Баяртай, Нэнси Пелоси

АНУ-ын Конгрессын Төлөөлөгчдийн танхимын даргаас буух нь тодорхой болоод буй Нэнси Пелоси Ардчилсан намын бүлгийн лидерийн байр сууриа Хаким Жеффрист шилжүүлэхээр болжээ.

Ингэснээр 1987 оноос эхэлсэн Нэнси Пелосигийн Конгресс дахь ялгуусан замнал 2025 онд жирийн гишүүний хувиар төгсөх нь тодорхой болж байна. Сая болсон Завсрын сонгуульд тэрээр Калифорниос нэр дэвшиж ялалт байгуулсан ч намаа олонх болгож чадаагүй хариуцлагаа ийнхүү хүлээж байна. Конгресст олонх болсон БНН-ын лидер Кевин МакКарти түүнээс удахгүй Төлөөлөгчдийн танхимын даргын албан тушаалыг нь авах юм.

Харин Ардчилсан намын бүлгийн лидерийн үүргийг хүлээж буй Хаким Жеффрисийн тухайд, дараагийн Завсрын сонгуулиар Конгрессийн Төлөөлөгчийн танхимыг тэргүүлсэн анхны хар арьст улстөрч болох магадлалтай боллоо.

82 насандаа Ардчилсан намын лидерийн байр сууринаас бууж буй Нэнси Пелоси нь 1962 онд Тринитигийн их сургуулийг Улс төрийн шинжлэх ухааны мэргэжлээр төгссөнөөсөө хойш эцгийнхээ нөлөөгөөр улстөрд орсон бөгөөд 1988 онд анх Конгрессийн гишүүнээр сонгогдож, 2003 оноос намынхаа бүлгийг тэргүүлсэн. Улмаар 2006 оны сонгуульд намаа ялуулснаар анх удаа Төлөөлөгчдийн танхимын дарга болж байв. Тэрбээр дөрвөн жилийн дараах сонгуульд ялагдаж, сөрөг хүччин болсон ч намын бүлгийн даргын албаа хадгалсаар 2018 онд өмнөх амжилтаа давтаж, Төлөөлөгчдийн танхимын даргын суудалд дахин заларсан билээ.

Сая ажлаа өгөхдөө тэрбээр "Дахиж намын бүлэг тэргүүлэхгүй. Шинэ үед халаагаа өгөх цаг нь болжээ" гэсэн нь цэвэр настай холбоотой байсан. Тодруулбал, 2025 оны нэгдүгээр сард буюу Конгрессийн гишүүний бүрэн эрхийн хугацаа нь дуусах үед тэрбээр 85 настай байх бөгөөд дараагийн сонгуульд намаа удирдаж орно гэвэл 89 хүртлээ ажиллах шаардлагатай болох юм.

Энэ мэдээнд өгөх таны үнэлгээ

Хуваалцаарай Жиргээрэй