Сурвалжилга: "Скай ресорт"-ын буруугаас осолдсон залуу хэлгүй, хэвтрийн болж гурван жилийг үдлээ

Одоогоос гурван жилийн өмнө буюу 2019 оны арванхоёрдугаар сарын 30-ны өдөр "Скай ресорт" цанын баазад осол гарчээ. Тодруулбал, иргэн М.Ганбат тус цанын баазад гулгаж байхдаа осолд орсон байдаг.

Шүүхийн шинжилгээний үндэсний хүрээлэнгийн шинжээчийн 2020 оны нэгдүгээр сарын 28-ны өдрийн 1773 дугаартай дүгнэлтэд тухайн иргэний гэмтлийн зэргийг тогтоосон байна. Үүнд, М.Ганбатын биед чамархай яснаас суурь ясны их далавч, баруун нүдний ухархайн дээд хана, дотор хана руу үргэлжилсэн хугарал, дунд тархи, уртавтар тархи, баруун чамархайн тархины эдийн няцрал, баруун тал бөмбөлгийн дух, чамархай хэсгийн хатуу хальсан дээрх цусан хураа, аалзан хальсан дээрх цус харвалт, их тархины баруун тал бөмбөлгийн дух, зулай, чамархай, хүзүүний долоодугаар нугалмын хугарал, хүзүүний булчинд цус хурах, баруун зовхинд цус хуралтын шинжтэй байжээ.

Тэрбээр одоо хэл ярианы бэрхшээлтэй болж, хэвтрийн байдалтайгаар амьдарч буй. Гурван жилийн турш нийгмийн харилцаанд ороогүйгээс гадна, бие даан амьдрах боломжгүй болжээ. Хамгийн том асуудал нь түүнийг дотоодод хагалгаанд оруулах боломжгүй бөгөөд гаднын улсад эмчлүүлэх шаардлага үүссэн. Скай ресортод болсон энэхүү хэргийг шүүхээр шийдвэрлэсэн бөгөөд тус байгууллагын буруутай үйл ажиллагааны улмаас иргэн М.Ганбат хохирсон хэмээн шүүхийн тогтоол гарсан байна.

-М.Ганбатын аав Ч.Мөнхбат: Хүүтэйгээ хагалгаанд орохын өмнө ярилцсан. Хагалгааны дараа ухаан санаа нь алга болсон-

Манай сайтын сурвалжлах баг тэднийхийг зорин очлоо. Түүнийг гэрийнхээ хоймрыг голлуулан төмөр пүрштэй орон дээр хэвтүүлжээ. Том биетэй залуу болохоор аав ээжид нь асарч сувилахад энэ нь амар байдаг юм болов уу. Биднийг харсан даруйдаа баруун гараа үл ялиг хөдөлгөхөд "хүн ирэхээр баярлаж байна" гэж тайлбарлав.

Энэ залуу 24 настай. Тэрбээр ШУТИС-ийн төгсөх ангийн оюутан байхдаа ийн осолд орсон. Түүнийг асрахын тулд гэрийхнээс нь хэн нэг нь ажлаа орхих хэрэгтэй болсон учраас аав Ч.Мөнхбат ажлаасаа гарчээ. Тохижилт үйлчилгээний газар сая 200 мянган төгрөгийн цалминтай байсан тэрбээр өнөөдөр асаргааны 84 мянган төгрөгийн "цалин"-тай болж.

Ч.Мөнхбат "Хүү маань том биетэй, алхаж, бие засаж чаддаггүй тул би асардаг. Байнгын эм тариа шаарддаг. Эмийг нь таслахгүйн тулд чадахаасаа чадахгүй хүртэл нь явж байна. Заримдаа эм нь тасардаг. Олдоц муутай. Хүүгийн маань биеийн байдал тааруухан байгаа. Хагалгаанд яаралтай орох хэрэгтэй гэсэн.

