Н.Алтанхуягийн үед тавьсан өрийг Л.Оюун-Эрдэнийн Засгийн газар төлж байна

Монгол Улсын Засгийн газар “Чингис бонд”-ын энэ оны хуваарьт төлбөрийн үлдэгдэл болох 137.8 сая ам.долларыг хөрөнгө оруулагчдад өнөөдөр ТӨЛНӨ. Төлнө хэмээн том үсгээр онцлохын учир нь энэхүү 137.8 сая ам.доллар нь нэмэлт өр үүсгэхгүй, жинхэнээсээ төлж байгаад юм. Бүр тодруулбал, өнөөдөр шилжүүлэх 137.8 сая ам.доллар Монгол улсын нийт гадаад өрийн хэмжээнээс шууд хасагдана.

БОНД ГАРГАХ АЧ ХОЛБОГДОЛТОЙ Ч ЗАРЦУУЛАЛТ МУУ БОЛ ХОЙЧ ҮЕДЭЭ БАЛАГ ТАРЬДАГ

Монгол Улс 2012 онд түүхэндээ анх бонд босгож, хөрөнгө оруулагчдаас нийт 1.5 тэрбум ам.доллар татан дэд бүтэц сайжруулах болон бусад чиглэлээр зарцуулсан байдаг. Гаднын хөнгөлөлттэй зээл тусламжууд нь цаанаа “Зөвхөн тухайн улсын компаниар ажил гүйцэтгүүлэх”, “Зөвхөн тухайн улсын бүтээгдэхүүн үйлчилгээг худалдан авах” гэх мэт хатуу чанд шаардлагуудтай байдаг учир ажил хийх боломж төдийлөн гардаггүй.

Өөрөөр хэлбэл, хөнгөлөлттэй зээл тусламж бол хөгжингүй, мөнгөтэй баян улс орнуудын өөрсдийнхөө компанид ажил олж өгч буй нэг хэлбэр байдаг. Тиймээс “Чингис бонд” босгож, өөрсдийн тулгамдсан асуудлуудаа шийдсэн нь түүхэн үйл явдал байсан. Монгол Улс анх удаа зээлсэн мөнгөө өөрийн дураар зарцуулж үзсэн.

Түүнээс хойш манай улс дахин 3.66 тэрбум ам.долларын дүн бүхий зургаан бонд гаргасан ч харамсалтай нь бүгд төсвийн алдагдлыг нөхөх, өөрийг өрөөр дарах /2.4 тэрбум ам.доллар нь өмнөх бондын өрийг дарахад зарцуулагдсан/ ажилд зориулагдсан байна. Анх бонд гаргаснаас хойш 10 жилд өнгөрөхөд эхний бондын өрөөсөө салж чадаагүй байна гэдэг нь санхүүжүүлсэн төсөл хөтөлбөрүүд тооцоолсон өгөөжөө өгөөгүй гэдгийг харуулж байгаа юм.

МОНГОЛ УЛСЫН ЗАСГИЙН ГАЗРЫН ГАРГАСАН БОНДУУД  

• Чингис бонд.  Энэхүү бондыг Монгол Улсын Засгийн газар 2012 онд олон улсын зах зээлд гаргаж байсан бөгөөд 10 жилийн хугацаатай 1.5 тэрбум долларын өрийн бичиг юм. Анх 41.-5.1 хувийн хүүтэйгээр арилжаалагдаж байсан. Чингис бондоор нийт 1660 гаруй төсөл, хөтөлбөр санхүүжүүлсэн гэх мэдээлэл бий.

Зарцуулалт: Төсөл хөтөлбөр санхүүжүүлсэн.

• Димсам бонд. Нэг тэрбум юань буюу 160 сая ам.долларын бондыг 2015 онд олон улсын зах зээлд арилжаалсан ба 3 жилийн хугацаатай, 7.5 хувийн хүүтэйгээр гаргасан. Бондыг арилжаалсан зорилго нь 2015 онд хугацаа нь дууссан Засгийн газрын өндөр хүүтэй дотоодын үнэт цаасыг санхүүжүүлэх явдал байв.

Зарцуулалт: Төсвийн алдагдлыг нөхөхөд зарцуулсан.

• Мазаалай бонд. 500 сая ам.долларын, 5 жилийн хугацаатай, 10.875 хувийн хүүтэй “Мазаалай” бондыг 2016 онд гаргаж байв. Энэ нь Засгийн газрын 2012 оноос хойших хамгийн өндөр хүүтэй бондод тооцогддог.

Зарцуулалт: Төсвийн алдагдлыг нөхөх зорилгоор гаргаж байв.

• Хуралдай бонд. 2017 онд босгосон 10 жилийн хугацаатай 8.75 хувийн хүүтэй, 600 сая долларын өрийн бичиг юм. Мөн 2024 онд хугацаа нь дуусна.

Зарцуулалт: Одоогоор Хуралдай бондын арилжаа хамгийн их идэвхитэй байгаа бөгөөд ханш нь 101.2 орчим ам.долларт хэлбэлзэж байна.

• Гэрэгэ бонд. Засгийн газар 2017 оны 10 дугаар сард 5.5 жилийн хугацаатай 5.625 хувийн хүүтэй 800 сая ам.долларын Гэрэгэ бондыг арилжаалжээ.

Зарцуулалт: Чингис болон Дим Сам бондын өрийг төлөх.

• Номад бонд.  Олон улсын санхүүгийн зах зээлд жилийн 5.125%-ийн  купонтой 5.5 жилийн хугацаатай 600.0 сая ам.долларын Номад бондыг 2020 оны 9 дүгээр сард гаргаж байв.

Зарцуулалт: 2025 онд төлнө.

• Century бонд. 2021 онд гадаад зах зээлд 6 жилийн хугацаатай, 3.5 хувийн хүүтэй, 500 сая ам.доллар, 10 жилийн хугацаатай, 4.4 хувийн хүүтэй мөн 500 сая ам.долларын буюу нийт 1 тэрбум ам.долларын бонд гаргаж байв.

Зарцуулалт: “Чингис” болон”Гэрэгэ” бондын гадаад өр төлбөрийг төлөх.

Энэ мэдээнд өгөх таны үнэлгээ

Хуваалцаарай Жиргээрэй