Орлогч сайдуудыг томилох асуудлыг эрх баригчид АН, ХҮН намаар хийлгэнэ

Хамтарсан Засгийн газрын гишүүд дэд сайдын албыг сэргээхээр тохироо хийж эхэлжээ. “Ганц сайд хаанаа ч хүрэлцэхгүй байна” гэсэн суртал, ухуулга хаа сайгүй хөврөх болов.

Тодруулбал, төсөв батлагдсаны дараа энэ ондоо багтан дэд сайдуудыг томилгоог явуулахаар бэлтгэж “Орлогч сайд” гэж нэрийдээд, гаднаас томилох чигтэй байна. Ингэхдээ нэг сайдад бүр 2-3 дэд сайд томилно ч гэж яригдаж буй юм.

Дэд сайдууд өмнө нь Засгийн газрын тухай хуулийн 18 дүгээр зүйл:

• 1. Сайдаас олгосон бүрэн эрхийн хүрээнд харьяа агентлаг, байгууллагатай харилцах, тэдгээрийн үйл ажиллагааг уялдуулан зохицуулах; 
• 2. Хөтөлбөр, төсөл, арга хэмжээний хэрэгжилтийн шуурхай зохицуулалтыг хангуулах; 
• 3. Сайдын даалгаснаар УИХ, Ерөнхийлөгч, Засгийн газар, аймаг, нийслэлийн Засаг даргатай харилцах;
•  4. УИХ, түүний Байнгын хороо, Ерөнхийлөгч, Засгийн газар, Ерөнхий сайдаас байгуулах хороо, комисс, зөвлөл, ажлын хэсэгт сайдын түр эзгүйд түүний даалгаснаар сайдыг төлөөлөх;
• 5. Сайдын түр эзгүйд түүнийг орлож байх хугацаанд гаргасан шийдвэрээ сайдад танилцуулах бөгөөд уг шийдвэрийнхээ хууль зүйн үр дагаврыг өөрөө хариуцна.

Одоо орлогч сайдын орон тоонд 200 гаруй хүн горилж буй аж. Энэ албыг зүүдлэгсэд МАН, АН, ХҮН дотор олон байна. Хамтарсан Засгийн газар 16 яам, 22 сайдтай. Тэгэхээр багадаа 16, ихэдээ 32 дэд сайд томилно гэсэн үг. Мөн түүнийг дагаад 16 туслах, 16 жолоочийн цалин, бичиг хэргийн зардлаас эхлээд багагүй мөнгө улсын төсвөөс гаргах шаардлагатай болно.

УИХ-ын сонгуулийн дараа ЗГ-ын бүтцээ батлуулахдаа дэд сайд гэсэн албан тушаалыг хассан. Одоо Засгийн газрын тухай хуульд дэд сайд гэсэн үг үсэг нэг ч байхгүй. Иймд томилгоо хийхэд Засгийн газрын тухай хуульд өөрчлөлт оруулах шаардлага үүсэх юм. УИХ-аар оруулах хуулиа АН, ХҮН намын гараар “могой бариулах” аж. Харин дэд сайд нарын цалин, тэдэнд шаардагдах зардлыг ирэх оны төсөвт хэрхэн тусгах вэ гэдэг нь сонин байна.

Хэд хэдэн том салбарыг нэг яаманд нэгтгэсэн. Товчхондоо цомхон, чадварлаг төртэй байх Л.Оюун-Эрдэнийн амлалт нурах нь. Гуравхан сарын өмнө гаргасан шийдвэрээсээ буцах нь зарчимгүй хэрэг.

Энэ мэдээнд өгөх таны үнэлгээ

Хуваалцаарай Жиргээрэй