Тухайн өдөр хүү маань оройтох үед утас руу нь залгасан юм. Найзууд нь утсыг нь аваад түүнийг эмнэлэгт ирсэн гэж хэлсэн. Бид гэрээсээ яаран гарч эмнэлэгт очихдоо хүүтэйгээ ярилцсан юм. Тэр үед багахан ухаантай байсан болохоор "Аав аа, би гайгүй ээ" гэж хэлсэн. Өглөө үүрээр яаралтай хагалгаанд орох хэрэгтэй болсон. Хагалгаанааас гарч ирснийх нь дараа ухаан санаа нь байхгүй болсон байлаа. Эрүүл байх үедээ хичээлийнхээ хажуугаар ажил хөдөлмөр эрхэлдэг байсан юм" гэв.

-Хүүгийн ээж Ц.Нарангэрэл: Толгойны хамгаалалтыг нь өгчихгүй дээ

"Хүүгийнхээ талаар ярихаар уйлаад байдаг юм. Дэндүү харамсалтай байна" хэмээн нулимсаа арчсаар М.Ганбатын ээж Ц.Нарангэрэл бидэнтэй ярилцлаа.

-Хүүгийнх нь биеийн байдал хэр байна вэ?

-Аваарт орсноос хойш дээрдээгүй. Бид өөрсдийн боломжоороо улсын гэлтгүй хувийн эмнэлгээр ч явж байгаа. Одоо зүүн талын хөл гар нь саажилттай, баруун гар нь байнгын чичирхийлэлттэй байна. Тархины саажилтын улмаас одоогоор иймэрхүү байгаа. Таталт өгөх хугацаа нь ч 15 хоног болж багассан.

Хүү маань ярьж чадахгүй. Үсэгтэй жижиг номон дээр хэлэхийг хүссэн үгээ илэрхийлдэг. Ингэхдээ хуруугаараа үсэгнүүд рүү зааж, үг эвлүүлдэг юм.

-Скай ресортын зүгээс та нартай ирж уулзав уу?

-Би хүүгээ сэхээнд байх үед нь шоконд орсон байдалтай байлаа. Эмнэлэгт нэг удаа ирж уулзсаныг нь санаж байна. Бидэнд эм тарианд туслая гэж хэлж байлаа. 2-3 удаа л авч өгсөн байх. Одоо ч шокны байдалтай байгаа болохоор тухайн үед болсон явдлын заримыг нь санадаггүй.

-Дотооддоо эмчлэх боломжгүй гэсэн шүү дээ?

-Тийм ээ. Дотоодод хийж болох бүхий л зүйлийг хийсэн. Гадаадад эмчлүүлэх шаардлагатай гэсэн. Нийт 242 сая вон буюу 617.1 сая төгрөг шаардлагатай. Гэвч үүнээс илүү нэмэлт зарлагууд гарна. Тухайлбал, байнгын нөхөн сэргээх эмчилгээ шаардлагатай. Сард дунджаар 200-300 мянган төгрөгийг эм хэрэгсэлд нь зарцуулдаг. Өөрсдийн орлогодоо тохируулж эм тариаг нь авч байна.

Бид Скай ресортыг буруутгаад байгаа юм биш. Шүүхийн шийдвэр гарсны дараа хагалгааг нь хийлгүүлж өгсөн бол өнөөдөр илүү хүндрээгүй байх боломжтой байлаа. Зөвхөн миний хүүгийн гэлтгүй олон залуучуудыг толгойны хамгаалалтгүйгээр гулгуулж байгаа бол. Бидэнд тохиолдсон шиг явдал бусдад ч бүү тохиолдоосой гэж хүсэж байна. Хүмүүс чөлөөт цагаа өнгөрөөхийг хүсэж очсноос биш бэртэж, гэмтье гэж тус газрыг зориогүй шүү дээ. Толгойны хамгаалалтыг нь өгчихгүй дээ.

