наймдугаар сарын 21-ний өдөр УИХ-ын гишүүн асан Ц.Оюунгэрэл өөрийн Твиттер хуудаснаа,

"Монгол руу цацраг идэвхит үүл орж ирээд байгаа юм биш үү. Үүнийг хянаж буй газар байна уу. Цөмийн мэргэжилтнүүд  мэдээлэл өгөхгүй юм уу. Ядахдаа хэзээ, хэдэн өдрийн турш хаагуур дайрсан. Гадуур явахдаа юуг анхаарах, хүүхдээ яаж хамгаалах талаар мэдээлэл хэрэгтэй байх юм. Газрын зургаас харахад Монгол улс цацраг идэвхт үүлний нөлөөнд орсон байна. Манай хяналтынхан таг. Ядахдаа сэрэмжлүүлэг хэрэгтэй байна” хэмээн жиргэсэн юм.

CNN, MSNBC зэрэг олон улсын томоохон хэвлэлийн агентлагуудын хэмжилт, зураглалаас харсны үндсэн дээр энэ тухай жиргэсэн гэж тэрбээр мэдэгдээд буй. Ц.Оюунгэрэл хэвлэлд өгсөн ярилцлагадаа,

"Дэлхийн хамаг л том хэвлэлүүд энэ тухай мэдээлсэн шүү дээ. Хэдэн өдрийн өмнө дайраад өнгөрсөн байж магадгүй юм билээ. Ийм мэдээлэл байхад бидэнд ямар ч анхааруулга өгөөгүй нь сонин” гэж ярьжээ. Харин цөмийн физикч, УИХ-ын гишүүн А.Ундраа одоогийн байдлаар сөрөг зүйл алга, нарийн тодруулаад хариу өгнө гэж хариу жиргээд байна.

Тэгвэл Цөмийн Энергийн Комиссоос, Монгол улсад цацрагийн түвшин ихсээгүй, хэвийн хэмжээнд байна гэдэг мэдэгдлийг хийлээ.

"Монгол улсын гадаад орчны цацрагийн хэмжилтийг нийслэл болон аймгийн нийт 35 цэгт хийж гүйцэтгэдэг бөгөөд 2019 оны 8 дугаар сарын хэмжилтийн дүнгээс үзэхэд цацрагийн түвшин ихэссэн тохиолдол ажиглагдаагүй ба хэвийн хэмжээнд байна” гэжээ.

ЦУОШГ- ийн зүгээс: "Хилийн зурваст цацраг хэмждэг суурин харуул төхөөрөмжүүд бий. Зохих түвшнээс хэтэрсэн үзүүлэлт заагаагүй ” гэж мэдэгдсэн бол, Цөмийн энергийн газрын дарга асан Н.Тэгшбаяр "2019 оны 8-р сарын 8 –ны өдөр ОХУ-ын Архангельск мужийн Нёнокса суурины ойролцоо болсон ослоос үүдэлтэй хүрээлэн буй орчинд үзүүлэх нөлөөллийн тухай олон нийтийн мэдээллийн хэрэгслүүдээр янз бүрийн мэдээлэл ихээхэн цацагдаж байгаа ч албан ёсны эх сурвалжуудын мэдээлж буйгаар тухайн бүс нутгийн цацрагийн хэмжээ хэвийн байгаа ажээ” хэмээн өөрийн цахим хуудаснаа бичсэн байна.

С.ЧИЧҮҮЛЭН

Энэ мэдээнд өгөх таны үнэлгээ

Хуваалцаарай Жиргээрэй