57 настай Ц.Оюунчимэг Дэлхийн цомд түрүүлэхдээ дэлхийн дээд амжилтыг гурван удаа шинэчилжээ

АНУ-ын Сан-Диего хотод энэ сарын 3-6-нд болсон хүндийг өргөлтийн ахмадын Дэлхийн цомын аварга шалгаруулах тэмцээнд Монголоос дөрвөн туйванч өрсөлдөн, хоёр алт, хоёр мөнгөн медаль хүртжээ.

Эмэгтэйчүүдийн 55-аас дээш насны ангиллын +87 кг-ын жинд өрсөлдсөн Ц.Оюунчимэг тус тэмцээнд түрүүлэхдээ дэлхийн дээд амжилтыг гурван удаа шинэчлэв. Өнгөрсөн наймдугаар сард Францад болсон ДАШТ-ээс дөрөв дэхээ түрүүлсэн тэрбээр Дэлхийн цомын аварга шалгаруулах тэмцээнээс долоо дахь алтан медалиа хүртлээ.

Мөн Ванчингийн Балжинням дэлхийн цомын аварга болж, Сүхбаатарын Саранцэцэг, Баасангийн Энхтайван нар мөнгөн медаль авав.

57 настай Ц.Оюунчимэг нэлээд хожим буюу 2011 онд тэтгэвэрт гарсныхаа дараа Ерөнхийлөгч Х.Баттулгын зөвлөснөөр хүндийг өргөлтөөр хичээллэж эхэлсэн юм.

49 насандаа эл спортод хөл тавьсан тэрбээр дараа жил нь анхныхаа олон улсын тэмцээн болох ДАШТ-д оролцохдоо дэд аварга болж амжилтынхаа жимийг гаргажээ. Тэгэхдээ дэлхийн долоон удаагийн аварга Сара Смитээс ганцхан кг дутуу буюу огцом шахалтаар 53, түлхэлттэй өргөлтөөр 65 кг өргөсөн юм. Улмаар 2013 оны ДАШТ-д түрүүлэхдээ өнөөх тамирчнаас 11 кг-аар илүү өргөн, есөн жилийн турш шинэчлэгдээгүй байсан дэлхийн дээд амжилтыг гурван кг-аар ахиулж, 148 болгожээ.

Алдарт Б.Түвдэндорж аваргын төрсөн дүүгийнх нь охин тэрбээр Азийн ахмадын наадамд түрүүлсэн Монголын анхны туйванч. Түүнд гран при ангиллын тэмцээний дөрвөн алтан медаль, мөн тооны аваргын цом бий.

Б.БУЯНДАЛАЙ

Өөрийн сэтгэгдлээ илэрхийл

Share Tweet