-Хохирогчийн өмгөөлөгч Ц.Алтанцэцэг: Хохирогч болон хохирогчийн эцгийн авч болох цалингийн алдагдлыг нэхэмжилж авснаас өөрөөр Скай ресортоос эмчилгээний төлбөр өгөөгүй-

Энэхүү өрх зөвхөн хүүгийн ээж болох Ц.Нарангэрэлийн цалингаар амьдардаг. Үүн дээр нэмээд группийн болон асаргааны тэтгэмжээр амьдардаг ажээ. Асаргааны тэтгэмжид сард 84 мянга, группийн 280 мянган төгрөг авдаг байна. Ч.Мөнхбат ажлаасаа гарсан тул тэдний өмгөөлөгч Ц.Алтанцэцэг "Скай ресорт" компаниас 10.9 сая төгрөгийн тэтгэмж авч өгчээ.

Тус компанийн зүгээс хохирлыг төлсөн хэмээн мэдээлж байсан юм. Хохиролд өгсөн гэх 10.9 сая төгрөгийн талаар түүний өмгөөлөгчөөс тодрууллаа.

Тэрбээр "М.Ганбатыг хоёр жилийн хугацаанд эмчлүүлсэн. Эмчлүүлсэн төлбөрийг нь баримтаар нотолж, шүүхээр нэхэмжилсэн. Мөн Ч.Мөнхбат гэх хүн хүүхдээ гэмтэхээс өмнө нийслэлийн Нийтлэг үйлчилгээний газарт гадна талбайн үйлчлэгчээр ажиллаж байсан. Энэ хүн 700-1200 мянган төгрөгийн цалинтай байсан гэдгийг нийгмийн даатгалын сангаас мэдээллийг нь авч мэдсэн.

Хүүхэд нь өвдсөн үед ажлаасаа гарсан байдаг. Түүний үндсэн цалинг ажлын газраас нь 523,405 төгрөг хэмээн тогтоосон байдаг юм. Асаргааны мөнгөнд сард 84 мянган төгрөгийг авдаг тул энэ хоёр дүнгийн зөрүүг би нэхэмжилсэн. Ажлаа хийж байсан бол ийм хэмжээний мөнгөн төгрөгөөр хохирч байна гэж үзсэн учраас тэр л дээ.

Мөн М.Ганбатын группийг анх 188 мянган төгрөг хэмээн тогтоосон. Хэрэв энэ хүн хөдөлмөрийн чадамжаа алдаагүй байсан бол цалингийн доод хэмжээг авах байсан. Үүний зөрүүг ч бас би нэхэмжилсэн. Эдгээр мөнгөн дүнг нийлүүлбэл 10.9 сая төгрөг болж байгаа юм" гэв.

Өмгөөлөгчийн ярьснаар Скай Ресортын зүгээс цэвэр эмчилгээнд зориулсан мөнгөн төгрөгийг тус байгууллагын зүгээс өгөөгүй бөгөөд шүүхийн шийдвэрийн дагуу хариуцлагаа хүлээхгүйгээр "Тус иргэн хохиролгүй гэх гарын үсэг зурсан" гэдэг асуудлыг удаа дараа ярьсан байна.

-Хэргийн материалд шинжээчдийн дүгнэлтээр "Скай ресорт" ХХК-г стандартын шаардлага хангаагүйн улмаас осол гарсан гэж дүгнэжээ-

Энэхүү хэргийн материалд Хөдөлмөрийн хяналтын улсын байцаагч, шинжээч Г.Гантөмөрийн 2020 оны хоёрдугаар сарын 28-ны өдрийн дүгнэлтээр тус цанын бааз Ерөнхий шаардлагын MNS6000:2009 стандартын 5.6, 5.6.10 болон 5.6.13 шаардлагуудыг биелүүлээгүй нь осол гарах болсон шалтгаан гэжээ.

Хөдөлмөрийн хяналтын улсын байцаагч, шинжээч М.Ууганбаатар, Г.Ариунбаяр, Б.Чулуунчимэг нарын 2020 оны арванхоёрдугаар сарын 21-ний өдрийн дүгнэлтээр М.Ганбатын зүгээс өөрийн чадварт тохирсон замыг сонгон үйлчлүүлээгүй, мөн хамгаалах хувцас хэрэгслийг бүрэн хэрэглээгүй гэжээ. Харин байгууллагын зүгээс хамгаалах малгайг өмсүүлээгүй, хэрэгслийг бүрэн олгоогүй, осолдогчийг мэдээллээр хангаагүй, шаардлагатай аюулгүйн зааварчилгааг өгч, сургалтад хамруулаагүй зэрэг хүчин зүйлсээс болж осол гарах нөхцөл бүрдсэн хэмээн тодорхойлжээ.

Улмаар шинжээчдийн дөрвөн удаагийн дүгнэлтээр "Скай Ресорт" ХХК-ийн стандартын шаардлага хангаагүйн ослын гол шалтгаан хэмээн үзсэн байна.

"Скай ресорт" ХХК-ийн захирал А.Батсуурийг энэхүү хэргийн яллагдагчаар татсан байдаг. Доор харуулсан шүүхийн тогтоолд түүнийг гэм буруутайд тооцжээ. Гэсэн хэдий ч Өршөөлийн хуульд хамруулан гэм бурууг нь хэрэгсэхгүй болгосон байдаг. Үүний шалтгаан нь "Скай ресорт"-ын зүгээс гэмт хэргийн улмаас учирсан хохирол, хор уршиг, гэм хорын хохирлыг нөхөн төлөхөө илэрхийлж буй тул дээрх Өршөөлийн хуульд хамрагдсан юм.

"Скай ресорт"-ын зүгээс албан ёсны тайлбар хэлэхдээ тэд хохирогч М.Ганбатыг "Бэртэж гэмтсэн ч хохиролгүй" гэх бичигт гарын үсэг зурсан хэмээсэн. Эл асуудлыг Шүүхээр хэлэлцэж, эцсийн тогтоолыг гаргахдаа байгууллагын зүгээс стандартын шаардлагыг биелүүлээгүй нь хэрэг гарах болсон гол шалтгаан хэмээн үзсэн. Мөн тус байгууллагын зүгээс тавьж буй тайлбарт хохирогчийн ар гэрт шилжүүлсэн гэх 11 сая төгрөгийн талаар М.Ганбатын өмгөөлөгчөөс дээр тодруулан лавлалаа.

Эл байгууллагын зүгээс урьдчилж эмчилгээний мөнгө өгөхгүй байгаа шалтгаан нь хэдий хэр хэмжээний зардал гарах тооцоо байхгүйтэй холбоотой юм. Товчхондоо М.Ганбатын гэр бүл өөрсдийн зардлаараа түүнийг эмчлүүлсний дараа эцсийн мөнгөн дүнгээ "Скай ресорт" байгууллагаас нэхэмжилж авах ажээ.

Тиймээс урьдчилан зардал авах боломжгүй болсон тэд өнөөдөр хүүгийнхээ гадаадад хийлгэх ёстой хагалгааны зардалд хандив босгож байгаа юм. Бид энэхүү хэргийн талаар үргэлжлүүлэн мэдээлэх болно. Тэр нэгэн хар өдөр "Скай ресорт"-ын хамгаалалттын малгай хангалттай хүрэлцээтэй байсан бол, эсхүл өмнөх үйлчлүүлэгчдийг малгайгаа өгөхөөр дараагийн хүмүүсийн аюулгүй байдлыг хангаж гаргасан бол өнөөдөр энэ айлын амьдрал ямархуу байх байсан бол.

Энэ мэдээнд өгөх таны үнэлгээ

Share Tweet